2023 წლის 1 მაისს ფეისბუქზე გავრცელდა ვიდეო, რომელიც რომის პაპ ფრანცისკეს ფოტოებს აერთიანებს. ფოტოებზე რომის პაპი ფრანცისკე გაურკვეველ, ერთი შეხედვით საშიშ არსებებთან ერთადაა ასახული. პოსტის ავტორი კომენტარებში აღნიშნავს, რომ ფოტოები “დაცემულებთან შეხვედრას” ასახავს.
გავრცელებული პოსტი ვიდეომანიპულაციური ხასიათისაა. ვიდეოკოლაჟში გამოყენებული ფოტოები რეალობას არ ასახავს და ხელოვნური ინტელექტის მიერაა შექმნილი.
ფოტოები, რომლისგანაც ვიდეოკოლაჟი შედგება, პირველად www.artstation.com-ზე გამოქვეყნდა, რომელიც ხელოვნებისა და დიზაინის საგამოფენო პლატფორმაა.
ფოტოები საიტის ერთ-ერთი მომხმარებლის, Zach Heisman– ის მიერ აპრილში, საკუთარი პორტფოლიოს გრაფაში არის ატვირთული.
აღსანიშნავია, რომ პროფილზე სხვა ხელოვნური ინტელექტით (AI) გენერირებულ ფოტოებსაც ვხვდებით. Zach Heisman-ს პროფილზე მითითებული აქვს, რომ ის AI ხელოვნებას ქმნის და პროგრამა Midjourney-ს იყენებს.
ხელოვნური ინტელექტის საშუალებით გენერირებული ფოტოები, როგორც რეალური ამბის ამსახველი კადრები, წარსულშიც გავრცელებულა. ზოგჯერ ფოტოები დამაზიანებელი მიზნებით სულაც არ იქმნება, ზოგჯერ კი ის დეზინფორმაციის სახეს იღებს. ვრცლად, ამ თემაზე იხილეთ “მითების დეტექტორის” პუბლიკაციები:
- სოციალურ ქსელში ჯო ბაიდენის ხელოვნური ინტელექტის მიერ გენერირებული ფოტო ვრცელდება
- ფეისბუქზე დონალდ ტრამპის ხელოვნური ინტელექტის მიერ გენერირებული ფოტოები ვრცელდება
- მართლმადიდებლური ტაძარი უცხოეთში თუ ხელოვნური ინტელექტის მიერ გენერირებული ფოტო?
- პენსილვანიის სკოლის კლუბის შეხვედრა თუ AI ფოტოები – რას ასახავს კადრები?
წყაროს შესახებ:
ფეისბუქ ანგარიშს – იოანა იოანე ერისთავი, რომელიც რომის პაპის ხელოვნური ინტელექტით გენერირებულ ფოტოებს ავრცელებს, დეზინფორმაცია წარსულშიც გაუვრცელებია. მათ შორის ის ავრცელებდა ცრუ ინფორმაციას ზვიად გამსახურდიას სიტყვების შესახებ, თითქოს საქართველოს პირველმა პრეზიდენტმა აშშ-ის მიერ საქართველოს არასმათავრობო ორგანიზაციების საშუალებით დამორჩილება იწინასწარმეტყველა.
ელენე შონია
მითების დეტექტორის ლაბორატორია
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.