ფეისბუქ-ანგარიში “ნაც ნობი” 7 თებერვალს გამოქვეყნებულ პოსტში წერდა, რომ ამერიკის შტატებში, ტეხასისა და ნიუჰემფშირის სასამართლოს გადაწყვეტილებით, ,,ქიმტრეილებს” (chemtrails) მათ საჰაერო სივრცეში ფრენა აეკრძალათ, რაც ხალხის მოთხოვნა იყო. აკრძალვის საფუძველზე პოსტის ავტორი ასკვნის, რომ სწორედ ,,ქიმტრეილებით” ავრცელებდნენ დაავადებებსა და შხამს.
“ქიმტრეილების” შესახებ გავრცელებული ინფორმაცია სიმართლეს არ შეესაბამება. სასამართლო გადაწყვეტილება, რომელიც აშშ-ის შტატების საჰაერო სივრცეში ,,ქიმტრეილებს” კრძალავს, არ არსებობს. ,,ქიმტრეილი” კი სინამდვილეში კონტრეილია (condencation trail), რომელსაც დაავადებების გავრცელებასთან კავშირი არ აქვს.
19 დეკემბერს ნიუ ჰემფშირის წარმომადგენელთა პალატაში ,,სუფთა ატმოსფეროს კონსერვაციის შესახებ” ახალი კანონპროექტი დაარეგისტრირეს, მისი მიზანი გარემოს დაბინძურების შემცირება იყო. N 1700 კანონპროექტმა დამაბინძურებლის ემისიებისგან განზრახ გათავისუფლება და ღრუბლების დათესვა უნდა აკრძალოს, ასევე აკონტროლოს ელექტრომაგნიტური რადიოსიხშირე, მიკროტალღური გამოსხივება და გამონაბოლქვი. კანონპროექტი მიმართულია ნებისმიერი სუბიექტის ან ფიზიკური პირის წინააღმდეგ, ვინც ,,სახიფათო ატმოსფერულ საქმიანობას ეწევა, იყენებს არაიდენტიფიცირებულ ან ამოუცნობ თვითმფრინავს ან სხვა საჰაერო სატრანსპორტო საშუალებას”, ასევე მათ, ვინც ჩართულია ამინდის მოდიფიკაციასა და ღრუბლების დათესვაში. კანონპროექტი ჩამოთვლილი დარღვევებისთვის ადამიანის დაჯარიმებას ითვალისწინებს.
კანონპროექტის ბოლო განხილვა 8 თებერვალს იყო და ნიუ ჰემფშირის კანონმდებელთა პალატამ ის ,,საკანონმდებლოდ მიზანშეუწონლად” (inexpedient to legislate) გამოაცხადა.
კანონპროექტში ,,ქიმტრეილი” ნახსენები საერთოდ არ იყო. ,,ქიმტრეილი” კი სინამდვილეში კონტრეილია (condencation trail). ის არის ხაზის ფორმის ღრუბელი, რომელიც თვითმფრინავის გამონაბოლქვის შედეგად ჰაერის კონდენსაციით მიიღება. კონტრეილი წყლისგან შედგება, რომელსაც ყინულის მცირე კრისტალების ფორმა აქვს და ჯანმრთელობისთვის საზიანო არ არის. ის, თუ რამდენი ხანი იქნება შესაძლებელი კონტრეილის ცაზე დანახვა, დამოკიდებულია ტემპერატურასა და თვითმფრინავის ფრენის სიმაღლეზე არსებულ ტენიანობის დონეზე.
,,ქიმტრეილების” აკრძალვის მოთხოვნით კი ტეხასელებმა შექმნეს პეტიცია, სახელად ,,შეწყვტიტეთ ჩვენი ოჯახების მოწამვლა”, ხოლო კანონი, რომელიც ,,ქიმტრეილების” მათ საჰაერო სივრცეში ,,ფრენას” კრძალავს, არ არსებობს.
ე.წ. ქიმტრეილებთან და მათი საშუალებით დაავადებების გავრცელებასთან დაკავშირებით სხვადასხვა კონსპირაციული მტკიცება ხშირად ვრცელდება, რაც ,,მითების დეტექტორმა” წარსულშიც არაერთხელ გადაამოწმა.
- საიდუმლო აგენტის ჩვენება თუ მხატვრული ფილმი? – რას ასახავს ვიდეო, რომელსაც შეთქმულების თეორიების გასავრცელებლად იყენებენ
- ქიმტრეილები და 9/11-ის კონსპირაციის თეორიაზე რუსული არხის – ТВ3-ის სიუჟეტი ვრცელდება
- იფრქვევა თუ არა კორონავირუსი თვითმფრინავის გამონაბოლქვიდან?
წყაროს შესახებ:
ფეისბუქ მომხმარებელი “ნაც ნობი” იგივე “ფანტინა” ხშირად ავრცელებს მანიპულაციურ თუ დეზინფორმაციულ ცნობებს, ავითარებს კონსპირაციის თეორიებს, რაც ,,მითების დეტექტორს” წარსულშიც გადაუმოწმებია.
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.