განახლება: ინფორმაცია უკრაინაში მებრძოლი ქართველი ქალების ტყვედ ჩავარდნის შესახებ 11 აგვისტოსაც გავრცელდა. ჯგუფში ANTIFA -GE გამოქვეყნებული პოსტის მიხედვით, ქართული ლეგონის წევრი გოგონები, რომლებიც დონეცკში მშვიდობიან მოსახლეობაზე თავდასხმაში მონაწილეობდნენ, ალყაში მოაქციეს და ტყვედ აიყვანეს, საქართველო კი მათ გამოსახსნელად მოლაპარაკებებს აქტიურად აწარმოებს.
7 ივლისს ფეისბუკ-ანგარიშმა Gurami Xafava უკრაინაში მებრძოლი ქართველი ქალების ტყვედ აყვანის შესახებ პოსტი გამოაქვეყნა. პოსტს თან ახლავს რუსული ტელეგრამ-არხის “Я в курсе” სქრინი, რომლშიც ნათქვამია, რომ ქართული ლეგიონის წევრი ქალები, რომლებიც სევეროდონეცკში უკრაინის მხარეს იბრძოდნენ და დონეცკში მშვიდობიან მოსახლეობაზე თავდასხმაში მონაწილეობდნენ, 6 ივლისს ალყაში მოაქციეს და ტყვედ აიყვანეს. ინფორმაციასთან ერთად გავრცელდა ფოტოც, რომელზეც სამხედრო სამოსში ჩაცმული სამი ქალი ჩანს. ტექსტებში ასევე აღნიშნულია, რომ საქართველო ტყვე გოგონების მათთვის გადაცემაზე მოლაპარაკებებს აქტიურად აწარმოებს. იდენტური ინფორმაცია რუსულენოვანმა ფეისბუკ-მომხმარებელმა და ონლაინ გამოცემებმაც გაავრცელეს (1,2,3,4).
ინფორმაცია ქართველი მებრძოლების ტყვედ აყვანის შესახებ დეზინფორმაციაა. გავრცელებული ცნობები უკრაინაში მებრძოლმა ქართველმა სამხედრომ და ფოტოზე გამოსახულმა ერთ-ერთმა მებრძოლმა ქეთი ლეშკაშელმა უარყო. ინფორმაცია ქართველი მებრძოლების ტყვედ აყვანის შესახებ არც უკრაინული მხარის ოფიციალურ წყაროებში იძებნება და არც ქართული ლეგიონის ტვიტერის ან ფეისბუკის ოფიციალურ ანგარიშებზე გავრცელებულა.
ინფორმაციის გადამოწმების მიზნით “მითების დეტექტორი” უკრაინაში მებრძოლ ქართველ სამხედროს ქეთი ლეშკაშელს დაუკავშირდა. ლეშკაშელი ერთ-ერთია იმ სამი სამხედროდან, რომელთა ფოტოც მათი ტყვედ აყვანის შესახებ გამოქვეყნებულ ინფორმაციასთან ერთად გავრცელდა.
ლეშკაშელის თქმით, ეს ინფორმაცია სიმართლეს არ შეესაბამება და მათი დატყვევების შესახებ ყალბი ცნობები ადრეც არაერთხელ გავრცელდა.
ქეთი ლეშკაშელი: “უამრავჯერ გავრცელდა ინფორმაცია, რომ ტყვედ ვიყავით, მაგრამ, რა თქმა უნდა, ეს სრული დეზინფორმაცია იყო და ახლაც – ანალოგიურად. რაც შეეხება გოგოებს, ისინიც უსაფრთხოდ არიან, სანერვიულო არაფერია. უამრავჯერ ჩაგვდეს კუბოში და ამოგვიყვანეს. ესე იგი, რაღაცას კარგად ვაკეთებთ. ასე რომ, ვანერვიულებთ ორკებს.”
ქეთი ლეშკაშელმა “მითების დეტექტორთან” საუბარში აღნიშნა, რომ ის ამჟამად არა ქართული, არამედ საერთაშორისო ლეგიონის წევრია, მასთან ერთად ფოტოზე მყოფი გოგონებიდან ერთ-ერთი ამ ეტაპზე უკრაინაში აღარ იმყოფება, მეორე კი ქართული ლეგიონის წევრია.
აღსანიშნავია, რომ ქართველი გოგონების დატყვევების შესახებ ინფორმაცია რუსულ ტელეგრამ-არხებზე აპრილშიც ვრცელდებოდა, რასაც ქეთი ლეშკაშელი ფეისბუკის პირად ანგარიშზე გამოქვეყნებული პოსტით 12 აპრილს გამოეხმაურა. პოსტში ქართველმა მებრძოლმა აღნიშნა, რომ ისინი არ დაუტყვევებიათ და ბრძოლას ცოცხლები და უვნებლები აგრძელებდნენ.
ინფორმაცია ქართველი მებრძოლების ტყვედ აყვანის შესახებ არც უკრაინული მხარის ოფიციალურ წყაროებში იძებნება და მსგავსი შინაარსის ცნობა არც ქართული ლეგიონის ტვიტერის ან ფეისბუკის ოფიციალურ ანგარიშებზე გამოქვეყნებულა.
აღსანიშნავია, რომ რუსულმა მედიამ უკრაინაში ქართული ლეგიონის წევრების შესახებ ყალბი ინფორმაცია მარტსა და ივნისშიც გაავრცელა.
ვრცლად იხილეთ “მითების დეტექტორის” მასალები:
- ლისიჩანსკთან ქართველი მებრძოლების განადგურების შესახებ მორიგი დეზინფორმაცია ვრცელდება
- კრემლის მედია ქართული ლეგიონის 15 წევრის განადგურების შესახებ ყალბ ინფორმაციას ავრცელებს
- Რუსული მედიების მორიგი დეზინფორმაცია “ქართული ლეგიონის” წევრების განადგურების შესახებ
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
