28 სექტემბერს ანტიოპოზიციურმა ფეისბუქ-გვერდმა “პოლიტიკური სამარე N5” გააზიარა “მთავარი არხის” დამფუძნებლის, ნიკა გვარამიას 5-წამიანი ვიდეო, რომელშიც მის სიტყვებს ცენზურა ადევს. “მე ვარ […], შენ ხარ […], ყველანი ვართ […]”- ისმის ვიდეოში, ხოლო პოსტის აღწერაში ვკითხულობთ: “შენ რო **ე ხარ ერთადერთი რამეა რაშიც გეთანხმები ნიკუტ”.
ნიკა გვარამიას ვიდეოდან ნაწყვეტი დარედაქტირებულია და მის ნათქვამზე მცდარ შთაბეჭდილებას ტოვებს. რეალურად, იმ მონაკვეთებში, რომელიც არ ისმის, გვარამია არა უცენზურო სიტყვებს, არამედ “ლაზარეს” ამბობს.
ვიდეო, რომლიდანაც მანიპულაციური სახით გავრცელებული 5-წამიანი მონაკვეთია ამოჭრილი, ნიკა გვარამიამ საკუთარ ოფიციალურ ფეისბუქ-გვერდზე 2023 წლის 26 სექტემბერს გამოაქვეყნა. ვიდეოს აღწერაში ვკითხულობთ: “მე ვარ ლაზარე! შენ ხარ ლაზარე! ყველანი ვართ ლაზარე!”
გვარამია ვიდეოში 2023 წლის მარტში, უცხოური გავლენის აგენტების შესახებ კანონის საწინააღმდეგო აქციებზე დაკავებული 21 წლის ლაზარე გრიგორიადისის საქმეზე საუბრობს. ვიდეო 2.54-წუთიანია და მონაკვეთი, რომელშიც ნიკა გვარამია აღნიშნულ ფრაზას ამბობს, 2:44 წუთიდან იწყება.
ვიდეოში ნიკა გვარამია, რომელიც ლიტვაში იმყოფება, მოქალაქეებს მოუწოდებს, ყველაფერი გააკეთონ 21 წლის ლაზარე გრიგორიადისის გასათავისუფლებლად. მისივე სიტყვებით, საქართველომ უნდა დაამტკიცოს, რომ ევროკავშირის წევრი სახელმწიფოს კანდიდატის სტატუსს იმსახურებს, მათ შორის, ლაზარე გრიგორიადისის გათავისუფლებით.
2023 წლის 25 სექტემბერს ლაზარე გრიგორიადისს მამაზე ძალადობის საქმეზე 1 წლითა და 6 თვით თავისუფლების აღკვეთა მიუსაჯეს. მოსამართლემ ის დამნაშავედ ცნო მამის მანქანის დაზიანებაშიც, რისთვისაც 3 000 ლარიანი ჯარიმა განუსაზღვრა. რაც შეეხება მარტის საქციებს, პროკურატურა ლაზარე გრიგორიადისს სამართალდამცავებისთვის ე.წ. მოლოტოვის კოქტეილის სროლასა და შსს-ს კუთვნილი ავტომობილისთვის ცეცხლის წაკიდებას ედავება.
“პოლიტიკური სამარე N5” პოსტის არქივი
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.