4-8 ივნისს ქართულმა (1, 2, 3, 4) და რუსულენოვანმა ფეისბუქ ანგარიშებმა (1, 2, 3, 4) გაავრცელეს ლგბტქ+ თემატიკის ფოტო-ილუსტრაცია, მასზე დატანილია ლოგო წარწერით Київ Цифровий, ხოლო ფონად ლგბტქ+ დროშებია. ფეისბუქ-მომხმარებლები წერენ, რომ კიევის მეტრომ ,,სიამაყის თვისთვის” მეტროს ბარათების ახალი დიზაინი დაამზადა, რომელზეც კაცები ერთმანეთს კოცნიან. გავრცელებული ფოტოს აღწერაში ფეისბუქ-მომხმარებლები აღნიშნავენ, რომ ე.წ. პრაიდი კიევის მეტროში 16 ივნისს გაიმართება.
იდენტურ ფოტოსა და აღწერას ,,ტელეგრამის” არხზე ავრცელებს კრემლისტური იდეების გამავრცელებელი პოლიტიკის ექსპერტი ალექსანდრ სკუბჩენკო.
ფოტო არასწორი აღწერით, მანიპულაციურად ვრცელდება. კიევის მეტროს ლგბტქ+ თემატიკის სამგზავრო ბარათები არ დაუმზადებია. მსგავსი ინფორმაცია არც კიევის მეტროსა და არც Київ Цифровий-ის ვებ გვერდზე არ იძებნება, ლგბტქ+ დიზაინით სამგზავრო ბარათების დამზადების ცნობას თავად Київ Цифровий-ც უარყოფს.
სოციალურ მედიაში გავრცელებულ ფოტო-ილუსტრაციაზე ვხედავთ ლოგოს და წარწერას Київ Цифровий, რაც კიევში მყოფ ტურისტებზე გათვლილი მობილური აპლიკაციაა. ის აერთიანებს კიევის ციფრულ მუზეუმს, ქალაქის რუკებს, ინფორმაციას კიევის კულტურულ ღონისძიებებზე და აპლიკაცია ტურისტებისთვის ტრანსპორტის ელექტრონული ბილეთების შეძენის შესაძლებლობასაც იძლევა. Київ Цифровий-ის ოფიციალურ ვებსაიტზე მითითებაა, რომ ის 2021 წელს შეიქმნა და კიევის საქალაქო სახელმწიფო ადმინისტრაციას, კიევის საქალაქო საბჭოს ეკუთვნის.
ოფიციალურ საიტზე Київ Цифровий-ი ტურისტებს მხოლოდ ორი დიზაინის ელექტრონულ სამგზავრო ბარათს სთავაზობს.
ღია წყაროებში ინფორმაციის ძიების შემდგომ, ,,მითების დეტექტორმა” ინფორმაციის Київ Цифровий-თან გადაამოწმა. ისინი განმარტავენ, რომ არც სატრანსპორტო ბარათის დიზაინის ანდა სპეციალური ბარათის გამოშვება არ იგეგმება, ასევე მათი სახელით გავრცელებული ფოტო-ილუსტრაცია ყალბია.
უკრაინაში რუსეთის ხელახალი შეჭრის შემდგომ, წელს პირველად იგეგმება ,,ღირსების თვის” აღნიშვნა. ორგანიზატორების თავდაპირველი გეგმით, ,,თანასწორობის მარში”, უსაფრთხოების მიზნით, კიევის მეტროში, 16 ივნისს უნდა გამართულიყო, თუმცა 3 ივნისს კიევის საბჭომ მონაწილეთა უსაფრთხოებისა და პროვოკაციის თავიდან არიდების მიზნით, მარშის მეტროში გამართვაზე უარი თქვა.
,,მითების დეტექტორმა” წარსულშიც გადაამოწმა უკრაინის კონტექსტში ლგბტქ+ საკითხებზე გავრცელებული მცდარი ცნობები და ისინი შესაბამისად შეაფასა. ვრცლად მასალები:
- შედგა თუ არა ხარკივში ლგბტქ+ პირთა ოფიციალური ქორწინება?
- დეზინფორმაცია, თითქოს უკრაინაში ერთნაირსქესიან წყვილთა ქორწინება დასაშვებია
- დეზინფორმაცია, თითქოს უკრაინამ სკოლებში ლგბტ საკითხების სწავლების დანერგვაზე მემორანდუმს მოაწერა ხელი
წყაროების შესახებ:
ფეისბუქ-ანგარიში მაია თვალთვაძე რეგულარულად ავრცელებს დეზინფორმაციასა და შეთქმულების თეორიებს. თვალთვაძის მიერ გავრცელებული მცდარი ინფორმაცია “მითების დეტექტორმა” წარსულშიც არაერთხელ გადაამოწმა.
ფეისბუქ-ანგარიში Mano Beridze შეცდომაში შემყვანი ცნობები აქამდეც გაუვრცელებია, ცნობებს ხშირად ავრცელებს. მათი ნაწილი ,,მითების დეტექტორმა” უკვე შეაფასა მცდარ ინფორმაციად.
Levan Tavdishvili სისტემატურად აქვეყნებს ანტიდასავლური და ანტიუკრაინული შინაარსის პოსტებსა და შეთქმულების თეორიებს.
არქივის ბმული
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
