19 ოქტომბერს ადვოკატმა ირაკლი ზაქარეიშვილმა გამოაქვეყნა ფოტო, რომელიც, მისი მტკიცებით, ისრაელის მიერ საწოლში ჩაცხრილული ბავშვის ოთახს ასახავს. “ეს არ არის დაბომბვის შედეგი – ურიებმა ლოგინძი ჩაცხრილეს მძინარე ბავშვები!” – დაწერა პოსტის ავტორმა.
ირაკლი ზაქარეიშვილი ფოტომანიპულაციას ავრცელებს. რეალურად, ფოტო ისრაელში, ნირ-ოზში (კიბუცი) არის გადაღებული და ჰამასის თავდასხმის შემდეგ კიბუცში მცხოვრები ბავშვის ოთახს ასახავს.
ირაკლი ზაქარეიშვილის მიერ გამოქვეყნებული ფოტო ისრაელში, სასოფლო-სამეურნეო კომუნა (კიბუცი) ნირ-ოზში 2023 წლის 19 ოქტომბერს არის გადაღებული. ფოტოს ავტორი Associated Press-ის ფოტოგრაფია. როგორც ვებ-საიტზე გამოქვეყნებული ფოტოს აღწერაში ვკითხულობთ, კადრი ჰამასის თავდასხმის შემდეგ ბავშვის ოთახში დაღვრილი სისხლის კვალს ასახავს.
გარდა Associated Press-ისა, ფოტო გამოქვეყნებული აქვს New-York Post-სა და ადგილობრივ მედია Haaretz-ს (არქივის ბმული). იგივე ოთახის კადრი ჩანს CNN-ის მიერ დასახლებაში გადაღებულ მასალაშიც. 
ასევე, ფოტო იძებნება ტელეგრამ-არხზე “The Slaughter 710”, რომლის მიზანიც ჰამასის მიერ ისრაელში 7 ოქტომბერს ჩადენილი დანაშაულების აღრიცხვა და ჩვენებაა.
კიბუცი ნირ-ოზი ერთ-ერთია იმ დასახლებიდან, რომელსაც ჰამასი 7 ოქტომბერს თავს დაესხა. ადგილობრივი მედიის ინფორმაციით, ამ კონკრეტულ კიბუცში დადასტურებულია 38 ადამიანის დაღუპვა, 75 ადგილობრივი კი გაიტაცეს. ჟურნალისტები და ფოტოგრაფები ისრაელის თავდაცვის ძალებმა ადგილზე 19 ოქტომბერს შეუშვა.
ომის დაწყებიდან სოციალურ ქსელში დეზინფორმაცია რეგულარულად ვრცელდება. “მითების დეტექტორმა” ამ თემაზე გავრცელებული არაერთი მცდარი ინფორმაცია გადაამოწმა.
წყაროს შესახებ
ადვოკატი ირაკლი ზაქარეიშვილი ანტიდასავლური, ანტიუკრაინული და ანტიოპოზიციური შინაარსის პოსტებს სისტემატურად აქვეყნებს. 2023 წლის 7 ოქტომბერს დაწყებული ისრაელ-ჰამასის ომის შემდეგ, ის რეგულარულად ავრცელებს დეზინფორმაციას. ზაქარეიშვილის მიერ გავრცელებული მცდარი ინფორმაცია “მითების დეტექტორმა” წარსულშიც არაერთხელ გადაამოწმა.
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
