23-24 მარტს ახლადშექმნილმა ფეისბუქ გვერდმა ,,სიახლენი” და რამდენიმე ფეისბუქ ანგარიშმა, მათ შორის, ადვოკატმა ირაკლი ზაქარეიშვილმა და შიინ ევროპისკენ, პარტია “გირჩი-მეტი თავისუფლების” პოლიტიკოსი ზურაბ ჯაფარიძის გადაცემა ,,სიცრუის დეტექტორში” სტუმრობის ამსახველი ვიდეოკოლაჟი გაავრცელეს. ვიდეოში წამყვანი, გიორგი გასვიანი, რამდენიმე კითხვას უსვამს ჯაფარიძეს, მათ შორის, არის თუ არა პოლიტიკოსისთვის მშობლები და პატრიარქი ავტორიტეტი, მხარს დაუჭერდა თუ არა ერთნაირსქესიანთა ქორწინებას ან მიუღია თუ არა ფსიქოდელიური ნარკოტიკი. ვიდეოდან ჩანს, რომ კითხვაზე ,,პატრიოტი ხართ?” ზურა ჯაფარიძე პასუხობს, რომ არა და იცინის. ფეისბუქ ანგარიშების ნაწილი ამ ვიდეოზე ასევე აღნიშნავს, რომ ჯაფარიძე “უსამშობლოა”.
,,სიცრუის დეტექტორში” ზურაბ ჯაფარიძის სტუმრობის ამსახველი ვიდეოკოლაჟი მანიპულაციურად ვრცელდება. ვიდეოს ნაწილი დარედაქტირებულია, სინამდვილეში, წამყვანის კითხვაზე ,,პატრიოტი ხართ?” ჯაფარიძე დადებითად პასუხობს, რაც დეტექტორმაც ,,სიმართლედ” შეაფასა.
2018 წლის 28 სექტემბერს ზურაბ ჯაფარიძე ტელეკომპანია ,,იმედის” გადაცემა ,,სიცრუის დეტექტორის” სტუმარი იყო. კითხვაზე არის თუ არა ჯაფარიძე პატრიოტი, პოლიტიკოსი პასუხობს, რომ არის. ჯაფარიძის პასუხის საფუძველზე, სიცრუის დეტექტორის ვერდიქტი იყო ,,სიმართლე”.
დამონტაჟებულ ვიდეოში პატრიოტიზმთან დაკავშირებული კითხვა ამავე გადაცემაში ჯაფარიძის სხვა კითხვაზე გაცემული პასუხითაა დაბოლოებული. ზურაბ ჯაფარიძემ უარყოფითად და თანაც, სიცილით უპასუხა წამყვანის მიერ დასმულ მეხუთე კითხვას: ,,სამსახურებრივ სივრცეში მასტურბაციით დაკავებულხართ?” ჯაფარიძის უარი, ასევე ,,სიმართლით” შეაფასა დეტექტორმა.
გავრცელებული ვიდეოს მხოლოდ ის ეპიზოდია დამონტაჟებული, რომელშიც ჯაფარიძე პატრიოტიზმთან დაკავშირებულ კითხვას პასუხობს. გადაცემაში დანარჩენ კითხვებს პოლიტიკოსმა ისე უპასუხა, როგორც ვიდეოშია ასახული.
ამავე გადაცემაში ზურაბ ჯაფარიძის სტუმრობის დამონტაჟებული ვიდეო აქამდეც გავრცელდა. ასევე, წარსულში ხშირად ვრცელდებოდა პოლიტიკოსთან დაკავშირებული შეცდომაში შემყვანი ცნობები, რაც მის დისკრედიტაციას ისახავდა მიზნად. ვრცლად იხილეთ ,,მითების დეტექტორის” მასალებში:
- ,,არ აგარევინებთ” ჯაფარიძის ,,სიცრუის დეტექტორში” სტუმრობის დამონტაჟებულ ვიდეოს ავრცელებს
- ფოტომანიპულაცია, თითქოს ზურაბ ჯაფარიძის გვარი რეალურად გასიევია
- კანდიდატის სტატუსზე ზურაბ ჯაფარიძის სახელით ყალბი ციტატა ვრცელდება
ადვოკატი ირაკლი ზაქარეიშვილი ფეისბუქზე რეგულარულად ავრცელებს ანტისემიტური, ანტიუკრაინული და ანტიდასავლური შინაარსის დეზინფორმაციას. მის მიერ განთავსებული ყალბი ამბები “მითების დეტექტორს” არაერთხელ გადაუმოწმებია.
ანონიმური ანგარიში ,,შიინ ევროპისკენ” კოორდინირებულად ავრცელებს ჰომოფობიური და ანტიდასავლური შინაარსის ინფორმაციას, მათ შორის, დეზინფორმაციული ხასიათის მტკიცებებსა და გაყალბებულ ფოტო-ვიდეო მასალას.
ფეისბუქ მომხმარებელი Хунда Дзе ,,კონსერვატიული მოძრაობის” მხარდამჭერია. სოციალურ ქსელში ის ტელევიზია ,,ალტ-ინფოს” სიახლეებს მუდმივად აზიარებს, ასევე ხშირად ავრცელებს ანტიდასავლური შინაარსის პოსტებს.
ფეისბუქ გვერდი ,,სიახლენი” 2024 წლის 23 მარტს შეიქმნა და მხოლოდ რამდენიმე პოსტი აქვს გაზიარებული. მათ შორისაა ე.წ. რილსი, რომელსაც თან ახლავს წარწერა ,,კალაძისა და კობახიძის ჩახუტება”. ამავე პერიოდშია შექმნილი იდენტური სახელწოდების იუთუბ არხიც.
არქივის ბმულები: ირაკლი ზაქარეიშვილი, შიინ ევროპისკენ, ,,სიცრუის დეტექტორი”
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
