2023 წლის 1 ივნისს, რუსულენოვანმა გამოცემა mriya.media-მ და ანონიმურმა ფესიბუქ ანგარიშმა Glor Salivan-მა გაავრცელეს გერმანული სატირული ჟურნალის Eulenspiegel-ის გარეკანის ფოტო. ფოტოზე გამოსახულია ნირვანას ალბომის გაშარჟებული ვერსია და მასზე ჩანს თუ როგორ იტაცებს ,,უკრაინული ხელი’’ ფულს. გარეკანს ახლავს წარწერა: ,,უკრაინა აგრძელებს ფულის მოგროვებას თავისი სუიციდისათვის’’. ავტორის მტკიცებით, გარეკანი მოლდოვაში ჩატარებულ ევროპული პოლიტიკური გაერთიანების სამიტს ეხმიანება. აღნიშნული გარეკანი იმავე აღწერით 1-ლ ივნისს ამ მომხმარებელმა თავის ტელეგრამ არხზეც გაავრცელა.
გავრცელებული ჟურნალის გარეკანი გაყალბებულია. აღნიშნული გარეკანი არ ემთხვევა ჟურნალის ივნისის ნომრის ოფიციალურ გამოცემას და მსგავსი ვიზუალის მქონე ნომერი არქივშიც არ იძებნება.
Eulenspiegel სატირული ჟურნალია, რომლის უახლესი ნომერი 2023 წლის 23 მაისით თარიღდება. მასზე გამოსახულია გერმანიის ვიცე-კანცლერი რობერტ ჰაბეკი, რომელიც ახლახან ნეპოტიზმთან დაკავშირებულ სკანდალში გაეხვა. რობერტ ჰაბეკი სკანდალში გაეხვა მას შემდეგ, რაც მას ბრალი დასდეს კრონიზმში, რამაც აიძულა მისი სამინისტროს უმაღლესი თანამდებობის პირი გადამდგარიყო, ამან კი შეარყია მწვანეთა პარტიის ნდობა და კანცლერობაზე მის ამბიციებს წყალი შეუყენა.
ფეისბუქზე გავრცელებულ გარეკნის ფოტოზე მითითებულია, რომ ის 2023 წლის ივნისის ნომერია, თუმცა ჟურნალის ოფიციალურ ვებ-გვერდზე ვხედავთ, რომ ივნისის ნომრის გარეკანი სრულიად განსხვაებულია და მას საერთო არაფერი აქვს აღნიშნულ გარეკანთან. გარდა ყოველთვიური გამოცემებისა, ჟურნალს აქვს სხვადასხვა რუბრიკები, მათ შორის ,,კვირის კარიკატურა’’, თუმცა მსგავსი ფოტო არსად არ გვხვდება.
აღსანიშნავია, რომ პროპაგანდისტული მიზნებისათვის ცნობილი გამოცემების კარიკატურების გაყალბება კრემლის კარგად ნაცადი ტაქტიკაა. ,,მითების დეტექტორმა’’ წარსულში არაერთი გაყალბებული გარეკანი გადაამოწმა, რომლებიც უკრაინის წინააღმდეგ იყო მიმართული. მათ შორის Eulenspiegel-ის გარეკანიც იყო. ვრცლად შეგიძლიათ იხილოთ:
- გერმანული და პოლონური გამოცემების სახელით გაყალბებული გარეკანის ფოტოები ვრცელდება
- როგორ აყალბებს კრემლის პროპაგანდა დასავლური გამოცემების გარეკანებს უკრაინის წინააღმდეგ
წყაროს შესახებ:
ფეისბუქ ანგარიში, რომელმაც გაყალბებული გარეკანი გაავრცელა, გამოირჩევა მსგავსი დამაზიანებელი ხასიათის მცდარი ინფორმაციის აქტიური გავრცელებით. მაგალითად, 15 აპრილს აღნიშნულმა ანგარიშმა გაავრცელა ყოველკვირეული ესპანური სატირული გაზეთის ,,El Jueves’’-ის გაყალბებული გარეკანი, რომელიც უკრაინის წინააღმდეგ იყო მიმართული. აღნიშნული გარეკანის სიმცდარე ფრანგულმა რადიო ,,Radio France Internationale’’-მ დაადგინა. აღნიშნულ ანგარიშზე ვხვდებით სხვა დეზინფორმაციული შინაარსის პოსტებსაც.
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
