6 ივლისს, ფეისბუქ მომხმარებელმა ჯერალდ ნიუმანმა გამოაქვეყნა ვიდეო, რომელზეც, აღწერის მიხედვით, შვეიცარიაში ვაქცინაციის შედეგად დაღუპული ბავშვების მშობლების მიერ ჩატარებული “გასვენება/პერფორმანსი” იყო ასახული. იდენტური ვიდეო 6 თებერვალს ფეისბუქ მომხმარებელმა ზვიად გოგიაშვილმაც გამოაქვეყნა. გოგიაშვილის მიხედვით, კადრებში “ვაქცინაციის შედეგად გარდაცვლილი ბავშვების მშობელთა საპროტესტო მსვლელობაა” ასახული.
ვიდეო არასწორი აღწერით ვრცელდება. რეალურად, 29 იანვარს ჟენევაში გამართულ ე.წ “თეთრი მარშში” არა ვაქცინაციით გარდაცვლილი ბავშვების მშობლები, არამედ ანტივაქსერული ჯგუფის Collectif Parents Suisse-ს წარმომადგენლები მონაწილეობდნენ.
29 იანვარს ჟენევაში ანტივაქსერული ჯგუფის Collectif Parents Suisse-ის მიერ ღონისძიება სახელწოდებით “თეთრი მარში” გაიმართა. მსვლელობის შესახებ თავად ორგანიზატორების მიერ გამოქვეყნებულ პოსტერზე ეწერა, რომ პროტესტის მონაწილეები ჯანდაცვის სპეციალისტები იქნებოდნენ, ხოლო სიტყვით ექიმები, ფსიქიატრები, მშობლები, მასწავლებლები და იურისტები გამოვიდოდნენ.
Youtube-ზე 29 იანვარს ამ აქციის ლაივ ვიდეოში კარგად ჩანს, რომ გოგიაშვილსა და ჯერალდ ნიუმანის მიერ ატვირთული შავ-თეთრი კადრები სწორედ ამ ღონისძიებაზეა გადაღებული.
ორგანიზატორების მიხედვით, აქციის მიზანი სამედიცინო ინსტიტუტების მიერ ბავშვების მიმართ განხორციელებული ძალადობის გაპროტესტება იყო. მსვლელობის შესახებ თავად ორგანიზატორების მიერ გავრცელებულ ინფორმაციაში არსადაა ნათქვამი, რომ ღონისძიება ვაქცინაციის შედეგად გარდაცვლილი ბავშვების მშობლების პერფორმანსს წარმოადგენდა. ადგილზე მისულმა მონაწილეებმა ბავშვების კოვიდსაწინააღმდეგო ვაქცინაცია გააპროტესტეს.
გოგიაშვილისა და ჯერალდ ნიუმანის მიერ გამოქვეყნებული ვიდეოები თავად ორგანიზაციის ფეისბუქ გვერდზე 30 იანვარს გამოქვეყნდა. ვიდეოს აღწერაში არასადაა ნათქვამი, რომ პერფორმანსში ვაქციანციის შედეგად გარდაცვლილი ბავშვების მშობლები მონაწილეობდნენ.
ანტივაქსერული გაერთიანების ფეისბუქ გვერდზე მსვლელობის ამსახველი სხვა ვიდეოც გამოქვეყნდა. პოსტის აღწერაში ორგანიზატორები შეკრებილებს მადლობას უხდიდნენ.
Collectif Parents Suisse-ის ფეისბუქ გვერდზე 1 თებერვალს მედიასაშუალება NTDRV.FR-ის მასალა შემდეგი აღწერით გააზიარეს: “აუცილებელი შეხსენება.”
მასალაში ნათქამია, რომ 29 იანვრის მარშის ფარგლებში ჯანდაცვის სპეციალისტებმა მიმდინარე კონტექსტში ჯანდაცვის ინსტიტუციებში ბავშვებისადმი დამოკიდებულება გააპროტესტეს.
საქართველოში გავრცელებული აქციის კადრები ყალბი აღწერით უცხოეთშიც გამოქვეყნდა. მსვლელობის შესახებ ინფორმაცია იტალიელმა ფაქტების ანალიტიკოსებმაც შეისწავლეს.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.