სოციალურ ქსელში სომხეთისა და მოლდოვის პოლიტიკური ლიდერების ინიციატივით შექმნილი საინვესტიციო პლატფორმების შესახებ ინფორმაცია ვრცელდება. ფეისბუქ გვერდი Luxura-ს ნიკოლ ფაშინიანის გამოსახულებით გამოქვეყნებულ პოსტში ვკითხულობთ, რომ მომხმარებელს 4 თვის განმავლობაში სხვადასხვა რაოდენობის თანხის გამომუშავება შეუძლია. პოსტში გამოყენებულია AmeriaBank-ის ლოგო. ფეისბუქ გვერდი Blitana-ს მიერ გამოქვეყნებულ ვიდეოში კი ნათქვამია, რომ მაია სანდუმ პარლამენტთან ერთად მიიღო გადაწყვწტილება, რომ მოლდოვის ყველა მოქალაქისთვის საინვესტიციო პლატფორმა გახსნას, სადაც ფულის გამომუშავება ყველას შეეძლება. ვიდეოსთან ერთად მითითებულ ბმულზე მოლდოვური ბანკის Moldova Agroindbank-ის ლოგოებია გამოქვეყნებული.
ინფორმაცია, თითქოს ნიკოლ ფაშინიანის ან მაია სანდუს ინიციატივით AmeriaBank-მა და Moldova Agroindbank-მა საინვესტიციო პლატფორმები გახსნეს, ყალბია. ორივე კომპანიამ სხვადასხვა დროს აღნიშნეს, რომ ამ ტიპის პოსტებითა და პლატფორმებით კომპანიების სახელით თაღლითობას ცდილობდნენ.
Ameriabank-ის ოფიციალურ ფეისბუქ გვერდზე 19 მაისს გამოქვეყნებული განცხადების მიხედვით, ბანკის სახელით ონლაინ თაღლითობების შესახებ ინფორმაცია ვრცელდებოდა.
ბანკი მომხმარებლებს სიფრთხილისკენ მოუწოდებდა.
განცხადებაში გამოყენებული მაგალითებიდან ერთ-ერთი ფეისბუქ გვერდი Luxura-ს მიერ გავრცელებულიი პოსტის მსგავსად მომხმარებელს თვეების მიხედვით მზარდ შემოსავალს პირდებოდა.
Ameriabank-ის სახელით გავრცელებულ თაღლითურ პოსტზე მითითებულ ბმულს მომხმარებელი ვებ-საიტზე wnewstime.com გადაჰყავს.
ვებსაიტზე რუსული საინვესტიციო კომპანია Территория Инвестирования-ს ლოგო და კრიზისის დროს ინვესტირების შესახებ ინფორმაციაა გამოქვეყნებული. საიტზე მომხმარებლის სარეგისტრაციო ბმული არ გვხვდება, თუმცა საიტის არცერთი სხვა ნაწილი, მათ შორის “ჩვენ შესახებ” განყოფილება, არ იხსნება.
აღსანიშნავია, რომ ვებ-საიტი 2022 წლის 23 აგვისტოს დარეგისტრირდა. ხოლო Территория Инвестирования-ს ოფიციალური ვებ-საიტი tinvest.org 2014 წლის 24 სექტემბერსაა დარეგისტრირებული.
რაც შეეხება ვებ-საიტს candleglow.space, რომელიც მაია სანდუს ვიდეოზეა მიბმული, მასზე გადასვლისას მომხმარებელმა რვაკითხვიანი კითხვარი უნდა შეავსოს, რის შემდეგაც საიტზე რეგისტრაციას ტელეფონის ნომრით გადის. საიტზე მოლდოვური ბანკის Moldova Agroibank (Maib) ლოგოებია გამოყენებული.
Maib-ის სახელით გავრცელებული თაღლითური შინაარსის პოსტის შესახებ “მითების დეტექტორი” ადრეც წერდა. თუმცა იმ შემთხვევაში პოსტს კომპანია სოკარის ყალბი საინვესტიციო პლატფორმის ბმული ჰქონდა მიბმული. პრინციპი ორივე შემთხვევაში იდენტურია – მომხმარებელმა საიტზე მოცემულ შეკითხვებს უნდა უპასუხოს და რეგისტრაცია გაიაროს. სოკარის სახელით გავრცელებული სხვა თაღლითობის შესახებ ვრცლად იხილეთ:
ფეისბუქ გვერდების შესახებ
ფეისბუქ გვერდი Blitana, რომელმაც მაია სანდუა შესახებ თაღლითური შინაარსის პოსტი გაავრცელა, 2022 წლის 8 ივლისს შეიქმნა.
გვერდის აღწერაში მითითებულია, რომ ის ჯანმრთელობისა და სილამაზის თემატიკებს ფარავს. გვერდის შესახებ მოკლე ინფორმაციაში პორტუგალიურ ენაზე წერია, რომ Detox Fitness მსოფლიოს წამყვანი ტექნოლოგიაა, რომელიც წონის კლებას მხარს უჭერს.
გვერდის საკონტაქტო ინფორმაციაში მეილის შემდეგი მისამართია მითითებული: [email protected]
გვერდმა სახელი ორჯერ შეიცვალა და Warm Winter Sunshine-ს ნაცვლად Blitana 2023 წლის 6 აპრილს დაირქვა. გვერდს 5 ადმინისტრატორი უკრაინიდან და ვიეტნამიდან მართავს.
გვერდზე გამოქვეყნებულ გარეკანისა და პროფილის ფოტოებზე კრიპტოვალუტის რეალური კომპანიის Binance–ს სახელწოდებასა და ლოგოს ვხედავთ.
თუმცა Binance-ს ოფიციალურ ფეისბუქ გვერდზე 1 000 000-ზე მეტი მოწონება აქვს მაშინ, როცა Blitana-ს ხუთი.
რაც შეეხება ფეისბუქ გვერდს Luxura-ს, გვერდის შესახებ ინფორმაციაში მითითებულია, რომ ის წიგნის მაღაზიას წარმოადგენს. გვერდი 2022 წლის 1 მაისს Elhr3-ის სახელით შეიქმნა, ხოლო 2023 წლის 20 აპრილს სახელი Luxura-დ გადაირქვა. გვერდს 4 ადმინისტრატორი ჰყავს, მათ შორის 3 უკრაინიდან და 1 ინდონეზიიდან.
გვერდის რეკლამების ბიბლიოთეკაში ამჟამად სამი პოსტია ხელმისაწვდომი. ერთი მათგანი AmeriaBank-ის სახელით გავრცელებული თაღლითურ პოსტია, ორი კი რუსული ნავთობკომპანია “გაზპრომის.”
არცერთ ამ გვერდის შემთხვევაში გავრცელებული თაღლითური პოსტები თაიმლაინზე არ ჩანს, რაც ქმნის შთაბეჭდილებას, რომ პოსტები გამოქვეყნების შემდეგ თაიმლაინიდან დამალეს.
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
