18-19 ოქტომბერს ქართულენოვანი ფეისბუქ ანგარიშები (1,2), ასევე რუსულენოვანი ფეისბუქ ანგარიშები (1,2,3,4) და გვერდი ავრცელებდნენ ინფორმაციას, რომ ირანში, ხორასანის პროვინციაში იმამ რეზას საფლავზე შავი დროშა აღმართეს, რაც ტრადიციის მიხედვით ომის გამოცხადებასა და შურისძიებისკენ მოწოდებას ნიშნავს.
ინფორმაცია, რომ ირანში, იმამ რეზას სალოცავზე აღმართული შავი დროშა სიმბოლურად ომის გამოცხადებასა და შურისძიებისკენ მოწოდებას ნიშნავს, მცდარია. რეალურად, დროშა გლოვის სიმბოლოა და სალოცავის გუმბათზე ყოველ წელს იმამ ჰუსეინის მოწამეობის აღსანიშნავად აღიმართება. ამ შემთხვევაში, დროშის აღმართვა ღაზას სექტორში საავადმყოფოს აფეთქების შედეგად რამდენიმე ასეული ადამიანის გარდაცვალებას უკავშირდება.
იმამ რეზას სალოცავი ხორასანის პროვინციაში, ქალაქ მეშჰედში მდებარე რელიგიური კომპლექსია. მასში მეჩეთის გარდა ბიბლიოთეკა, მუზეუმი, სასაფლაო, უნივერსიტეტი და სხვა არაერთი დაწესებულება შედის და ის შიიტური ისლამის ერთ-ერთ ყველაზე მნიშვნელოვანი რელიგიური ცენტრია.
შავი დროშა სალოცავის თავზე 18 ოქტომბერს გამოჩნდა, მას შემდეგ, რაც ცნობილი გახდა, რომ 17 ოქტომბერს ღაზას სექტორში ალ-აჰლის საავადმყოფოში მომხდარ აფეთქებას რამდენიმე ასეული ადამიანის სიცოცხლე ემსხვერპლა (1,2).
დროშა გლოვის სიმბოლოს წარმოადგენს და ის ტრადიციულად ყოველ წელს მუჰარრამის თვის დასაწყისში (ისლამური კალენდრის პირველი თვე) იმამ ჰუსეინის მოწამეობის მოსაგონებლად აღიმართება.
შესაბამისად, დროშის აღმართვა გლოვის რიტუალის ნაწილია და მას ომის გამოცხადებასთან ან შურისძიების მოწოდებასთან კავშირი არ აქვს.
ჯერჯერობით უცნობია, ვინაა პასუხისმგებელი 17 ოქტომბერს ალ-აჰლის საავადმყოფოში მომხდარ აფეთქებაზე, რომელსაც 500-მდე ადამიანი შეეწირა. ისრაელის ხელისუფლება პასუხისმგებლობას ღაზას სექტორში მოქმედ ორგანიზაცია “ისლამურ ჯიჰადს აკისრებს”, რომლის წარმომადგენლებიც მომხდართან კავშირს უარყოფენ.
არსებული მონაცემებით, 7 ოქტომბერს დაწყებულ ომს ორივე მხრიდან უკვე 4000-მდე ადამიანის სიცოცხლე შეეწირა.
წყაროების შესახებ:
დავით თორდია პარტია “ქართული ოცნების” მხარდამჭერია და სახელისუფლებო გვერდ “ლიდერი 41-ს” მართავს. თორდია ოპოზიციისა და დასავლეთის მადისკრედიტირებელ პოსტებს, მათ შორის, მცდარ ინფორმაციას რეგულარულად ავრცელებს. “მითების დეტექტორმა” დავით თორდიას მიერ გავრცელებული დეზინფორმაცია წარსულშიც არაერთხელ გადაამოწმა.
ფეისბუქ ანგარიში მათე სარკინეთელი ანტიდასავლური და ანტიოპოციური შინაარსის ყალბ ინფორმაციას ხშირად ავრცელებს.
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.