16 აგვისტოს დეკანოზმა დავით კონჯარიამ ფეისბუქ ანგარიშზე რამდენიმე ფოტო შემდეგი აღწერით გამოაქვეყნა: “ბოლო სურათები ნასას ცენტრიდან, დიდება სამყაროს შემოქმედ ღმერთს.” აღწერის მიხედვით, ფოტოები, რომლებიც კოსმოსს ჰგავს, აშშ-ის აერონავტიკისა და კოსმოსური სივრცის კვლევის ეროვნულ ადმინისტრაციას (NASA) ეკუთვნის. რამდენიმე ფოტოზე ჯვრისა და ადამიანის სილუეტის მსგავსი გამოსახულებები ჩანს.
მტკიცება იმის შესახებ, რომ გამოქვეყნებული ფოტოები NASA-ს ეკუთვნის, ყალბია. რეალურად, NASA-ს არცერთ პლატფორმაზე ეს გამოსახულებები გამოქვეყნებული არ არის. ფოტოები პროგრამულადაა დამუშავებული.
აშშ-ის აერონავტიკისა და კოსმოსური სივრცის კვლევის ეროვნული ადმინისტრაციის ოფიციალურ ვებ-საიტზე, ფეისბუქ, ინსტასგრამ და ტვიტერ ანგარიშებზე დეკანოზი დავით კონჯარიას მიერ გავრცელებული ფოტოები გამოქვეყნებული არ არის. ასეთი ფოტოები არ გვხვდება არც NASA-ს ფოტოების გალერეაში ან NASA-ს გოდარდის კოსმოსური ფრენის ცენტრის ფოტოების ჩამონათვალში, სადაც კოსმოსის ამსახველი არაერთი კადრია თავმოყრილი.
დეკანოზი დავით კონჯარიას მიერ გავრცელებული ფოტოები არ გადაუღია არც ჯეიმს ვების ტელესკოპს, რომლის მიერ პირველად გადაღებული კოსმოსის ღრმა ხედის ფოტო 2022 წლის 12 ივლისს გამოქვეყნდა. ჯეიმს ვების ტელესკოპის მიერ გადაღებული ფოტოები ტელესკოპის ოფიციალურ ვებ-საიტზეა ხელმისაწვდომი.
სასულიერო პირის მიერ გამოქვეყნებული ფოტოები პროგრამულადაა დამუშავებული. შესაძლებელია ეს გამოსახულებები კვლევითი ცენტრი Midjourney-ის ამავე სახელწოდების მქონე ხელოვნური ინტელექტის პროგრამის ან სხვა მსგავსი პროგრამის მიერ იყოს გენერირებული. Midjourney ფოტოებს მათი ტექსტური აღწერის საფუძველზე ქმნის. Midjoyrney-ის მიერ შექმნილი ფოტოები და დეკანოზის მიერ გამოვეყნებული გამოსახულებები მსგავსია.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
