29 აგვისტოს ფეისბუქ პროფილებმა Giorgi Tchurgulia და “გოგონა ვარ გოგონა” გამოაქვეყნეს მთავარი არხის დამფუძნებლის ნიკა გვარამიას ფოტო, რომელსაც პოსტში თან ერთვის შემდეგი ციტატა: “საქართველოში, რაც უფრო მეტი ევროპელი იცხოვრებს და ნაკლები ქართველი, მით უფრო მალე განვითარდება ეს ქვეყანა”. ფეისბუქ პოსტებში აღნიშნულია, რომ ციტატა ნიკა გვარამიას ეკუთვნის.
გავრცელებული ციტატა, რომელსაც ნიკა გვარამიას მიაწერენ, ღია წყაროებში არ იძებნება. მსგავსი განცხადების გაკეთება გვარამიამ წერილობითაც უარყო.
პოსტებში არ არის მითითებული თუ სად და როდის გააკეთა ნიკა გვარამიამ განცხადება საქართველოში ევროპელებისა და ქართველების რაოდენობის შესახებ, თუმცა, აღსანიშნავია, რომ მსგავსი ციტატა არც ერთ სხვა წყაროში არ იძებნება. “მითების დეტექტორმა” საპატიმროში ნიკა გვარამიას ადვოკატის მეშვეობით გავრცელებულ პოსტზე კომენტარის გაკეთება სთხოვა. გვარამიამ წერილობით აღნიშნა, რომ ციტატა მას არ ეკუთვნის.
ვინ ავრცელებს გვარამიას გაყალბებულ ციტატას?
ფეისბუქ მომხმარებელ Giorgi Tchurgulia-ს, რომელიც გაყალბებულ ციტატას აზიარებს, ფეისბუქზე მითითებული აქვს, რომ საქართველოს ცენტრალურ საარჩევნო კომისიასა და პარტია “ქართულ ოცნებაში” მუშაობს.
Giorgi Tchurgulia ხელისუფლების მხარდამჭერ და ანტიოპოზიციურ, ასევე “მთავარი არხის” საწინააღმდეგო პოსტებს აქვეყნებს.
რაც შეეხება მეორე ფეისბუქ პროფილს, “გოგონა ვარ გოგონა” ყალბი ანგარიშია და გარდა იმისა, რომ მას თავისი სახელი და გვარი მითითებული არ აქვს, ის ინსტაგრამ მოდელის და ინფლუენსერის Ezgi Findik-ის ფოტოს იპარავს.
ყალბი ანგარიში “გოგონა ვარ გოგონა” გიგა მაქარაშვილის მიერ ნაპოლის გუნდის მაისურის დაწვის შესახებ დეზინფორმაციასაც აქვეყნებდა.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.