23 მარტს ფეისბუქ გვერდმა Azimut/აზიმუტი მაღაზიაში არეულობის ამსახველი ვიდეო შემდეგი აღწერით გამოაქვეყნა: “აი, ასე ებრძვიან უკრაინის ლტოლვილები “რუსულ ოკუპაციას” გერმანიის რუსულ მაღაზიაში.” ვიდეოში მაღაზიის არეული თაროები და ორი მომხმარებელი ჩანს, ერთ-ერთი მამაკაცი თაროებიდან პროდუქტებს იატაკზე ყრის, მეორე კი მას სცემს.
ვიდეო ყალბი აღწერით ვრცელდება და გერმანიაში უკრაინელი ლტოლვილების ქცევას არ ასახავს. რეალურად, კადრები რუსეთის ქალაქ ულიანოვსკშია გადაღებული და ინტერნეტში 2019 წლიდან იძებნება. ხოლო რუსეთ-უკრაინის ომის დროს არასწორი აღწერით ვიდეოს გავრცელება უკრაინელი ლტოლვილების დისკრედიტაციას ისახავს მიზნად, რასაც კრემლის პროპაგანდა ევროპაში უკრაინელი ლტოლვილების მატებასთან ერთად აქტიურად მიმართავს.
ვიდეო ინტერნეტში 2019 წლიდან იძებნება. ყველაზე ადრინდელი 2019 წლის 26 მარტის აღწერის მიხედვით, ვიდეო რუსეთის ქალაქ ულიანოვსკში მაღაზიათა ქსელ “მაგნიტის” ერთ-ერთ ფილიალში 25 მარტსაა გადაღებული.
აღწერის მიხედვით, ინციდენტი Станкостроителей-ის ქუჩაზე მდებარე “მაგნიტის” ფილიალში მოხდა. ერთ-ერთმა მომხმარებელმა იმ მამაკაცის შეჩერება სცადა, რომელიც თაროებიდან პროდუქტებს იატაკზე ყრიდა, რაც ჩხუბში გადაიზარდა. მასალაში მითითებულია, რომ ვიდეო და ფოტო რუსული სოციალური ქსელი “ვკონტაქტედანაა” აღებული.
აღსანიშნავია, რომ ქალაქ ულიანოვსკში Станкостроителей-ის ქუჩის 23ა ნომერში მაგნიტი მართლაც მდებარეობს.
წყაროს შესახებ
ფეისბუქ გვერდი Azimut/აზიმუტი “ქართული მარშთან” დაკავშირებულ ერმილე ნემსაძეს ეკუთვნის.
“მითების დეტექტორმა” აზიმუტის მიერ სხვადასხვა თემასთან, მათ შორის რუსეთ-უკრაინის ომთან და მიგრანტებთან დაკავშირებით, გავრცელებული დეზინფორმაციები არაერთხელ გადაამოწმა, ვრცლად იხილეთ:
- რატომ მიაწერენ რუსეთში 2012 წელს დამწვარ ეკლესიას ზელენსკის და უკრაინის მართლმადიდებლობასთან ბრძოლას?
- რომელი ქვეყნებია რეალურად ფოტოზე, რომელსაც “აზიმუტი” შვედეთს მიაწერს?
- რას უკავშირდება სომხეთის ეკონომიკური ზრდა, რომელსაც “აზიმუტი” ევრაზიულ კავშირს მიაწერს?
- ყალბი ამბავი, თითქოს ელენე ხოშტარიას სერგეი გავრილოვი ასწავლიდა
- კონსპირაცია, თითქოს პორტუგალიაში ამერიკელმა სენატორებმა 3 წლის ბავშვი გაიტაცეს
- სოროსის გაყალბებული ციტატა სინამდვილეში კრემლისტური მედიის პოლიტიკურ მიმომხილველს ეკუთვნის
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.