16 ოქტომბერს ფეისბუქ-მომხმარებელმა მამუკა ქარჩხაძემ გამოაქვეყნა სქრინშოტი, რომელიც ფრანგულ გამოცემა LA MONTAGNE-ს ფრანგულენოვან სტატიას ასახავს. სათაურის მიხედვით, ქვეყანაში საწოლის ბაღლინჯოების გავრცელება რუსეთის წინააღმდეგ დაწესებულ სანქციებს უკავშირდება.
ფრანგული მედიის სტატიის სქრინშოტი ვრცელდება რუსულენობან ვებ-საიტებზე, ფეისბუქ-ჯგუფებში, ანგარიშებსა და ტელეგრამ-არხებზე (1;2;3;4;5;6;7;8).
დეზინფორმაციულია მტკიცება, რომ LA MONTAGNE საფრანგეთში მწერების გავრცელებას რუსეთის წინააღმდეგ დაწესებულ სანქციებს უკავშირებს. რეალურად, გამოცემის სახელით გავრცელებული სქრინშოტი გაყალბებულია – ინფორმაციას ამის შესახებ უცხოელ ფაქტების გადამმოწმებლებთან ადასტურებს მედიის წარმომადგენელიც.
დეზინფორმაციის ავტორთა ნაწილი, რომელსაც წყაროდ ფრანგული მედიის სტატია მოჰყავს, ამტკიცებს, რომ რუსეთ-უკრაინის ომის დაწყების შემდეგ რუსეთისთვის დაწესებული ეკონომიკური სანქციების გამო საფრანგეთში შეწყდა პესტიციდების შემადგენლობაში შემავალი იმ რუსული კომპონენტის იმპორტი, რომელიც ეფექტური იყო საწოლის ბაღლინჯოებთან ბრძოლაში და რომლის ჩანაცვლებაც შეუძლებელი აღმოჩნდა. რეალურად, სტატია, რომელშიც ფრანგული გამოცემა LA MONTAGNE ქვეყანაში საწოლის ბაღლინჯოების გავრცელებას რუსეთის წინააღმდეგ სანქციების დაწესებას უკავშირებს, მედიის ოფიციალურ ვებ-საიტზე არ იძებნება. სტატია ასევე არ იძებნება არცერთი სანდო საერთაშორისო წყაროთი.
ინფორმაცია, რომ სქრინშოტი გაყალბებულია, გაავრცელეს ფრანგმა ფაქტების გადამმოწმებლებმაც. მათთან საუბარში LA MONTAGNE-ს წარმომადგენელმა უარყო, რომ მათ ვებ-საიტზე მსგავსი სათაურით მასალა გამოქვეყნდა და აღნიშნა, რომ სქრინშოტზე გამოყენებული შრიფტი მათი შრიფტისგან განსხვავდება.
საწოლის ბაღლინჯოების შემოსევასთან დაკავშირებით პოლიტიკური შინაარსის დეზინფორმაცია ოქტომბრის დასაწყისში საფრანგეთის სხვა გამოცემების სახელითაც გავრცელდა. მაგალითად, რუსულენოვან ტელეგრამ-არხზე გვხვდება გამოცემა Libération-ის სახელით გავრცელებული სქრინშოტები. Украина.ру აქვეყნებს ყალბ სქრინშოტს, რომლის მიხედვითაც, Libération-ი წერს, თითქოს პარაზიტოლოგები დარწმუნებული არიან, რომ საფრანგეთში მავნე მწერების რაოდენობის ზრდა ქვეყანაში უკრაინელი ლტოლვილების შესვლით არის გამოწვეული. “პარიზი პარაზიტებმა დაიპყრეს. ყველაფერი ეს იმ მიზეზით ხდება, რომ უკრაინელმა ლტოლვილებმა თავიანთი ნივთებით ჩამოიყვანეს პარაზიტები, რომლებსაც ფრანგული კლიმატი ძალიან მოეწონათ. ექსპერტები ფიქრობენ, რომ საწოლის ბაღლინჯოების ეპიდემიის მთავარი ტალღა ჯერ კიდევ წინ არის”, – წერენ რუსულენოვანი ტელეგრამ არხები და წყაროდ ფრანგული გამოცემა მოჰყავთ. ისევე, როგორც LA MONTAGNES-სტატია, აღნიშნული სტატიაც არ იძებნება Libération-ის ვებ-საიტზე. ნაცვლად ამისა, გვხვდება დეზინფორმაციაზე Libération-ის პასუხი – ,,არა, Libération-ს საწოლის ბაღლინჯოების გავრცელებაში უკრაინელი ლტოლვილები არ დაუდანაშაულებია”.
წყაროების შესახებ:
ფეისბუქ-მომხმარებელი მამუკა ქარჩხაძე ყალბ ინფორმაციასა და ანტიდასავლურ პოსტებს აქვეყნებს. მის მიერ გავრცელებული პოსტების ნაწილი ქართველი და უცხოელი ფაქტების გადამმოწმებლების მიერ ყალბ ინფორმაციად არის მონიშნული.
ფეისბუქ-მომხმარებელი Ana Shimanskaya ფოტოფაბრიკაციებს, ანტიდასავლურ დ ანტიუკრაინულ პოსტებს ავრცელებს. მის მიერ გამოქვეყნებული პოსტების ნაწილი ფაქტების გადამმოწმებლების მიერ ყალბ ინფორმაციად არის მონიშნული.
მოამზადა ბექა ავგროზაშვილმა
მითების დეტექტორის ლაბორატორია
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
