28 ოქტომბერს ფეისბუქ ანგარიშებმა “ნაცნობი უფნობი” და “ნიკოლოზ კობერიძე” გაავრცელეს ინფორმაცია, რომლის მიხედვითაც უკრაინაში მართლმადიდებლობის აკრძალვის შემდეგ საკუთარი მრწამსის დასაცავად ასიათასობით უკრაინელი გამოვიდა და პოჩაევის ლავრისკენ მსვლელობა მოაწყვეს. პოსტებს თან ახლავს ვიდეო, რომელშიც ჩანს, რომ ადამიანები ხატებით და ჯვრებით მიემართებიან.
მტკიცება იმის შესახებ, რომ ვიდეოში ნაჩვენები მსვლელობა მართლმადიდებლობის აკრძალვის გამო საპროტესტო ხასიათს ატარებს, დეზინფორმაციულია და ვიდემანიპულაციას შეიცავს. უკრაინის პარლამენტს მართლმადიდებლობა არ აუკრძალავს, ხოლო კადრები უკრაინაში ყოველწლიურ მსვლელობას ასახავს, რომლის დროსაც მართლმადიდებელი ქრისტიანები ხმელნიცკის რეგიონიდან პოჩაივ ლავრის მიმართულებით ჯვარს და ხატებს მიაბრძანებენ.
ფეისბუქზე გავრცელებული კადრები 2023 წლის აგვისტოშია გადაღებული. ვიდეო 19-26 აგვისტოს კამიანეც-პოდილსკიდან, რომელიც ხმელნიცკის რეგიონში მდებარეობს, წმინდა მიძინების პოჩაივის ლავრას მიმართულებით უკრაინელი მართლმადიდებლების მსვლელობას ასახავს. აღნიშნული რელიგიური ცერემონია უკრაინაში დაახლოებით 200 წელია ყოველწლიურად აგვისტოში ტარდება. რელიგიური მსვლელობა 26 აგვისტოს პოჩაივის ლავრაში ჩასვლით დასრულდა, რომელშიც 10 000-მდე მომლოცველმა მიიღო მონაწილეობა. ამ მოვლენის ამსახველი კადრები სოციალურ ქსელებშიც გავრცელდა (1, 2, 3.).
კადრი ფეისბუქზე გავრცელებული ვიდეოდან | კადრი აგვისტოში გავრცელებული ვიდეოდან |
უკრაინის რადას მიერ 19 ოქტომბერს პირველი მოსმენით დამტკიცებული კანონპროექტის წინააღმდეგ გამართული მასობრივი საპროტესტო აქციების შესახებ ინფორმაცია მედიასა და ოფიციალურ უწყებებში ამ დრომდე არ გავრცელებულა.
კანონპროექტი, რომელიც უკრაინის რადამ პირველი მოსმენით დაამტკიცა, შესაძლებელს ხდის არა მართლმადიდებლობის აკრძალვას, არამედ ისეთი რელიგიური ორგანიზაციების აკრძალვას, რომელთა მართვის ცენტრი აგრესორ ქვეყანაში მდებარეობს. კანონი, დიდი ალბათობით შეეხება მოსკოვის საპატრიარქოს უკრაინის მართლმადიდებელ ეკლესიას, რომელიც უკრაინაში ერთადერთი მართლმადიდებელი ეკლესია არ არის. რადაში ასეე აღნიშნავენ, რომ კანონპროექტის სრული სახე არაა ჩამოყალიბებული და მის საბოლოოდ დამტკიცებამდე, მოქალაქეთა აღმსარებლობის თავისუფლების კონსტიტუციური უფლებების გათვალისწინებული იქნება.
აღნიშნულ თემაზე “მითების დეტექტორი” ადრეც წერდა. ვრცლად იხილეთ სტატიაში:
წყაროს შესახებ:
ფეისბუქ-ანგარიში ნაცნობი უფნობი იგივე “ფანტინა”, მის სხვა ანგარიშებთან (1,2,3) ერთად, მცდარ ინფორმაციასა და კონსპირაციული შინაარსის პოსტებს მუდმივად აქვეყნებს. “მითების დეტექტორმა” ფეისბუქ მომხმარებლის მიერ სხვადასხვა ანგარიშით გავრცელებული ყალბი ინფორმაცია მრავალჯერ გადაამოწმა.
ფეისბუქ ანგარიში “ნიკოლოზ (ნიკა) კობერიძე” შეთქმულების თეორიებსა და დეზინფორმაციებს ხშირად ავრცელებს. მის მიერ გავრცელებული ინფორმაცია “მითების დეტექტორმა” წარსულშიც არაერთხელ გადაამოწმა.
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.