15 იანვარს ფეისბუქ გვერდმა აგენტურა პარტია “ლელო საქართველოსთვის” წევრების ფოტო გამოაქვეყნა. ფოტოს, რომელზეც მამუკა ხაზარაძის უკან სტალინის ხატი ჩანს, ირონიული შინაარსის აღწერა ერთვის თან – “ლელოს პოლიტსაბჭოდან მოგვაწოდეს. ფოტო ითხოვს დაკვირვებას.” გვერდს პოსტი დაფინანსებული აქვს.
ფოტო, რომელსაც გვერდი “აგენტურა” ავრცელებს, პროგრამულადაა დამუშავებული და პარტია “ლელოს” დისკრედიტაციას ისახავს მიზნად. ავთენტიკურ ფოტოზე სტალინის ხატი გამოსახული არ არის. გვერდი “აგენტურა” პარტია “ლელოს” მადისკრედიტირებელ პოსტებს ხშირად აფინანსებს.
პარტია “ლელო საქართველოსთვის” პოლიტსაბჭოს სხდომის ამსახველი ფოტო პარტიამ საკუთარ ფეისბუქ გვერდზე თავად გამოაქვეყნა.
გაყალბებული ფოტო, რომელსაც “აგენტურა” ავრცელებს დაფინანსებულია. თუმცა ეს არაა პირველი შემთხვევა, როდესაც პარტია “ლელო საქართველოსთვის” ფეისბუქ გვერდ “აგენტურის” სამიზნე გახდა.
ფეისბუქის რეკლამების ბიბლიოთეკის თანახმად, “აგენტურა” ხშირად აქვეყნებს პარტია “ლელოს” წევრების მადისკრედიტირებელ პოსტებს. თითოეული პოსტი 100$-ზე ნაკლები თანხით არის დაფინანსებული, ხოლო რეკლამის განმთავსებელი თავად გვერდი აგენტურაა.
17 იანვრის მონაცემებით, გვერდი “აგენტურა” 290 რეკლამას აფინანსებს, რომელთა დიდი ნაწილიც სხვადასხვა ოპოზიციური პარტიის და მათი ლიდერების დისკრედიტაციას ისახავს მიზნად. მხოლოდ სოციალური, საარჩევნო და პოლიტიკური თემატიკის შინაარსის დაფინანსებაზე გვერდს შექმნის დღიდან 2 636 აშშ დოლარი აქვს დახარჯული. ამასთანავე, დაფინასებული პოსტები, რომლებიც სოციალურ საკითხებს და პოლიტიკას ეხება რიგ შემთხვევებში (არქივი) საჭირო ინდიკაციის და შესაბამისად დაფინანსების წყაროს დადასტურების გარეშე ვრცელდება.
“აგენტურას” შესახებ:
ფეისბუქ გვერდი აგენტურა 2023 წლის 17 თებერვალს Georgian archive-ის სახელით შეიქმნა და მას შემდეგ რამდენიმე სახელი გამოიცვალა.
გვერდი ქართველი ოპოზიციონერებისა და ჟურნალისტების, ასევე საქართველოში აშშ-ის ყოფილი ელჩის, კელი დეგნანის მადისკრედიტირებელ პოსტებს რეგულარულად აქვეყნებს. პოსტების დიდი ნაწილი ანტიდასავლური და ჰომოფობიური შინაარსისაა.
2023 წლის ივლისის ბოლოს გვერდი საქართველოს მეოთხე პრეზიდენტის გიორგი მარგველაშვილის წინააღმდეგ მიმართულ დისკრედიტაციის კამპანიაშიც მონაწილეობდა. 24 ივლისს გვერდზე გავრცელდა დეზინფორმაცია, რომ მარგველაშვილმა სააკაშვილის ქებითვის 11 500 დოლარი მიიღო.
აღსანიშნავია, რომ Facebook Ad Library-ის მიხედვით, გვერდზე განთავსებული პოსტების დიდი ნაწილი დასპონსორებულია.
გაყალბებული ფოტოს არქივის ბმული
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
