11 აპრილს ფეისბუქ-გვერდმა ტერენტი გლდანელი გამოაქვეყნა ვიდეო, რომლის აღწერაშიც ნათქვამია, რომ ვიდეოკადრებში პოლიტიკური მოძრაობა “დროას” დამფუძნებელი ელენე ხოშტარია 1999 წელს მოსკოვის სახელწიფო უნივერსიტეტის ექსკურსიაზე რუსულ სიმღერას “კატიუშას” მღერის.
გავრცელებული ვიდეო მცდარი აღწერით ვრცელდება და მასში ელენე ხოშტარია არ გვხვდება. ვიდეოს ორიგინალი ვერსია 2014 წელს არის გადაღებული და თვითმფრინავის ბორტზე პიატნიცკის სახელობის გუნდის მიერ სიმღერა “კატიუშას” შესრულებას ასახავს.
“ტერენტი გლდანელის” მიერ გამოქვეყნებული ვიდეოს ორიგინალი იუთუბზე 2014 წლიდან ვრცელდება. ვიდეოს აღწერის თანახმად, ის პიატნიცკის სახელობის გუნდის მიერ თვითმფრინავის ბორტზე “კატიუშას” შესრულებას ასახავს.
YouTube-ზე გამოქვეყნებული ვიდეოს აღწერის მიხედვით, რეისი 1742 ქალაქ იუჟნო-სახალინსკში ჩაფრენამდე იძულებული გახდა გაბრუნებულიყო და ხაბაროვსკში დამჯდარიყო. გაფრენის მოლოდინში კი პიატნიცკის სახელობის გუნდმა ბორტზე “კატიუშა” იმღერა. რუსული მედიის, Sakhalin Media-ს მიხედვით, 2014 წლის დეკემბერში პიატნიცკის სახელობის გუნდი სახალინში კულტურის წლის დახურვის ღონისძიებაზე უნდა გაფრენილიყო, თუმცა უამინდობის გამო რეისი ხაბაროვსკში დაყოვნდა და გუნდმა თითქმის 24 საათი აეროპორტში გაატარა, რა დროსაც თვითმფრინავის სხვა მგზავრებს თავისი შესრულებით ართობდა. Sakhalin Media-ს მასალისთვის თანდართულია კიდევ ერთი ვიდეო, რომელიც თვითმფრინავის ბოტზე კიდევ ერთი სიმღერის შესრულების დროს არის გადაღებული.
ორიგინალ ვიდეოზე, რომელიც უკეთესი ხარისხითაა ხელმისაწვდომი, უკეთ ჩანს, რომ “ტერენტი გლადენლის” მიერ გავრცელებულ ვიდეო-მონაკვეთში ელენე ხოშტარია არ არის ასახული. “მითების დეტექტორთან” კომენტარში ხოშტარიამ ვიდეოსთან რაიმე კავშირი თავადაც უარყო.
ელენე ხოშტარიას საერთაშორისო ურთიერთობების სპეციალობით მოსკოვის საერთაშორისო ურთიერთობების სახელმწიფო ინსტიტუტი აქვს დამთავრებული. რაზეც ხელისუფლების წარმომადგენლები და პროსახელისუფლებო აქტორები ხშირად აპელირებენ.
წყაროების შესახებ:
“ტერენტი გლდანელი” პროსახელისუფლებო ანონიმური ფეისბუქ გვერდია. გვერდი დეზინფორმაციისა და დისკრედიტაციის კამპანიებში ხშირად არის ჩართული, მათ შორის ფიგურირებდა 2023 წლის მარტის აქციების საწინააღმდეგო გზავნილებში, ხოლო საქართველოს პარლამენტში ინიცირებულ კანონპროექტს “უცხოური გავლენის გამჭვირვალობის შესახებ” მხარს უჭერდა.
ვრცლად “ტერენტი გლადენლის” მიერ წარსულში გავრცელებული დეზინფორმაციისა და ასევე მარტის მოვლენებსა და დისკრედიტაციის კამპანიის შესახებ, რომელიც ე.წ. “აგენტების კანონის” წინააღმდეგ აქციებს მოყვა, იხილეთ “მითების დეტექტორის” მასალები:
- თქვა თუ არა ზვიად გამსახურდიამ, რომ აშშ საქართველოს არასამთავრობო სექტორის დახმარებით დაიმორჩილებს?
- სახელისუფლებო და კრემლისტური აქტორები “აგენტების კანონის” დასაცავად და საპროტესტო აქციების წინააღმდეგ
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.