სოციალურ ქსელში ჯორჯ სოროსის და ნიკოლ ფაშინიანის ფოტოფაბრიკაცია ვრცელდება

19-21 სექტემბერს ფეისბუქზე ქართულ (1, 2) და რუსულენოვანმა (1, 2) ანგარიშებმა გამოაქვეყნეს ფოტო, სადაც აღბეჭდილია სომხეთის პრემიერ-მინისტრის ნიკოლ ფაშინიანისა და ბიზნესმენი ჯორჯ სოროსის შეხვედრა. პოსტების ავტორები მინიშნებას აკეთებენ იმის შესახებ, რომ სოროსთან ურთიერთობა გახდა სომხეთის მხრიდან ყარაბაღის დაკარგვის წინაპირობა.

გავრცელებულ ფოტოში ფაშინიანის სახე ხელოვნურადაა ჩასმული. ფოტოს ორიგინალ ვერსიაში ასახულია ჯორჯ სოროსისა და ჩრდილოეთ მაკედონიის ყოფილი პრემიერ-მინისტრის ზორან ზაევის შეხვედრა.

ჯორჯ სოროსი და ზორან ზაევი ერთმანეთს 2019 წელს დავოსში მსოფლიო ეკონომიკური ფორუმის ფარგლებში შეხვდნენ. ფოტოს დამუშავებული ვერსია, სადაც ფაშინიანის სახეა ჩასმული, 2020 წელსაც ვრცელდებოდა და ის ქართულმა ფაქტების გადამმოწმებელმა ორგანიზაცია Factcheck-მა გადაამოწმა.

აღსანიშნია, რომ გაყალბებულ ფოტოში ზედაპირული დაკვირვებითაც შეიმჩნევა, რომ ფაშინიანის თავი არაბუნებრივად გამოიყურება და ხელოვნურად არის ჩასმული. 

საინტერესოა, რომ 2022 წელს გაყალბებულ ფოტოზე განცხადება გააკეთა აზერბაიჯანის პრეზიდენტმა ილჰამ ალიევმა. როგორც აღმოჩნდა, მას ფოტო ავთენტური ეგონა, რის გამოც მან ფაშინიანს და სოროსს “ორთავიანი დრაკონი” უწოდა. ამის საპასუხოდ, რამდენიმე აზერბაიჯანულმა მედიამ ალიევი ტყუილში ამხილა (1, 2.). ფოტოს ავთენტურობა აზერბაიჯანულმა ფაქტების გადამმოწმებელმა ორგანიზაცია Fakt Yoxla-მაც გადაამოწმა. როგორც ისინი აღნიშნავენ, ნიკოლ ფაშინიანის გაკეთებული განცხადების მიხედვით, სომხეთის პრემიერ-მინისტრი ჯორჯ სოროსს არასოდეს შეხვედრია. 

აღსანიშნავია, რომ სხვადასხვა პირების ჯორჯ სოროსთან დაკავშირება და მათი ამ გზით დისკრედიტაცია გავრცელებული მეთოდია. ჯორჯ სოროსთან დაკავშირებით გავრცელებულ კონსპირაციის თეორიებსა და დეზინფორმაციაზე “მითების დეტექტორი” ადრეც წერდა:

• მითები ჯორჯ სოროსის შესახებ
• ვინ ავრცელებს კონსპირაციულ ფილმს სოროსზე, ქართველ სნაიპერებზე და ამერიკელ სამხედროზე?
• არასამთავრობოებისა და სოროსის შესახებ 2 დეზინფორმაცია და 2 კონსპირაცია ვრცელდება

წყაროს შესახებ: 

ფეისბუქ ანგარიში “შიინ ევროპისკენ” ანალოგიური სახელის მქონე ორ ანგარიშთან (1, 2.) ერთად აქტიურად ავრცელებს ანტიდასავლური და ჰომოფობიური შინაარსის პოსტებს. ამ ანგარიშების მიერ გავრცელებული ყალბი ინფორმაცია “მითების დეტექტორს” წარსულშიც გადაუმოწმებია.

Არქივი: 1, 2, 3, 4.

სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს.  შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.

იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.