13 ივნისს ფეისბუქ-ანგარიშმა Giorgi Abashidze-მ გამოაქვეყნა ვიდეო, სადაც ჩანს, რომ მამაკაცს, რომელიც ადოლფ ჰიტლერს ასახიერებს, ქუჩაში ადამიანები სიხარულით ხვდებიან, მასთან ფოტოებს იღებენ და ნაცისტური სალმით ესალმებიან. პოსტის ავტორის თქმით, უბრალო გამვლელები “გაცოცხლებულ ჰიტლერს” ასე ევროპაში ხვდებიან.
გავრცელებული პოსტი ვიდეომანიპულაციას შეიცავს. რეალურად, კადრები 2015 წლის სატირული ჟანრის ფილმიდანაა (Look Who’s Back) ამოჭრილი და ჰიტლერის განმასახიერებელ მსახიობზე ევროპელების რეაქციას არ აჩვენებს.
გავრცელებული პოსტი ქმნის შთაბეჭდილებას, თითქოს ის ევროპის რომელიმე ქვეყანაშია გადაღებული და ადამიანს, რომელიც ჰიტლერის კოსტიუმითა და მაკიაჟით გადაადგილდება, ყველა გამვლელი ბედნიერად ხვდება. რეალურად, გავრცელებული კადრები 2015 წლის ფილმიდანაა ამოჭრილი. “ის კვლავ აქ არის” (Look Who’s Back) გერმანულენოვანი სატირულ-იუმორისტული ფილმია, რომელიც 2012 წლის იმავე სახელწოდების ტიმურ ვერმესის წიგნის მიხედვითაა გადაღებული.
ფილმის სიუჟეტი 21-ე საუკუნის ბერლინში ვითარდება. ადოლფ ჰიტლერი 2014 წელს ბერლინის ერთ-ერთ პარკში იღვიძებს, თუმცა მან არ იცის, რომ 2014 წელია და მოვლენებს მეორე მსოფლიო ომის პერსპექტივიდან აფასებს. ხალხი მასთან ფოტოებს იღებს, რადგან ფიქრობენ, რომ მსახიობია, რომელიც ჰიტლერს ასახიერებს. თუმცა მისგან შეწუხებული ერთ-ერთი ქალი ჰიტლერს წიწაკის სპრეის ასხამს.
ფილმში ადოლფ ჰიტლერი სამსახურიდან ცოტა ხნის წინ გათავისუფლებულ რეჟისორს, ფაბიან სავათცკის ხვდება, რომელიც ფიქრობს, რომ ჰიტლერი მსახიობია და მას სატელევიზიო პროგრამისთვის გადაღებას ჰპირდება. ჰიტლერი და სავათცკი გერმანიის სხვადასხვა ნაწილში მოგზაურობენ, ჰიტლერი ამას საკუთარი პოპულარობისა და ძალაუფლების აღდგენის შანსად აღიქვამს, გერმანელებს ესაუბრება და მათი პრობლემების მოგვარებასაც ჰპირდება.
წყაროს შესახებ:
ფეისბუქ მომხმარებელ Giorgi Abashidze-ს დეზინფორმაციული მტკიცებები წარსულშიც გაუვრცელებია, ვრცლად იხილეთ “მითების დეტექტორის” მასალებში:
- როდის და ვის მიერ დამკვიდრდა გამოთქმა “დიდება უკრაინას! დიდება გმირებს!”?
- რას ასახავს დოკუმენტი, რომელსაც გაეროს მიერ “ახალი მსოფლიო წესრიგის” დასამყარებელ დირექტივად წარმოაჩენენ?“აშკენაცი
- ხაზარი კაბალისტი” ებრაელების მასობრივი ემიგრაცია უკრაინაში თუ ყოველწლიური ტრადიცია – რას ასახავს ვიდეო?
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
