23 აგვისტოს ფეისბუქ-გვერდმა “აგენტურა” გაავრცელა “მთავარი არხის” დამფუძნებლის ნიკა გვარამიას ფეისბუქ-პოსტის სქრინშოტი, რომლის მიხედვითაც გვარამიამ რუსული კერძო სამხედრო კომპანია „ვაგნერის“ ხელმძღვანელის, ევგენი პრიგოჟინის, ფოტო გამოაქვეყნა წარწერით “R.I.P my friend! bye bye Zhenia” (მშვიდად განისვენე, მეგობარო! მშვიდობით, ჟენია).
ფეისბუქ-პოსტის გავრცელებული სქრინშოთი ყალბია. მსგავსი პოსტი გვარამიას ფეისბუქ-გვერდზე არ იძებნება. პოსტის ნამდვილობა ნიკა გვარამიამ “მითების დეტექტორთან” კომენტარშიც უარყო.
ნიკა გვარამიამ თავის ფეისბუქ-გვერდზე პრიგოჟინის სიკვდილთან დაკავშირებით პოსტი ნამდვილად გამოაქვეყნა, თუმცა ის პოსტში მწუხარებას არ გამოხატავს.
ბოლო 24 საათის განმავლობაში გვარამიას მიერ გამოქვეყნებული სხვა პოსტები კი კიევში უკრაინის დროშის დღის აღნიშვნას უკავშირდება. ნიკა გვარამიამ “მითების დეტექტორთან” კომენტარში თავადაც დაადასტურა, რომ პრიგოჟინის სიკვდილთან დაკავშირებით მწუხარების გამომხატველი პოსტი არ გამოუქვეყნებია.
აგვისტოში ნიკა გვარამიას სახელით კიდევ ერთი განცხადება გააყალბეს, რომელიც რუსეთის მიერ ოკუპირებულ საქართველოს ტერიტორიებს ეხებოდა:
გავრცელებული ინფორმაციით, ვაგნერის დაჯგუფების ხელმძღვანელი ევგენი პრიგოჟინი 23 აგვისტოს ავიაკატასტროფაში დაიღუპა. პრიგოჟინის თვითმფრინავი მოსკოვიდან სანქტ-პეტერბურგის მიმართულებით მიფრინავდა. ბორტზე მთლიანობაში 7 მგზავრი და ეკიპაჟის 3 წევრი იმყოფებოდა. მათ შორის იყო ვაგნერის დაჯგუფების მაღალი რანგის მეთაური, დმიტრი უტკინი. ბორტზე მყოფი ათივე ადამიანი დაიღუპა. ვაგნერის ჯგუფთან დაკავშირებული სოციალური მედიის ანგარიშის თანახმად, ჯგუფი თვითმფრინავის ჩამოგდებაში რუსეთის საჰაერო თავდაცვას ადანაშაულებს.
ვაგნერის დაჯგუფება უკრაინაში აქტიურად იბრძოდა, თუმცა ბოლო თვეების განმავლობაში ჯგუფს რუსეთის სამხედრო ლიდერებთან დაპირისპირება ჰქონდა. 2 თვის წინ, 23-24 ივნისს პრიგოჟინი აჯანყდა და ძალები უკრაინიდან რუსეთში გადაისროლა, ქალაქი დონის როსტოვი აიღო და მოსკოვამდე ჩასვლით იმუქრებოდა. დაპირისპირება შეთანხმებით დასრულდა, პრიგოჟინი ბელორუსში გადასვლას დათანხმდა და ვაგნერის დაჯგუფების წევრებს რუსეთის არმიაში გადასვლის ან ბელორუსში რელოკაციის საშუალება მიეცათ.
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
