12 იანვარს ახალი ამბების პორტალმა Pia.ge, ასევე, პორტალმა “საქართველო უპირველეს ყოვლისა” (1;2;3) და მისმა დამფუძნებელმა ვატო შაქარიშვილმა გაავრცელეს ინფორმაცია, რომ საფრანგეთის ახალადდანიშნულმა პრემიერ-მინისტრმა საგარეო საქმეთა მინისტრად საკუთარი პარტნიორი დანიშნა. ინფორმაცია 13-14 იანვარს გაავრცელა ანონიმურმა ფეისბუქ-ანგარიშმა Geo Famaly და კიდევ ერთმა ფეისბუქ-მომხმარებელმა.
განახლება: ინფორმაცია გაავრცელა რუსულმა მედიამაც (1;2;3), მათ შორის, Ria Novosti-მ და რუსულენოვანმა ფეისბუქ-ანგარიშებმაც (1;2).
საფრანგეთის საგარეო საქმეთა მინისტრის დანიშვნის შესახებ ინფორმაცია მანიპულაციურად ვრცელდება და არ არის მითითებული ის დეტალი, რომ გაბრიელ ატალი და სტეფან სეჟურნე პარტნიორები წარსულში იყვნენ, შემდეგ კი დაშორდნენ.
11 იანვარს ცნობილი გახდა, რომ საფრანგეთის საგარეო საქმეთა მინისტრის პოსტს სტეფან სეჟურნე დაიკავებს. შინაგან საქმეთა, ფინანსთა, თავდაცვისა და იუსტიციის მინისტრები თანამდებობაზე დარჩნენ, ყოფილი საგარეო საქმეთა მინისტრი, კატრინ კოლონა კი 38 წლის სეჟურნემ შეცვალა. სტეფან სეჟურნე საფრანგეთის პრეზიდენტის, ემანუელ მაკრონის პარტიის ხელმძღვანელია.
სტეფან სეჟურნე გაბრიელ ატალის ყოფილი პარტნიორია. ატალი საფრანგეთის ყველაზე ახალგაზრდა და ღიად გეი პრემიერ-მინისტრია. მათი ურთიერთობის შესახებ ცნობილი 2018 წელს გახდა – ურთიერთობა ატალმა თავად გაასაჯაროვა, მას შემდეგ, რაც ემანუელ მაკრონის პარტიას შეუერთდა.
ატალსა და სეჟურნეს დაშორების შესახებ ინფორმაცია საჯაროდ არასოდეს დაუდასტურებიათ. თუმცა, Associated Press-ის ცნობით, 2023 წელს ატალმა შეავსო დეკლარაცია, რომლის მიზანიც ინტერესთა პოტენციური კონფლიქტის დაფიქსირებაა და მიუთითა, რომ პარტნიორი არ ჰყავს. ასევე, როგორც ადგილობრივი მედია Le Figaro წერს, სეჟურნე და ატალი 2 წლის წინ დაშორდნენ. 2 წლის წინ დაშორების შესახებ ინფორმაციას ადასტურებს კიდევ ერთი ადგილობრივი მედია – 20 Minutes. France 24-ისა და TV 25 MONDE-ს ინფორმაციით, წყვილი სამოქალაქო პარტნიორობაში წარსულში, “გარკვეული პერიოდის განმავლობაში” იყო. France 24-ს ეყრდნობა Pia.ge-ც, თუმცა, ფრანგული მედიისგან განსხვავებით, არ უთითებს, რომ ატალი და სეჟურნე პარტნიორები წარსულში იყვნენ და ახალ საგარეო საქმეთა მინისტრს პრემიერ-მინისტრის “გეი პარტნიორად” მოიხსენიებს.
მიუხედავად იმისა, რომ საფრანგეთის ახალი პრემიერ-მინისტრი და საგარეო საქმეთა მინისტრი პარტნიორები აღარ არიან, “საქართველო უპირველეს ყოვლისა” და ვატო შაქარიშვილი ინფორმაციას აღნიშნული დეტალის მითითების გარეშე, უკონტექსტოდ ავრცელებენ, რაც ქმნის შთაბეჭდილებას, თითქოს ატალმა პოსტზე მისი ამჟამინდელი პარტნიორი დანიშნა. დაშორების შესახებ არაფერია ნათქვამი არც “საქართველო უპირველეს ყოვლისას” ვებ-საიტზე გამოქვეყნებულ სტატიაშიც.
წყაროების შესახებ
Georgia First NEWS პარტია “ქართული ოცნების” ყოფილი წევრის, ვატო შაქარიშვილის დაფუძნებული პორტალის “საქართველო უპირველეს ყოვლისა” ფეისბუქ-გვერდია. პორტალი ხშირად აქვეყნებს ანტიდასავლური შინაარსის კონტენტს, რომლებიც ევროკავშირის ინსტიტუტების, ნატოს და აშშ-ის პრეზიდენტის ადმინისტრაციის კრიტიკისკენ არის მიმართული. პორტალს “საქართველო უპირველეს ყოვლისა” წარსულში მცდარი და მანიპულაციური მტკიცებებიც გაუვრცელებია.
ანონიმურ ფეისბუქ-ანგარიშს Geo Famaly ყალბი ინფორმაცია წარსულშიც გაუვრცელებია.
არქივის ბმულები (1;2;3;4;5;6;7;8,9,10,11)
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
