5-6 აპრილს რუსულენოვან პროპაგანდისტულ მედიაში ( Ukraina.ru, news-kiev.ru, zmaps.ru), ასევე ფეისბუკის რუსულენოვან ანგარიშებზე (1, 2) უკრაინის პრეზიდენტის, ვოლოდიმირ ზელენსკის, გამოსახულებით ფრანგული ჟურნალის Courrier International-ის გარეკანის ფოტო გამოქვეყნდა. კარიკატურაზე ზელენსკი სააღდგომო კვერცხებს იპარავს და გარბის.
“უკრაინას მეტი სჭირდება” – ვკითხულობთ გარეკანზე.
Courrier International-ის სახელით გავრცელებული კარიკატურა ყალბია. გამოცემის უახლესი ნომერი 6 აპრილს გამოვიდა და მას განსხვავებული დიზაინი აქვს. ზელენსკის გამოსახულებით მსგავსი კარიკატურა გამოცემის არც ძველ ნომრებშია.
გარეკანი გავრცელებული დიზაინით Courrier International – ის არცერთ პლატფორმაზე არ იძებნება. ყოველკვირეული გამოცემის უახლესი ნომერი 6 აპრილს გამოვიდა და მასზე ზუსტად ის სერიული ნომერია (N°1692) დატანილი, რაც გაყალბებულ ვერსიაშია, თუმცა განსხვავებული დიზაინი აქვს. როგორც Courrier International განმარტავს, სარედაქციო არჩევანი ამჯერად ინდოეთზე გაკეთდა, რომელიც ყველაზე ხალხმრავალი და დასავლელი ინვესტორებისთვის მიმზიდველი ადგილი გახდა. გარეკანზე ინდოელი ახალგაზრდები არიან გამოსახული, რაც სიგნალია, რომ ინდოეთი უნდა გარდაიქმნას და ახალგაზრდებს პერსპექტივა შესთავაზოს, მათთვის სამუშაო ადგილები უზრუნველყოს.
აღსანიშნავია, რომ მსგავსი დიზაინის გარეკანი გამოცემის არც ძველ ნომრებში, მათ შორის სპეციალურ გამოშვებებშიც არ გვხვდება.
ცნობილი გამოცემების გარეკანების გაყალბება კრემლის პროპაგანდის ერთ-ერთი გავრცელებული მეთოდია. “მითების დეტექტორმა” რუსეთ-უკრაინის ომის პერიოდში არაერთი გაყალბებული გარეკანი გადაამოწმა, ვრცლად იხილეთ მასალებში:
- NEWSWEEK-ის და FRANC-TIREUR-ის სახელით ვოლოდიმირ ზელენსკის გაყალბებული კარიკატურები ვრცელდება
- როგორ აყალბებს კრემლის პროპაგანდა დასავლური გამოცემების გარეკანებს უკრაინის წინააღმდეგ
- გერმანული და პოლონური გამოცემების სახელით გაყალბებული გარეკანის ფოტოები ვრცელდება
- ზელენსკისა და სუნაკის კარიკატურები ინდურ ჟურნალ ANANDA VIKATAN-ს არ ეკუთვნის
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
