7 და 8 ნოემბერს ფეისბუკ მომხმარებლებმა Davit Jebashvil-მა და ანი ფეიქრიშვილმა გამოაქვეყნეს ფოტო, რომელზეც ასახულ პირს ხელში გიორგი ვაშაძის მხარდამჭერი პოსტერი უჭირავს. პოსტერზე საქართველოს “რესპუბლიკური პარტიის” ლოგო და წარწერა: “ჩვენ ხმას ვაძლევთ ვაშაძეს” – არის ასახული.
ფოტო ქმნის შთაბეჭდილებას, თითქოს აღნიშნული პირი წარმოადგენს რესპუბლიკურ პარტიას, რომელიც გიორგი ვაშაძეს უჭერს მხარს.
სოციალურ ქსელში გავრცელებული ფოტო პროგრამულადაა დამუშავებული და ის საქართველოში მიმდინარე მოვლენებს არ ასახავს. ფოტო ინტერნეტში 2015 წლიდან იძებნება, ავთენტურ ვერსიაში კი პოსტერზე სლოგანი: Refugees welcome here და ანტირასისტული კამპანიის ჰეშთეგები გვხვდება.
რეალურ ფოტოზე შემდეგი წარწერა “ლტოლვილებს აქ მიესალმებიან” (Refugees welcome here) გვხვდება. პოსტერზე ასევე მითითებულია ვებ-გვერდი standuptoracism.org.uk, ორგანიზაციის “Stand up to racism” ლოგო და ჰეშთეგები: #Antiracismday, #RefugeesWelcome.
standuptoracism.org.uk-ის “ჩვენ შესახებ” განყოფილებაში ნათქვამია, რომ ორგანიზაცია მიზნად ისახავს ანტირასისტულ განწყობებთან დაპირისპირებას, რისთვისაც ევროპელები გერმანიიდან საბერძნეთის ჩათვლით რასიზმის, ისლამოფობიის, ანტისემიტიზმის წინააღმდეგ იბრძვიან. ორგანიზაცია აქციებს, კონფერენციებსა და სხვადასხვა ღონისძიებას წელიწადში რამდენჯერმე მართავს. დიდი ბრიტანეთის სხვადასხვა ქალაქში ჩატარებული მსვლელობების ნახვა Stand up to racism-ის ფეისბუკის გვერდზეც არის შესაძლებელი.
ფოტოს საძიებო ხელსაწყო TinEye–ს მიხედვით, ფოტო ინტერნეტში 2015 წლიდან იძებნება და ყველაზე ადრე, 2015 წლის დეკემბერში არის გამოქვეყნებული.
26 ოქტომბერს სამმა ოპოზიციურმა პარტიამ “დროა“, „სტრატეგია-აღმაშენებელი” და „გირჩი – მეტი თავისუფლება” ერთიანობის კამპანია წამოიწყეს, მათ ერთობლივ განცხადებებს კი როგორც ხელისუფლების წარმომადგენლების, ასევე სხვა ოპოზიციური პარტიების მხრიდან კრიტიკა მოჰყვა. დისკრედიტაციის სამიზნე ამჯერად “სტრატეგია-აღმაშენებელის” ლიდერი, გიორგი ვაშაძე გახდა, რომლის სახელითაც 2022 წლის ნოემბერში ყალბი ციტატაც გავრცელდა.
გაყალბებული ციტატები და ვიდეოფაბრიკაციები გიორგი ვაშაძის შესახებ “მითების დეტექტორს” წარსულშიც გადაუმოწმებია. იხილეთ ჩვენი მასალები:
- რა თქვა რეალურად გიორგი ვაშაძემ სამშობლოსა და ევროპულ ღირებულებებზე?
- “მიხეილ უკრაინოლოგი” გიორგი ვაშაძის “ფარულ კონვერტში” მონაწილეობის ვიდეოფაბრიკაციას ავრცელებს
- გაყალბებულ ციტატას გიორგი ვაშაძის სახელით “პოლიტიკური სატირა” ავრცელებს
- ვინ ავრცელებს გრიგოლ და გიორგი ვაშაძეების ყალბ ციტატას?
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
