15 ნოემბერს სოციალურ ქსელ ფეისბუქზე გავრცელდა ვიდეო, რომელშიც ჩანს, როგორ ანაცვლებს ბილბორდზე მოწოდებას “Stand with Ukraine” მოწოდება “Stand with Israel”. ეკრანზე უკრაინის დროშა ქრება და მის ნაცვლად ისრაელის დროშა ჩნდება. ვიდეოს ბოლოს ვხედავთ მედია ABC News-ის ლოგოს, თანდართული წარწერებით “Watch the news”; “Stay in trend” [უყურეთ ახალ ამბებს; დარჩი ტრენდული]. პოსტის ავტორის მტკიცებით, ვიდეო ნიუ-იორკის ქუჩებშია გადაღებული და “ამერიკულ ცვალებად პრიორიტეტებს” ასახავს.
ვიდეო ასევე გავრცელდა რუსულენოვან ვებ-საიტებზე (1;2;3;4).
გავრცელებული ვიდეო ყალბია. კომპანიამ, რომელიც აღნიშნულ ბილბორდზე რეკლამების განთავსებაზე არის პასუხისმგებელი, უარყო, რომ უკრაინასა და ისრაელზე მსგავსი შინაარსის რეკლამა აჩვენეს.
Reuters-ის ინფორმაციით, ბილბორდი, რომელსაც ვიდეოში ვხედავთ, ნიუ-იორკში მდებარეობს (200 W 50th St, New York). ბილბორდის მფლობელი სარეკლამი კომპანია Clear Channel Outdoors-ია, რომელმაც უარყო, რომ მსგავსი შინაარსის ვიდეო აჩვენეს. “რეკლამა ეკრანებზე არასოდეს გამოჩენილა”. – უთხრა Reuters-ს კომპანიის წარმომადგენელმა.
ასევე, X-ზე (ყოფილი Twitter-ი) 14 ნოემბერს მომხმარებელმა გამოაქვეყნა (არქივის ბმული) ვიდეო, რომელშიც ჩანს, რომ ბილბორდზე მხოლოდ მულტფილმ “ტროლების” რეკლამას აჩვენებენ.
აღსანიშნავია ისიც, რომ ვიდეოს ბოლოს ბილბორდზე ჩნდება ფრაზა “Stay in trend” – ფაქტი, რომ წინადადება შეცდომით არის დაწერილი და არ იძებნება ინფორმაცია, რომ ABC News-ს მსგავსი სლოგანი ოდესმე აქვს გამოყენებული, მიუთითებს, რომ რეკლამა გაყალბებულია.
ვიდეო ასევე გადაამოწმეს და ყალბად შეაფასეს უცხოურმა ფაქტების გადამმოწმებელმა ორგანიზაციებმა (1;2;3).
“მითების დეტექტორმა” რუსეთ-უკრაინისა და ისრაელ-ჰამასის ომთან დაკავშირებით ნიუ-იორკში განთავსებულ ბანერებზე ინფორმაცია წარსულშიც გადაამოწმა.
- განთავსდა თუ არა უკრაინის დროშის ფერებით ბანერი GLORY TO URINE ნიუ-იორკში?
- ნიუ-იორკის ბანერი, რომელშიც საავადმყოფოს დაბომბვაში ისრაელია დადანაშაულებული, ყალბია
ისრაელ-ჰამასის 2023 წლის ომის დაწყების შემდეგ სოციალურ ქსელში ვრცელდება მტკიცებები, თითქოს დასავლეთი ისრაელის მიზეზით უკრაინის მხარდაჭერას წყვეტს/ასუსტებს. მაგალითად, “მითების დეტექტორმა” 9 ოქტომბერს გადაამოწმა ინფორმაცია, თითქოს აშშ-მა უკრაინისთვის განკუთვნილი დახმარება ისრაელში გადაამისამართა.
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
