1 აგვისტოს ქართულენოვანმა ფეისბუქ-ანგარიშებმა (1, 2) გამოაქვეყნეს პოსტები, რომლებშიც წერენ, რომ “მთავარი არხის” დამფუძნებლის ნიკა გვარამიას აზრით, როგორც სომხეთმა დათმო ყარაბაღი, საქართველომაც მსგავსად უნდა დათმოს აფხაზეთი და სამაჩაბლო, რათა დასავლურ კავშირებში გაწევრიანება გაუადვილდეს. ერთ-ერთ პოსტში გვარამიას ციტატის სქრინშოთიცაა მოცემული, რომელშიც ის ამბობს, რომ სომხეთის ლიდერი ისტორიული ფიგურაა, რადგან მან სომხეთს სიმსივნე, სახელად ყარაბაღი მოკვეთა.
ნიკა გვარამიას განცხადება მცდარი ინტერპრეტაციით ვრცელდება. გვარამიას არ უთქვამს, რომ დასავლურ სტრუქტურებში გასაწევრიანებლად საქართველომ აფხაზეთისა და სამაჩაბლოს ოკუპირებული რეგიონები უნდა დათმოს. გვარამია ყარაბაღს მსოფლიოში სხვადასხვა კონფლიქტის დიალოგის ფორმატში გადასვლაზე საუბრისას ახსენებს და იმასაც ხაზგასმით ამბობს, რომ სხვადასხვა ფორმატის დახმარებით საქართველო ოკუპირებულ ტერიტორიებს აუცილებლად დაიბრუნებს.
ნიკა გვარამიამ ყარაბაღთან დაკავშირებით ტელეკომპანია “ფორმულას” გადაცემა “კვირის ფორმულაში” სტუმრობისას ისაუბრა. გვარამია მსოფლიოში მიმდინარე პოლიტიკურ პროცესებზე საუბრობდა და აღნიშნავდა, რომ დღესდღეობით ბევრი დაპირისპირებული მხარე მოლაპარაკებების რეჟიმშია გადასული. ერთ-ერთმა წამყვანმა მაგალითად სომხეთისა და აზერბაიჯანის შემთხვევა მოიყვანა, რაზეც გვარამიამ თავისი აზრი გამოთქვა და აღნიშნა, რომ ნიკოლ ფაშინიანმა ყარაბაღის დათმობით სწორი გადაწყვეტილება მიიღო, რადგან ამით მან ისტორიული ტრავმა დაამარცხა და ქვეყნის სამომავლო განვითარებას ხელი შეუწყო.
გავრცელებული პოსტების ავტორები მანიპულირებდნენ, თითქოს გვარამიას აზრით, ოკუპირებული ტერიტორიების დათმობა დასავლურ სტრუქტურებში გაწევრიანებას გაადვილებს. რეალურად კი, გვარამიას ყარაბაღის და მეორე მხრივ, აფხაზეთის ან სამაჩაბლოს შემთხვევების შედარება არ მოუხდენია. მან პირიქით, ის თქვა, რომ ევროკავშირში არაერთი სამართლებრივი ფორმატი არსებობს, რომლებიც საქართველოს აფხაზეთის დაბრუნებაში დაეხმარება.
ნიკა გვარამია: აფხაზებს გადაწყვეტილება, მე ვფიქრობ და დარწმუნებული ვარ ამაში, მიღებული აქვთ და არ უნდათ რუსეთში. მაგრამ ჩვენ გვჭირდება, რომ მათ უნდოდეთ საქართველოში და ეს აბსოლუტურად მოხდენადია, მოდი, ასე ვთქვათ, ეს არის გაკეთებადი. ჯერ ეს ერთი, ფორმატები არსებობს განსხვავებული, სამართლებრივი ფორმატებიც არსებობს განსხვავებული, როცა შენ ევროკავშირში ხარ. ხალხო, კვიპროსები ერთიანდება და თურქეთის და საბერძნეთის ლიდერები იწყებენ ერთმანეთთან ლაპარაკს, რომ ევროკავშირის ფარგლებში კვიპროსი ხელახლა გაერთიანდეს. გეოპოლიტიკური რევოლუციაა, უბრალოდ ყველა მიმართულებით და ჩვენ ვართ სად, საერთოდ ვინმემ შეიძლება რომ იცოდეს?
სოფო ზურაბიანი, წამყვანი: სომხები და აზერბაინელებიც აგერ ამდენი ხანია უკვე საუბრობენ, მერამდენე შეხვედრაა
ნიკა გვარამია: სომხეთის ლიდერზე [ნიკოლ ფაშინიანი] მე ვარ უმაღლესი წარმოდგენის. ეს კაცი არის ისტორიული ფიგურა. ძალიან დიდი პოლიტიკური ლიდერიდან გადაიქცა თავისი ერის ისტორიულ ლიდერად. მან სომხეთს მოჰკვეთა სიმსივნე სახელად ყარაბაღი. შეიძლება ცინიკურად გამომდის ეს და სომხებს არ მოეწონოთ, მაგრამ ყარაბაღი, საერთაშორისო სამართლით არის აზერბაიჯანის ტერიტორია.
სანამ გვარამია ყარაბაღზე ისაუბრებდა, მან ხაზგასმით აღნიშნა, რომ აფხაზეთი საქართველოს ომის გარეშე დაუბრუნდება, მაშინ, როდესაც საქართველო ევროკავშირში გაწევრიანდება.
ნიკა გვარამია: საქართველოში ომი არ უნდა იყოს. არც აფხაზეთის დასაბრუნებლად ომი არ უნდა იყოს… აფხაზეთი საქართველოს დაუბრუნდება მაშინ, როცა ჩვენ გავხდებით ევროკავშირის წევრები და აქ “რეუნიონი” მოხდება კვლავ, კვლავ გაერთიანება. პირიქით, მე ამაში ღრმად დარწმუნებული ვარ იმიტომ, რომ თუ ჩვენ ვართ ევროკავშირის წევრები, ეს ნიშნავს, რომ რუსეთი არის სუსტი, აფხაზეთს წასასვლელი არსად არ აქვს და არ უნდა ამ აფხაზეთს რუსეთში წასვლა.
წყაროების შესახებ:
Инин Хундадзе, იგივე ნინი ხუნდაძე “კონსერვატიული მოძრაობისა” და ტელეკომპანია ალტ-ინფოს მხარდამჭერია. მის მიერ გავრცელებული მცდარი ინფორმაცია “მითების დეტექტორს” არაერთხელ გადაუმოწმებია:
- შეუთანხმდა თუ არა კიევი იუნესკოს კიევ-პეჩერის ლავრიდან წმინდა ნაწილების გადაცემის შესახებ?
- გერმანიის პოლიციის მიერ ოჯახისათვის ბავშვის ჩამორთმევის მიზეზებზე დეზინფორმაცია ვრცელდება
რაგნარ ლოთბნელი დეზინფორმაციის ასევე ხშირი გამავრცელებელია, იხილეთ რამდენიმე მაგალითი:
- საქართველოში ამერიკის ახალი ელჩის, რობინ დანიგანის შესახებ დეზინფორმაცია და ვიზუალური მანიპულაციები ვრცელდება
- სოციალურ ქსელში გიული ალასანიას ფოტოფაბრიკაცია ვრცელდება
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
