21 აპრილს რუსულენოვან ტელეგრამ-არხებზე გავრცელდა მუქარა, რომ თბილისში მდებარე რამდენიმე სკოლა დანაღმული იყო. მესიჯების ავტორი მასობრივი მკვლელობით იმუქრებოდა და ტელეგრამ-არხზე, რომელიც მალევე წაიშალა, იარაღების ფოტოებს ტვირთავდა.
“მითების დეტექტორმა” ძიების ხელსაწყოების დახმარებით გადაამოწმა ფოტოები, რომლებიც მუქარასთან ერთად გავრცელდა. ერთ-ერთ ასეთ ფოტოზე სახის იდენტიფიცირება არის შესაძლებელი. ძიების ხელსაწყოს, PimEyes-ის საშუალებით მიღებული შედეგებით დგინდება, რომ ფოტოს, რომელზეც პირს ხელში დანა უჭირავს, მკვლელობის მუქარასთან ერთად წარსულშიც ავრცელებდნენ.
სახის PimEyes-ით ძებნით ვიღებთ 2 მისამართს, სადაც აღნიშნული პირის ფოტოა გამოქვეყნებული. ერთ-ერთი მათგანი soundcloud-ის ანგარიშია, რომელზეც პიროვნების შესახებ დამატებითი ინფორმაცია შევსებული არ არის. მეორე ბმულს ფაქტების გადამოწმების რუსულ ვებ-გვერდზე, Lapsha Media-ზე გადავყავართ. სტატია 2022 წლის 12 დეკემბერს არის დაწერილი. სტატიის მიხედვით, ტერორისტული თავდასხმით რუსეთში მდებარე ქალაქ სალეხანის ერთ-ერთ სკოლას ემუქრებოდნენ და ტელეგრამ-არხზე ავრცელებდნენ იმავე ფოტოს, რომელიც თბილისის სკოლებთან დაკავშირებით 21 აპრილს გავრცელდა. თავდასხმაზე გავრცელებული ინფორმაცია პროკურატურამ და პოლიციამ უარყო. მათი ცნობით, მსგავსი მუქარა რუსეთის ფედერაციის სხვა რეგიონებშიც დაფიქსირდა.
ასევე, ერთ-ერთი ფოტო, რომელზეც იარაღია ასახული ტელეგრამ-არხებზე წარსულშიც გავრცელდა. ტელეგრამ არხები, 2024 წლის 19 აპრილს ყაზახეთში, ასტანაში მდებარე სკოლებზე თავდასხმით იმუქრებოდნენ. როგორც ყაზახურ მედიაში ვკითხულობთ, პოლიციამ გამოძიება ჩაატარა და დაასკვნა, რომ მუქარა სიმართლეს არ შეესაბამებოდა. აღსანიშნავია, რომ ტექსტი, რომელიც ფოტოს ერთვის, 21 აპრილს გავრცელებული მუქარის იდენტურია.
Yandex Image Search-ით ძიების შედეგად შეგვიძლია ვნახოთ, რომ იარაღის იდენტური ფოტოები ასევე არის გამოქვეყნებული რუსულენოვან ვებ-საიტზე, სტატიაში, რომელშიც ვკითხულობთ, რომ ტერორისტული თავდასხმით ემუქრებოდნენ რუსეთში მდებარე ქალაქ სამარას სკოლებსაც. სქრინშოტის მიხედვით, ტელეგრამ-არზე წერდნენ, რომ თავდასხმა 2024 წლის 18 იანვარს უნდა მომხდარიყო.
იდენტური ფოტოები ასევე გამოიყენეს 2024 წლის მარტში, როდესაც აზერბაიჯანში, ბაქოში მდებარე სკოლებსა და სავაჭრო ცენტრებზე თავდასხმითა და მცირეწლოვნების მკვლელობით იმუქრებოდნენ.
გარდა ამისა, სხვა იარაღების ფოტოები, რომლებიც ტელეგრამ-არხზე გავრცელდა, წარსულში სხვადასხვა რუსულენოვან ვებ-საიტზე არის გამოქვეყნებული. მაგალითად, ერთ-ერთი ფოტო, რომელზეც “კოლტის” რევოლვერს ვხედავთ, Yandex-ის ფოტოს საძიებო სისტემით არაერთ ვებ-საიტზე იძებნება (1;2;3).
Yandex Image Search-ის გამოყენებით ასევე შესაძლებელია ტელეგრამ-არხზე გავრცელებული ავტომატის ფოტოს მოძებნა. ისევე, როგორც წინა შემთხვევაში, აღნიშნული ფოტო რუსულენოვან ვებ-საიტებსა და ტელეგრამ-არხებზე გვხვდება (1;2;3).
ტელეგრამ-არხებზე გავრცელებულ მუქარასთან დაკავშირებით 22 აპრილს განცხადება გამოაქვეყნა სახელმწიფო უსაფრთხოების სამსახურმა. სუს-ის ცნობით, კონტრტერორისტული დანაყოფები ოპერატიულ-საგამოძიებო მოქმედებებს მთელი ღამის განმავლობაში ატარებდნენ, თუმცა, რაიმე სახის ასაფეთქებელი ნივთიერება ან მოწყობილობა არ აღმოუჩენიათ.
