25 იანვარს პროსახელისუფლებო და ოპოზიციის მადისკრედიტირებელმა ფეისბუქ-გვერდმა და იდენტური სახელწოდების ანგარიშმა “ტერენტი გლდანელი” ლიტერატურათმცოდნე ლევან ბერძენიშვილის ვიდეო გამოაქვეყნა. ვიდეოში ბერძენიშვილი ამბობს: “ყოველ შემთხვევაში, ჯავახიშვილთან დაკავშირებით მინდა გითხრათ, მანაც საშინელება ჩაიდინა, როგორც ილია ჭავჭავაძემ, პირდაპირ სულში ჩაგვაფურთხა”.
გავრცელებული ვიდეო არასრული სახით ვრცელდება, რაც ბერძენიშვილის თავდაპირველ ციტატას მნიშვნელობას უცვლის. რეალურად, ლევან ბერძენიშვილმა მიხეილ ჯავახიშვილსა და ილია ჭავჭავაძეს შორის პარალელი ქართველი ერის კრიტიკის კუთხით გაავლო, სწორედ ეს იგულისხმება ფრაზაში “პირდაპირ სულში ჩაგვაფურთხა”. ბერძენიშვილი სრულ ვიდეოში ორივე მწერლის მიმართ პატივისცემას გამოხატავს.
ტერენტი გლდანელის მიერ გამოქვეყნებული 10-წამიანი ვიდეო ლევან ბერძენიშვილის 2016 წელს გამართული 2-საათიანი ლექციიდან არის ამოჭრილი. ბერძენიშვილმა მიხეილ ჯავახიშვილთან დაკავშირებით ლექცია მწერლის დაბადების დღეს 20 ნოემბერს წაიკითხა.
ბერძენიშვილი მთელი ლექციის განმავლობაში მიხეილ ჯავახიშვილის სამწერლო ოსტატობასა და დადებით პიროვნულ თვისებებს უსვამს ხაზს. ის არაერთხელ აღნიშნავს, რომ ჯავახიშვილი საბჭოთა კავშირის სისტემას დაუპირისპირდა, რამაც საბოლოოდ მისი სიცოცხლე შეიწირა.
ბერძენიშვილი მიხეილ ჯავახიშვილსა და ილია ჭავჭავაძეს შორის პარალელს ქართველი ერის კრიტიკის კუთხით ავლებს. სწორედ ამას გულისხმობს ბერძენიშვილი, როცა ამბობს, რომ ჯავახიშვილმა “პირდაპირ სულში ჩაგვაფურთხა”. სრულ ციტატაში ბერძენიშვილი ამბობს, რომ სწორედ “სულში ჩაფურთხებად” იქნა აღქმული ჯაყოს ხიზნები, რომელშიც ჯავახიშვილმა თეიმურაზ ხევისთავის სახით აჩვენა ქართველი კაცი, რომელმაც ყველაფერი ღირებული მტერს ჩააბარა.
| სრული ციტატა | არასრული, უკონტექსტო ციტატა |
| ლევან ბერძენიშვილი: “ყოველ შემთხვევაში, ჯავახიშვილთან დაკავშირებით მინდა გითხრათ, მანაც საშინელება ჩაიდინა, როგორც ილია ჭავჭავაძემ, პირდაპირ სულში ჩაგვაფურთხა, თუ შეიძლება ასე ითქვას, ასე იქნა აღქმული “ჯაყოს ხიზნები”. რა არის იქ ასეთი საშინელი? საშინელი არის ის, რომ ქართველი კაცი იმდენად დაკნინდა, იმდენად დაეცა, რომ თავისი ხელით ჩააბარა თავისი მთელი საკუთრება, ცოლის და სილამაზის, პატიოსნების და ყველაფრის ჩათვლით ჩააბარა უსაშინლეს მტერს.” | ლევან ბერძენიშვილი: “ყოველ შემთხვევაში, ჯავახიშვილთან დაკავშირებით მინდა გითხრათ, მანაც საშინელება ჩაიდინა, როგორც ილია ჭავჭავაძემ, პირდაპირ სულში ჩაგვაფურთხა…” |
ლევან ბერძენიშვილს რამდენიმე ისტორიული ფიგურა, მათ შორის ერეკლე მეორე და აკაკი წერეთელი გაკრიტიკებული ჰყავს, ამ საბაბით ის საზოგადოების ნაწილის მხრიდან თავდასხმის ადრესატი რამდენჯერმე გახდა. 22 იანვარს ბერძენიშვილს სახელისუფლებო სარედაქციო პოლიტიკის მქონე მედიის, POS TV-ის ჟურნალისტმა ნათია ბერიძემ სიტყვიერი შეურაცხყოფა მიაყენა და ამის ამსახველი ვიდეო სოციალურ ქსელში გამოაქვეყნა, რასაც დისკრედიტაციის კოორდინირებული კამპანია მოჰყვა. ამ თემაზე ვრცლად იხილეთ:
ბერძენიშვილის სახელით გაყალბებული და უკონტექსტო ციტატები სხვადასხვა ცნობილი ადამიანის შესახებ “მითების დეტექტორმა” აქამდეც არაერთხელ გადაამოწმა, ამ ციტატებზე ვრცლად იხილეთ:
- ილია ჭავჭავაძის შესახებ ლევან ბერძენიშვილის სახელით ყალბი ციტატა ვრცელდება
- ხვიჩა კვარაცხელიას შესახებ ლევან ბერძენიშვილის დამონტაჟებული ვიდეოკომენტარი ვრცელდება
- სოციალურ ქსელში ჟიული შარტავას შესახებ ლევან ბერძენიშვილის ყალბი ციტატა ვრცელდება
- ბერძენიშვილის ციტატები ვაჟა-ფშაველას შესახებ კონტექსტის გარეშე ვრცელდება
- როგორ გააყალბა “ქართული მარშის” წევრმა ლევან ბერძენიშვილის ფეისბუქ პოსტი?
- სოციალურ ქსელში გვარამიასა და აღმაშენებელზე ბერძენიშვილის ყალბი ციტატები ვრცელდება
- თქვა თუ არა ბერძენიშვილმა, რომ გიორგი ანწუხელიძე გმირი არ არის?
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
