სტოლტენბერგისა და ზელენსკის ფოტო ფეისბუქ-გვერდზე POSTV – ანალიტიკა შემდეგი აღწერით გამოქვეყნდა: “ვილნიუსის ნატოს სამიტი ერთ ფოტოში”. ამ ფოტოს აჩვენებენ ფეისბუქ-გვერდზე ad hoc · ედ ჰოკი გამოქვეყნებულ ვიდეოშიც, რომელშიც ნატოს სამიტს განიხილავენ.
გავრცელებული პოსტები ფოტომანიპულაციას შეიცავს. ფოტო, რომელზეც თითქოს ასახულია, როგორ არ ართმევს სტოლტენბერგი ზელენსკის ხელს, არა ნატოს სამიტზე, არამედ 20 აპრილს კიევშია გადაღებული და რეალურად, იმ მომენტში, როცა ზელენსკი სტოლტენბერგს ხელს უწვდის, ის კამერებისკენ იყურება, ხოლო როგორც კი გამოწვდილ ხელს ამჩნევს, ზელენსკის ხელს ართმევს.
ზოგიერთი პოსტი ქმნის შთაბეჭდილებას, თითქოს ზელენსკისა და სტოლტენბერგის ფოტო 11-12 ივლისს გამართულ ნატოს სამიტზეა გადაღებული, რაც სიმართლეს არ შეესაბამება. რეალურად კი, ის 2023 წლის 20 აპრილს იენს სტოლტენბერგის კიევში ვიზიტისისაა გადაღებული.
პოსტები ასევე ქმნიან შთაბეჭდილებას, თითქოს სტოლტენბერგი ზელენსკის ხელს არ ართმევს ან ყოყმანობს. შეხვედრის ვიდეოში გარკვევით ჩანს, რომ ზელენსკი და სტოლტენბერგი კამერების მხარეს იყურებიან, შემდეგ კი ზელენსკი სტოლტენბერგს ჩამოსართმევად ხელს უწვდის, სტოლტენბერგი ისევ კამერებისკენ იყურება, თუმცა როგორც კი გამოწვდილ ხელს შენიშნავს, ზელენსკის ხელს მაშინვე ართმევს.
11-12 ივლისს ვილნიუსში გამართული ნატოს სამიტიდან ვირუსულად გავრცელდა ფოტო, რომელზეც დელეგატები ერთმანეთს ესაუბრებიან, ხოლო ზელენსკი განცალკევებით დგას. რუსულენოვანმა ფეისბუქ-ანგარიშებმა ზელენსკის დაცინვის მიზნით ფოტოს დამუშავებული ვერსიაც გაავრცელეს.
11-12 ივლისს ვილნიუსის სამიტზე განხილული ერთ-ერთი მთავარი საკითხი უკრაინის ნატოში გაწევრიანება იყო. ნატოს გენერალურმა მდივანმა იენს სტოლტენბერგმა დაადასტურა, რომ უკრაინა ალიანსის წევრი MAP-ის გარეშე გახდება.
წყაროების შესახებ:
ფეისბუქ-გვერდი ad hoc · ედ ჰოკი, რომელზე გამოქვეყნებულ ვიდეოში სტოლტენბერგისა და ზელენსკის ფოტომანიპულაციაც იყო ნაჩვენები, 2021 წლის 8 სექტემბერს შეიქმნა და მითითებული ინფორმაციის მიხედვით, ის ონლაინ ტელევიზიაა. ედ ჰოკი ტელეკომპანია POSTV-ის წამყვანებთან, ბაჩო ოდიშარიასა და გური სულთანიშვილთან დაკავშირებული პროექტია. ფეისბუქ-გვერდზე ორივე მათგანის საავტორო გადაცემის ვიდეოებიცაა განთავსებული.
ფეისბუქ-გვერდზე რამდენიმე გადაცემის ვიდეოები ქვეყნდება. გადაცემა “თაკშოუ”, რომელშიც ვილნიუსის სამიტი იყო განხილული, პოლიტიკური სატირის ჟანრშია გადაღებული და უმეტესწილად ქართული ოპოზიციური პარტიების ლიდერების დაცინვას ეძღვნება.
აღსანიშნავია, რომ ფეისბუქ-გვერდს გადაცემა, რომელშიც განხილვის ერთ-ერთი თემა ვილნიუსის სამიტია, დასპონსორებული აქვს.
რაც შეეხება ფეისბუქ-მომხმარებელ ნონა შარაბიძეს, ის ანტიდასავლური შინაარსის მცდარ ინფორმაციას და კრემლისტურ ნარატივებს რეგულარულად ავრცელებს. “მითების დეტექტორმა” შარაბიძის მიერ გავრცელებული დეზინფორმაცია წარსულშიც არაერთხელ გადაამოწმა.
არქივის ბმულები:
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.