ფეისბუქ-პროფილი Snow Den (1, 2) ლიტერატურათმცოდნე ლევან ბერძენიშვილის სახელით 2 ციტატას ავრცელებს. ერთში აღნიშნულია, რომ ნიკა გვარამია გმირია და ასე თავდადებით მეფეებსაც არ უბრძოლიათ, ხოლო მეორეში წერია, რომ დავით აღმაშენებელი მოღალატე იყო, რადგან ის 10 წელი თურქ-სელჩუკებს ხარკს უხდიდა.
გარდა ამისა, ციტატები ჯგუფებში History of Georgia და ხარაგაულის საგანმანათლებლო სივრცე გავრცელდა.
ბერძენიშვილის სახელით გავრცელებული ციტატები ყალბია. მის მიერ გაკეთებული იდენტური ან მსგავსი შინაარსის განცხადება ღია წყაროებში არ იძებნება. ციტატის ნამდვილობა ბერძენიშვილმა “მითების დეტექტორთან” კომენტარშიც უარყო.
დეზინფორმაციაა, თითქოს ბერძენიშვილმა ნიკა გვარამია ქართველი მეფეების თავდადებულ ბრძოლას შეადარა, ხოლო დავით აღმაშენებელი თურქ-სელჩუკებისთვის ხარკის გადახდის გამო მორალატედ მოიხსენია.
ღია წყაროებსა და მედიასაშუალებებში ბერძენიშვილის ამ შინაარსის ციტატა არ იძებნება. “მითების დეტექტორი” ციტატების ავთენტურობის გადასამოწმებლად ლევან ბერძენიშვილს დაუკავშირდა, მან აღნიშნა, რომ ორივე ციტატა ყალბია.
ბერძენიშვილის სხვა გაყალბებულ და უკონტექსტოდ გავრცელებულ ციტატებზე იხილეთ “მითების დეტექტორის” მასალები:
- სოციალურ ქსელში ჟიული შარტავას შესახებ ლევან ბერძენიშვილის ყალბი ციტატა ვრცელდება
- ბერძენიშვილის ციტატები ვაჟა-ფშაველას შესახებ კონტექსტის გარეშე ვრცელდება
- როგორ გააყალბა “ქართული მარშის” წევრმა ლევან ბერძენიშვილის ფეისბუქ პოსტი?
წყაროების შესახებ
ბერძენიშვილის გაყალბებული ციტატა დავით აღმაშენებლის შესახებ ფეისბუქ-ჯგუფში ხარაგაულის საგანმანათლებლო სივრცე ვანო ჭიპაშვილმა გამოკითხვის სახით გაავრცელა და დასვა კითხვა, ეთანხმებოდნენ თუ არა ჯგუფის წევრები ბერძენიშვილს.
ვანო ჭიპაშვილს ფეისბუქზე სამუშაო ადგილად ხარაგაულის მუნიციპალიტეტის საკრებულო აქვს მითითებული.
საკუთარ პროფილზე ორივე ყალბი ციტატა ანგარიშმა Snow Den-მა გამოაქვეყნა. მას პროფილზე პერსონალური ინფორმაცია და ფოტოები გამოქვეყნებული არ აქვს. მას მოწონებული აქვს კონსერვატიულ მოძრაობასთან და ალტ-ინფოსთან დაკავშირებული და ასევე პროსახელისუფლებო ტელევიზიების – იმედისა და POSTV-ანალიტიკის ფეისბუქ-გვერდები.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
