9 მაისს ფეისბუქ-ანგარიშმა გამოაქვეყნა რუსულენოვანი ვიდეო, რომელშიც სოსო პავლიაშვილი თიბისი ბანკის მიერ გახსნილ ახალ საინვესტიციო პლატფორმაზე საუბრობს. ვიდეოს თანახმად, ქვეყანაში არასტაბილური სიტუაციის ფონზე, ბანკი მოსახლეობას ფულის გამომუშავების საშუალებას აძლევს, ამისთვის კი ბმულზე გადასვლა და რეგისტრაციაა საჭირო, რის შემდეგაც მათ მენეჯერი დაუკავშირდებათ.
გავრცელებულ ვიდეოზე დართული აუდიო გაყალბებულია და მას დიფფეიკ ტექნოლოგით დამუშავების კვალი ეტყობა. ვიდეოს ორიგინალ ვერსიაში პავლიაშვილი ცოლს დაბადების დღეს ულოცავს. TBC-ს ახალი საინვესტიციო პლატფორმა არ აქვს, ვიდეო კი თაღლითობის ნიშნებს შეიცავს.
ვიდეოს ორიგინალი ვერსია 2020 წლის 5 სექტემბერს ინსტაგრამზე სოსო პავლიაშვილის ცოლმა გამოაქვეყნა, ვიდეოში პავლიაშვილი მეუღლეს დაბადების დღეს ულოცავს და სიმღერას უძღვნის.
ორიგინალ ვიდეოში პავლიაშვილი რაიმე სახის საინვესტიციო პლატფორმაზე არ საუბრობს. მსგავსი ახალი საინვესტიციო პლატფორმის შესახებ ინფორმაცია არ იძებნება არც თიბისი ბანკის ოფიციალურ ფეისბუქ-გვერდზე და საიტზე.
ფეისბუქზე გავრცელებულ ვიდეოზე ხმა არის გადადებული და პავლიაშვილის პირის მოძრაობა ისეა შეცვლილი, რომ გადადებული აუდიო ჩანაწერის ტექსტს შეესაბამებოდეს, სწორედ ეს მიანიშნებს, რომ ვიდეო დიფფეიკ ტექნოლოგიის გამოყენებით არის დამუშავებული.
იქიდან გამომდინარე, რომ გავრცელებული ვიდეო ადამიანებს არარსებულ საინვესტიციო პლატფორმაზე დარეგისტრირებისკენ მოუწოდებს, ის თაღლითობის ნიშნებს შეიცავს. თუმცა ვიდეოში ნახსენები სარეგისტრაციო ბმული პოსტში მითითებული არ არის.
აღსანიშნავია, რომ სხვადასხვა კომპანიის სახელით გავრცელებულ თაღლითურ პოსტებზე “მითების დეტექტორი” წარსულშიც წერდა. მსგავსი ტიპის თაღლითური სქემების შესახებ ინფორმაცია შეგიძლიათ იხილოთ მოცემულ გვერდზე.
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
