6 ოქტომბრიდან რუსული პროპაგანდისტული მედიასაშუალებები kherson-news.ru, en.mriya.news, news-kiev.ru, zp-news.ru და lnr-news.ru უკრაინის პრეზიდენტის, ვოლოდიმირ ზელენსკისა და ილონ მასკის ახალ გრაფიტის ავრცელებენ. სტატიებში ვკითხულობთ, რომ აღნიშნული ფოტო გადაღებულია მიუნხენში, გერმანიაში. გავრცელებულ გამოსახულებაზე ილონ მასკი ფიზიკურად ძალადობს უკრაინის პრეზიდენტზე. გრაფიტიზე შემდეგი წარწერაა: „შეწყვიტე ფულის მოთხოვნა!“
მოცემული ფოტო ფეისბუკის რუსულენოვან ანგარიშებზეც (1, 2) გავრცელდა.
გავრცელებული ფოტო პროგრამულადაა დამუშავებული. მიუნხენში, Heinrich-Lubke str. ისა და Lorenz-Hagen-Weg -ის ქუჩების გადაკვეთაზე მსგავსი გრაფიტი არ გვხვდება. 11 ოქტომბერს, ადგილზე გადამოწმების შედეგად დადასტურდა, რომ ლოკაციაზე ასეთი გრაფიტი დახატული არ არის.
ინტერნეტში გავრცელებულ ფოტოზე Heinrich-Lubke-str. და Lorenz-Hagen-Weg ქუჩების გადაკვეთა ჩანს. ქუჩების დასახელებები საშუალებას გვაძლევს მარტივად მივაკვლიოთ ზუსტ მდებარეობას.
Google Map-ის საშუალებითა და Google Street View-ით აღნიშნული ტერიტორია დავათვალიერეთ.
ფოტოზე ჩანს, რომ გრაფიტი ხიდის ქვეშ, ქუჩების ზუსტ კვეთაზე უნდა მდებარეობდეს.
1. Heinrich-Lubke-str. 2. Lorenz-Hagen-Weg. 3. მოცემული ქუჩების კვეთა. გრაფიტი ამ ტერიტორიაზე უნდა იყოს.
1. Heinrich-Lubke-str. 2. Lorenz-Hagen-Weg 3. ქუჩების აღმნიშვნელი აბრა 4. გრაფიტი ამ კედელზე უნდა იყოს.
Google Street View -ზე აღნიშნული ადგილიდან 2022 წლის იანვარში გადაღებული ფოტო ჩანს, რომელზეც გრაფიტი დახატული არ არის. იმის დასადგენად, არის თუ არა გრაფიტი დახატული ამჟამად, დახმარება მიუნხენში მცხოვრებ ბაქარი ძულიაშვილს ვთხოვეთ. ის ადგილზე 11 ოქტომბერს მივიდა და ფოტო-ვიდეო მასალა მოგვაწოდა, რომელზეც ნათლად ჩანს, რომ ლოკაციაზე აღნიშნული გრაფიტი დახატული არ არის.
1.Heinrich-Lubke-str. 2. Lorenz-Hagen-Weg – ქუჩების გადაკვეთა. მიუნხენი, 11 ოქტომბერი, 2023
ვიდეო: ბაქარი ძულიაშვილი
კრემლის მედიებისა და პრორუსული ანგარიშების მიერ გავრცელებული ზელენსკის მადესკრედიტირებელი ყალბი გრაფიტები “მითების დეტექტორმა”წარსულშიც არაერთხელ გამოავლინა. ვრცლად, იხილეთ მასალები:
- ზელენსკის გაყალბებული გრაფიტის მოგზაურობა პარიზიდან ნიუ-იორკამდე
- ზელენსკის გრაფიტის შესახებ გერმანული გამოცემების ყალბი სტატიები ვრცელდება
ანა ლოლაძე
მითების დეტექტორის ლაბორატორია
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.