5-6 თებერვალს რუსულენოვანმა ფეისბუქ-ანგარიშმა და ტელეგრამ-არხებმა (1;2;3) გაავრცელეს “დოიჩე ველეს” რუსულენოვანი სტატიის სქრინშოტი, რომელზეც ვკითხულობთ, რომ “იძულებითი მობილიზაცია კიევის მიერ კონტროლირებად რეგიონებში, შესაძლოა, კრემლის სპეცოპერაცია იყოს”. იგივე სქრინშოტი სოციალურ ქსელში 2023 წლის 1 სექტემბერსაც გავრცელდა.
“დოიჩე ველეს” სახელით გავრცელებული სტატიის სქრინშოტი გაყალბებულია. რეალურად, მედიას მსგავსი შინაარსის ინფორმაცია არასოდეს გამოუქვეყნებია.
სქრინშოტი, რომელიც “დოიჩე ველეს” სახელით ვრცელდება, გაყალბებულია. მსგავსი სათაურით სტატია მედიის არც ინგლისურ და არც რუსულენოვან ვებ-საიტებზე არ იძებნება (1;2).
აღსანიშნავია, რომ სტატიის ავტორის ველში მითითებულია ჟურნალისტი ოლესია გალკინა, თუმცა, მსგავსი სახელისა და გვარის ავტორი “დოიჩე ველეს” რუსულენოვან ვებ-საიტზე არ იძებნება.
Deutsche Welle-ს უკრაინაში მობილიზაციასა და მოქალაქეების უკმაყოფილებასთან დაკავშირებით სტატია 2024 წლის 4 იანვარს აქვს გამოქვეყნებული. სტატიაში განხილულია, რომ უკრაინელები სკეპტიკურად უყურებენ იძულებით მობილიზაციას. თუმცა, აღნიშნულ სტატიაში, რომლის ავტორიც ლილია რჟეუცკაიაა, მობილიზაცია “კრემლის სპეცოპერაციასთან” დაკავშირებული არ არის.
გავრცელებული სქრინშოტი ფაქტების გადამმოწმებელმა ორგანიზაცია StopFake-მაც გადაამოწმა. მათი ინფორმაციით, ჟურნალისტ ოლესია გალკინაზე ინფორმაცია ღია წყაროებით არ იძებნება და სახელი და გვარი, სავარაუდოდ, გამოგონილია. მათივე ცნობით, სქრინშოტს პრორუსულად განწყობილი ინტერნეტ მომხმარებლები ყველაზე ადრე 2023 წლის თებერვლიდან ავრცელებდნენ.
უკრაინაში მობილიზაციასთან დაკავშირებით რუსული პროპაგანდისტული წყაროები სისტემატურად ავრცელებენ დეზინფორმაციას. “მითების დეტექტორმა” წარსულში გადაამოწმა არაერთი მტკიცება, რომლებიც უცხოეთში მყოფი უკრაინელების, არასრულწლოვნებისა თუ ხანდაზმულების მობილიზაციას ეხებოდა. ვრცლად წაიკითხეთ მასალებში:
- უცხოეთში მყოფი უკრაინელების მობილიზაციაზე ცნობები გაყალბებულ დოკუმენტზე დაყრდნობით ვრცელდება
- დეზინფორმაცია, თითქოს უკრაინაში ხანდაზმულებისთვის ფრონტზე გასაწვევი ბუკლეტები რიგდება
- რუსი დიპლომატები უკრაინაში არასრულწლოვნების მობილიზაციის შესახებ დეზინფორმაციას ავრცელებენ
- დეზინფორმაცია, თითქოს უკრაინაში ახალწვეულის მამამ კომისარიატის თანამშრომელი მოკლა
რუსული პროპაგანდის ერთ-ერთი მეთოდი სწორედ უცხოური გამოცემების ლოგოების გამოყენებაა, რათა გავრცელებულ ინფორმაციას მეტი დამაჯერებლობა შესძინონ. ამ თემაზე წაიკითხეთ:
როგორ გამოიყენება დასავლური გამოცემების ლოგოები დეზინფორმაციის გასავრცელებლად
წყაროს შესახებ
ფეისბუქ-მომხმარებელი Игорь Олегович Сарапкин ანტიუკრაინული შინაარსის ინფორმაციას სისტემატურად ავრცელებს. მისი პოსტები უცხოელი ფაქტების გადამმოწმებლების მიერ ყალბ ინფორმაციად არის მონიშნული.
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
