16-17 თებერვალს რუსულ სოციალურ ქსლებში, Telegram-ზე (1,2), Odnoklassniki-ზე, VKontakte-ზე გაავრცელეს კადრი, რომელიც პოსტების აღწერილობის მიხედვით, BBC-ის სიუჟეტიდან არის ამოჭრილი და მასზე ჩანს, რომ უკრაინის ახალ მთავარსარდალთან ოლექსანდრ სირსკისთან შეხვედრისას ერთ-ერთ უკრაინელ სამხედროს ნაცისტური შევრონი უკეთია.
გავრცელებული კადრი პროგრამულად არის დამუშავებული. BBC-ის მიერ გამოქვეყნებულ ორიგინალ სიუჟეტში ჩანს, რომ სამხედროს მხარზე უკრაინის შეიარაღებული ძალების გენერალური შტაბის ემბლემა უკეთია.
BBC-ის რუსულენოვანმა სამსახურმა უკრაინის ახალ მთავარსარდალზე, ოლექსანდრ სირსკიზე ვიდეო 13 თებერვალს გამოაქვეყნა. ვიდეო მაყურებელს მთავარსარდალის შესახებ ბიოგრაფიულ ფაქტებს აცნობს. სოციალურ ქსელებში გავრცელებული კადრი ამ საინფორმაციო ვიდეოდან არის ამოჭრილი და შემდეგ პროგრამულად დამუშავებული. კადრი ორიგინალ ვიდეოში დაახლოებით 1:02-იდან ჩანს და ვხედავთ, რომ სამხედროს, რომელიც სირსკის პირდაპირ დგას მხარზე უკრაინის შეიარაღებული ძალების გენერალური შტაბის ემბლემა აქვს, რომელზეც მწვანე ფონზე თეთრკანტიანი, შავი სამკაპაა გამოსახული.
ოლეკსანდრ სირსკიმ უკრაინის შეიარაღებული ძალების მთავარსარდლის პოსტზე ვალერი ზალუჟნი 8 თებერვალს ჩაანაცვლა. სირსკი 1965 წელს რუსეთში დაიბადა და 1980-იანი წლებიდან უკრაინაში ცხოვრობს. სამხედრო განათლების მიღების შემდეგ ის სსრკ-ის საარტილერიო ძალებში მსახურობდა. 2014 წელს რუსეთ-უკრაინის კონფლიქტის დაწყების შემდეგ ის უკრაინის რუსეთის მიერ ოკუპირებულ ტერიტორიაზე ანტიტერორისტული ოპერაციის ერთ-ერთი მეთაური იყო. 2019 წელს სირსკი უკრაინის სახმელეთო ძალების მეთაური გახდა. რუსეთის წინააღმდეგ სრულმასშტაბიან ომში სირსკი ხელმძღვანელობდა კიევის დაცვის წარმატებულ ოპერაციას, რისთვისაც უკრაინის გმირის წოდება მიენიჭა. 2022 წლის აპრილში სირსკი ხელმძღვანელობდა კონტრშეტევას, რომლის შედეგადაც უკრაინულმა ძალებმა ხარკივის რეგიონი გაათავისუფლეს და აღმოსავლეთითა და სამხრეთ-აღმოსავლეთით ტერიტორიები დაიბრუნეს.
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
