1 მაისს ფეისბუქ-გვერდმა “სექსუალური მცენარეული პროდუქტები მამაკაცებისთვის და ქალებისთვის” და ფეისბუქ-მომხმარებელმა David Tordia გაავრცელეს ვიდეო, რომელშიც ჩანს, რომ შენობის აივანზე მყოფი ქალი მაისურს იწევს და შენობის მიმდებარე ტერიტორიაზე შეკრებილი ხალხისკენ იხედება. პოსტების აღწერაში ვკითხულობთ: “აქციაზე ხალხს ამხნევებს”. კომენტარებში წერენ, რომ ვიდეო თბილისში ე.წ აგენტების კანონის წინააღმდეგ მიმდინარე საპროტესტო აქციაზეა გადაღებული.
ვიდეო, რომელიც თითქოს საპროტესტო აქციაზეა გადაღებული, მანიპულაციურად ვრცელდება. რეალურად, კადრები ინტერნეტში 2023 წლიდან იძებნება და არა საქართველოში მიმდინარე ე.წ. აგენტების კანონის საწინააღმდეგო აქციებს, არამედ ბარსელონაში მდებარე წმინდა იაკობის მოედანს ასახავს.
სოციალურ ქსელში გავრცელებული ვიდეო საქართველოში ე.წ. აგენტების კანონის წინააღმდეგ მიმდინარე აქციებს არ ასახავს. Yandex და Google Image Search-ის გამოყენებით მიღებული შედეგის მიხედვით, კადრები 2023 წელს სხვადასხვა პლატფორმაზე იყო გავრცელებული (1;2;3;4).
გავრცელებული კადრები ბარსელონაშია გადაღებული
“მითების დეტექტორმა” გავრცელებული კადრები გეოლოკაციით გადაამოწმა. კადრებში ორ შენობას და მოედანზე შეკრებილ ხალხს ვხედავთ. ერთ-ერთი შენობის პირველ სართულზე დაწესებულების სახელი ჩანს, რომელიც ვიდეოს ხარისხის გამო არ იკითხება.
აღნიშნული შენობის ძებნისას სოციალურ ქსელში ვხვდებით ფოტოს, რომელზეც იგივე შენობაა ასახული. აღნიშნულ ფოტოზე გამოსახული შენობის პირველ სართულზე გარკვევით ჩანს იმ დაწესებულების სახელი, რომელიც ვიდეოში დაბალი ხარისხის გამო არ იკითხებოდა, ობიექტზე “Pans” აწერია.
Pans & Company რესტორანია, რომელსაც ბარსელონაში რამდენიმე ფილიალი აქვს. Google Maps-ის დახმარებით ვადგენთ, რომ ვიდეოში ჩანს ფილიალი, რომელიც წმინდა იაკობის მოედანზე (Saint James’s Square) მდებარეობს.
შესაბამისად, კადრები საქართველოში მიმდინარე ე.წ. აგენტების კანონის საწინააღმდეგო აქციასთან არ არის დაკავშირებული. ვიდეო არა თბილისში, არამედ ბარსელონაში მდებარე წმინდა იაკობის მოედანზეა გადაღებული. უშუალოდ რა მოვლენასთან დაკავშირებითაა ხალხი მოედანზე შეკრებილი, ღია წყაროებში არ იძებნება.
ვინ არის კადრებში გამოსახული ქალი?
გავრცელებულ კადრებში ქალი ჩანს, რომელიც მაისურს იწევს და შეკრებილი ხალხისკენ ტრიალდება. როგორც ერთ-ერთ სტატიაში ვკითხულობთ, ის ამერიკელი ფოტომოდელი Sophia Vay არის. ამავე წყაროს ცნობით, მოდელმა ვიდეო თვითონ გაავრცელა. აღსანიშნავია, რომ ამ დროისთვის (02.05.2024) Instagram-ზე Sophia Vay-ს ოფიციალური გვერდი გაუქმებულია და არც TikTok-ზე იძებნება.
წყაროს შესახებ
“მითების დეტექტორს” ფეისბუქ-მომხმარებელ David Tordia-ს მიერ გავრცელებული ყალბი ინფორმაცია წარსულშიც აქვს გადამოწმებული. მომხმარებელი ძირითადად ანტიოპოზიციური და ჰომოფობიური შინაარსის მასალას ავრცელებს.
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
