მარტის თვეში რუსულმა მედიებმა Lenta.ru, Известия, Газета.Ru, Московский комсомолец გაავრცელეს ინფორმაცია, რომ ლიეტუვაში ღმერთი რუსეთის მხარდაჭერაში დაადანაშაულეს. სტატიების თანახმად, ლიეტუვის პარლამენტის თავმჯდომარე ვიქტორია ჩმილიტე-ნილსენმა განაცხადა, რომ ღმერთი რუსეთის ხელისუფლების მოქმედებებს იცავს და ეს მიუღებელია.
13 აპრილს იგივე ინფორმაციის შემცველი პოსტი ფეისბუქ-ანგარიშმა ნონა შარაბიძემ გამოაქვეყნა, ხოლო რუსულენოვანმა ფეისბუქ-ანგარიშებმა აღნიშნული ცნობები (1, 2, 3) მარტის ბოლოს გაავრცელეს.
მტკიცება, თითქოს ლიეტუვის სეიმის თავმჯდომარემ განაცხადა, რომ ღმერთი რუსეთის ხელისუფლების მოქმედებებს იცავს, დეზინფორმაციულია. რეალურად, ვიქტორია ჩმილიტე-ნილსენმა განაცხადა, რომ კრემლი საკუთარ იმპერიალისტურს მისწრაფებებს ღმერთის ნებად წარმოაჩენს, რაც მიუღებელია.
2023 წლის 22 მარტს ლიეტუვის სეიმის თავმჯდომარე ვიქტორია ჩმილიტე-ნილსენი კონსტანტინოპოლის პატრიარქს, ბართლომე I-ს შეხვდა. ლიეტუვის სეიმის ოფიციალურ ვებ-გვერდზე გამოქვეყნებული პრეს-რელიზის მიხედვით, ჩმილიტემ ბართლომე I-თან საუბრისას აღნიშნა, რომ ვილნიუსი რელიგიური შემწყნარებლობით ყოველთვის ცნობილი ქალაქი იყო, სადაც სხვადასხვა რელიგიის ადამიანები თანაცხოვრობდნენ. მან ხაზი გაუსვა იმასაც, რომ ვილნიუსში ღვთის სიტყვა სიყვარულით გავრცელდა და არა მახვილით. სეიმის სპიკერმა სწორედ ამ კონტექსტში ახსენა რუსეთის მთავრობაც, რომელიც საკუთარ იმპერიალისტურ ზრახვებს ღმერთის სახელს ამოფარებული ახორციელებს.
ვიქტორია ჩმილიტე-ნილსენი: „ვილნიუსში ღვთის სიტყვა სიყვარულით გავრცელდა და არა მახვილით. ამიტომ, ჩვენთვის, ვილნიუსის მცხოვრებთათვის და ლიეტუვის დიდი სამთავროს შთამომავლებისთვის, აბსოლუტურად მიუღებელია, როცა კრემლის რეჟიმი საკუთარ იმპერიალისტურ მისწრაფებებს ღმერთის ნებად ნიღბავს. მე ვუთხარი უწმინდესს, რომ სწორედ ამ კუთხით ვხედავთ მართლმადიდებელთა პოზიციას ლიეტუვაში“.
ლიეტუვაში ვიზიტისას, ბართლომე I-მა რუსეთის მიერ ჩადენილ ომის დანაშაულებებზე ისაუბრა და ხაზი გაუსვა იმასაც, რომ კრემლი ეკლესიას საკუთარი მიზნების განსახორციელებელ ინსტრუმენტად იყენებს.
ფეისბუქ-მომხმარებელი ნონა შარაბიძე პრორუსული შინაარსის პოსტებსა და დეზინფორმაციას რეგულარულად ავრცელებს. მის მიერ გავრცელებული მცდარი მტკიცებები “მითების დეტექტორმა” აქამდეც არაერთხელ გადაამოწმა. ვრცლად იხილეთ:
- ემსხვერპლა თუ არა პუშკინის ბიუსტის დემონტაჟს ჟიტომირის მცხოვრები?
- ვინ აყენებს ეჭვქვეშ რუსული ავიაციის მიერ საცხოვრებელი კორპუსების დაბომბვას?
- დეზინფორმაცია, თითქოს უკრაინაში შოკოლადი წარწერით “სიკვდილი ალიოშკას” გამოუშვეს
- ვინ არის გამოსახული ფოტოზე – გერმანიის საგარეო საქმეთა მინისტრი თუ რუსი პორნო მოდელი?
არქივის ბმული: ნონა შარაბიძე
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
