16 მარტს სოციალურ ქსელში ფეისბუკ გვერდმა Winter Soldier გაავრცელა პოსტი, რომელიც “სოკარ ჯორჯიას” სახელით ინტერნეტ მომხმარებლებს 5000 ლარის მიღებას ჰპირდება. დასპონსორებულ პოსტში აღნიშნულია, რომ საქართველოში ბანკომატებთან დიდი რიგებია, რამდენადაც “Socar energy Georgia” ვალდებულია, საქართველოს თითოეულ მაცხოვრებელს 5000 ლარი გადაუხადოს, რისთვისაც მსურველებმა გამოკითხვაში უნდა მიიღონ მონაწილეობა. პოსტი ტოვებს შთაბეჭდილებას, რომ ეს ინფორმაცია Ambebi.ge-მ გაავრცელა, რამდენადაც ფოტოზე ამ საინფორმაციო სააგენტოს ვიზუალი და ლოგო გვხვდება.
ინფორმაცია, თითქოს “სოკარ ჯორჯია” კითხვარის შევსების საფუძველზე საქართველოს მოქალაქეებს 5000 ლარს გადაუხდის, დეზინფორმაციაა და თაღლითური სქემის ნაწილს წარმოადგენს. კომპანიამ წარსულში არაერთხელ აღნიშნა, რომ “სოკარის” მარკეტინგული აქტივობების შესახებ ინფორმაცია მომხმარებლებს მხოლოდ ოფიციალური წყაროებიდან მიეწოდებათ.
შეთავაზება, რომლის საშუალებითაც “სოკარ ჯორჯია” საქართველოს მოქალაქეებს 5000 ლარს სთავაზობს, კომპანიას არც ერთ პლატფორმაზე არ გაუჟღერებია და არ არსებობს. “სოკარ ჯორჯიამ” ამავე შინაარსის თაღლითური ინფორმაცია წარსულში არაერთხელ უარყო. 2024 წლის 1 თებერვალს გამოქვეყნებულ პოსტში აღნიშნულია, რომ მომხმარებლებს სოკარის მარკეტინგული აქტივობების შესახებ ინფორმაცია მიეწოდებათ ოფიციალური წყაროებიდან (საიტი: http://SGP.GE, ფეისბუკის ოფიციალური გვერდი) და ასევე, ინფორმაციის სიზუსტის გადამოწმება შესაძლებელია ცხელი ხაზის საშუალებით.
სანდოობის შექმნის მიზნით, ფეისბუკზე გავრცელებულ პოსტს თან ახლავს ქართული გამოცემის ambebi.ge-ის ვიზუალი და ლოგო. აღსანიშნავია, რომ “სოკარის” მიერ თანხის გაცემის შესახებ ინფორმაცია ambebi.ge-ის არც ქართულ და არც რუსულენოვან ვერსიაზე არ გვხვდება.
დაფინანსებულ პოსტში მითითებულია საიტის ბმული, სადაც ნათქვამია, რომ “სოკარმა” სახელმწიფოსთან ერთად გახსნა შემოსავლის პლატფორმა, რომელიც ყველასთვის არის ხელმისაწვდომი. შემოსავლების პლატფორმაზე წვდომის მოსაპოვებლად კი მოკლე კითხვარის შევსება არის საჭირო. კითხვარი სულ 4 კითხვისგან შედგება: “თქვენი ოჯახის შემოსავალი 5000 ლარზე მეტია?”; გყავთ თუ არა 18 წლამდე ასაკის ბავშვები?”; “გაქვთ თუ არა იპოთეკური სესხი?”. მომხმარებლებმა ამ კთხვებს “კი” ან “არა” უნდა უპასუხონ, შემდეგ კი მოცემულ ველში სახლი, გვარი და ტელეფონის ნომერი შეიტანონ.
Whois.DomainTools-ის თანახმად, თავად საიტი https://systemaiendeavor.top 2024 წლის 2 თებერვალს შეიქმნა და მისი IP მისამართი კალიფორნიაში მდებარეობს. აღსანიშნავია ისიც, რომ ფეისბუკ გვერდის Winter Soldier ადმინისტრატორის მისამართად აშშ არის მითითებული.
Winter Soldier-ის შესახებ
ფეისბუკ გვერდი Winter Soldier 2017 წლის 16 აპრილს შეიქმნა და მისი თავდაპირველი სახელწოდება “ الاسود يليق بك” იყო. გვერდმა ბოლოს სახელი 2024 წლის 5 მარტს შეიცვალა, ხოლო კატეგორიების ველში Magazine (ჟურნალი) აქვს მითითებული. ფეისბუქ გვერდზე ბოლო პოსტი 2024 წლის 27 თებერვალს პროფილის ფოტოს ცვლილებას უკავშირდება, ხოლო სოკარის შესახებ პოსტი გვერდზე დაფარულია. აღსანიშნავია ისიც, რომ 2021 წლის 17 ივნისის შემდეგ გვერდზე არც ერთი სხვა პოსტი არ გავრცელებულა, ამ პერიოდში გაზიარებული პოსტი კი რესტორნის მენიუს შექმნას შეეხება. ამ ტიპის აქტივობები ტოვებს შთაბედილებას, რომ 2024 წლის თებერვლამდე ეს გვერდი სხვა დანიშნულებით გამოიყენებოდა, ადმინისტრატორისა და გვერდის სახელწოდების ცვლილების შემდეგ კი (რაც საიტის შექმნის თარიღსაც ემთხვევა) თაღლითური საქმიანობა წამოიწყო.
“მითების დეტექტორმა” “სოკარ ჯორჯია გაზის” სახელით გავრცელებული თაღლითური ინფორმაცია წარსულშიც არაერთხელ გადაამოწმა, ვრცლად იხილეთ:
- “სოკარ ჯორჯია გაზისა” და კახა კალაძის სახელით თაღლითური პოსტი ვრცელდება
- “სოკარ ჯორჯია გაზისა” და გიორგი გაბუნიას სახელით თაღლითური პოსტი ვრცელდება
- О КОМПАНИИ SOCAR GEORGIA GAS РАСПРОСТРАНЯЕТСЯ ВИДЕО, КОТОРОЕ СОДЕРЖИТ ПРИЗНАКИ КИБЕР-МОШЕННИЧЕСТВА
- “სოკარ ჯორჯია გაზისა” და სალომე ზურაბიშვილის სახელით მორიგი თაღლითური პოსტი ვრცელდება
მსგავსი თაღლითური სქემა ვრცელდებოდა “ლუკოილის” და ირაკლი ღარიბაშვილის სახელითაც:
პოსტის არქივის ბმული
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
