20 აპრილს ანონიმურმა ანტიოპოზიციურმა ფეისბუქ ანგარიშმა ,,ტერენტი გლდანელი” გამოაქვეყნა დედის მიმართ განსაკუთრებული სისასტიკით ჩადენილი მკვლელობისათვის მსჯავრდებული, ირმა ყოჩიაშვილის ფოტო, თითქოს ის ე.წ. აგენტების კანონს აპროტესტებს. ფოტოს აღწერის მიხედვით ,,კანიბალიც აყვა მოდას.”
გავრცელებული ციტატა ყალბია. ირმა ყოჩიაშვილის მიერ ,,აგენტების კანონის” გაპროტესტების შესახებ მხოლოდ ,,ტერენტი გლდანელი” წერს. მსგავსი ციტატა არც ერთ სანდო ქართულენოვან მედიას არ გამოუქვეყნებია.
სოციალურ ქსელში გავრცელებული ფოტო და ციტატა რეალური არ არის. მისი ერთადერთი წყარო ,,ტერენტი გლდანელის” სახელის მქონე ანონიმური ფეისბუქ ანგარიშია. ირმა ყოჩიაშვილის მსგავსი ციტატა სანდო მედიასაშუალებებს არ გაუვრცელებიათ. ფეისბუქ ანგარიში ყოჩიაშვილის ყალბ ციტატას ,,აგენტების კანონის” საწინააღმდეგო აქციების დისკრედიტაციის მიზნით იყენებს.
2017 წელს თბილისის საქალაქო სასამართლომ ირმა ყოჩიაშვილისა და ბექა შენგელიას მიმართ გამამტყუნებელი განაჩენი გამოიტანა. ირმა ყოჩიაშვილს ბრალი წარედგინა საქართველოს სისხლის სამართლის კოდექსის 109-ე მუხლის მე-2 ნაწილის „ე“ და ამავე მუხლის მე-3 ნაწილის ,,ბ’’ ქვეპუნქტებით (ოჯახის ერთი წევრის მიერ ოჯახის სხვა წევრის განზრახ მკვლელობა ჩადენილი ჯგუფურად, განსაკუთრებული სისასტიკით). სასჯელის სახედ და ზომად კი 20 წლით თავისუფლების აღკვეთა განესაზღვრა. ,,ტერენტი გლდანელი” კანიბალიზმზე მიუთითებს. ირმა ყოჩიაშვილის თანამზრახველს, ბექა შენგელიას ბრალი წარედგინა სისხლის სამართლის კოდექსის 109-ე მუხლის მეორე ნაწილის სამი ქვეპუნქტით, რაც მკვლელობის განზრახ ჯგუფურად, განსაკუთრებული სისასტიკით და მსხვერპლის სხეულის ორგანოს სხვაგვარად გამოყენების მიზნით ჩადენას გულისხმობს.
ე.წ. აგენტების კანონის საწინააღმდეგო აქციების პარალელურად, სოციალურ ქსელში შეცდომაში შემყვანი ინფორმაცია ვრცელდება, მათ შორისრასაც ,,მითების დეტექტორი” სისტემატურად ამოწმებს:
- ,,პოლიტიკური სიღორე N5” ,,რუსული კანონის” საწინააღმდეგო პოსტერს აყალბებს
- ვინ გააყალბა საპროტესტო პოსტერი, რომელიც საქართველოს ევროპულ მომავალს შეეხება?
- ,,მთავარი არხის” სახელით გაყალბებული პოსტი ვრცელდება
წყაროს შესახებ:
“ტერენტი გლდანელის” ფეისბუქ ანგარიში ამერიკის ელჩის, დასავლეთის და უკრაინის, ოპოზიციის წინააღმდეგ კამპანიებშია ჩართული, ის ხელისუფლების ოპონენტებზე ყალბ ამბებს და ვიდეო ფაბრიკაციას ადრეც ავრცელებდა
არქივის ბმული.
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.