27 ოქტომბერს გამოცემა “მართლმადიდებელ ჟურნალისტთა კავშირმა (მჟკ)” გამოაქვეყნა სიახლე, რომლის მიხედვითაც უკრაინული საქველმოქმედო ფონდი Вільні ეძებს ვოკალისტს, რომელიც ლგბტ იდეოლოგიას იქადაგებს. მჟკ-ის თანახმად, ფონდმა ვაკანსია ვებ-საიტზე Work.ua გამოაქვეყნა. სტატიაში ასევე ჩასმულია ვაკანსიის სკრინშოტი. იგივე სიახლე მჟკ-მა რუსულ, უკრაინულ და ინგლისურ ენებზეც გამოაქვეყნა.
გავრცელებული ცნობა, რომ საქველმოქმედო ორგანიზაცია მრევლისთვის ლგბტ იდეოლოგიის საქადაგებლად მგალობლებს ეძებს, დეზინფორმაციული შინაარსისაა. ინფორმაცია თავად ორგანიზაციამ უარყო.
ვაკანსიის შესახებ გავრცელებულ ინფორმაციას უკრაინული საქველმოქმედო ორგანიზაცია «БФ Вільні» 29 ოქტომბერს სოციალურ ქსელებში, ფეისბუქსა და ინსტაგრამზე გამოეხმაურა. განცხადებაში აღნიშნულია, რომ გამოქვეყნებულ ვაკანსიაში მოცემული ინფორმაცია სიმართლეს არ შეესაბამება და ორგანიზაცია არც ვოკალისტებს და არც სხვა თანამშრომლებს არ ეძებს. განცხადების თანახმად, დეზინფორმაციის მიზანი ორგანიზაციის რეპუტაციის შელახვაა და მათ საკითხთან დაკავშირებით პოლიციასაც მიმართეს. «БФ Вільні»-ს პოსტს თანდართული აქვს განცხადების სქრინშოტიც, რომელიც თავის სტატიაში “მართლმადიდებელი ჟურნალისტების კავშირს” აქვს ჩასმული.
იქიდან გამომდინარე, რომ ვაკანსიის სქრინშოტი ვიზუალურად ჰგავს ვაკანსიების განთავსების უკრაინულ პორტალს Work.ua-ს, სავარაუდოდ, ყალბი ვაკანსიის შესახებ ინფორმაცია სწორედ აქ გამოქვეყნდა. “მართლმადიდებელ ჟურნალისტთა კავშირის” მიერ სტატიაში მითითებული Work.ua-ს ბმულზე გადასვლის დროს ვაკანსია აღარ იძებნება და ჩანს შენიშვნა, რომ ვაკანსია დამსაქმებელმა წაშალა ან დამალა. ვაკანსიის წაშლის შესახებ ინფორმაცია თავად ბმულშიც მითითებულია. სავარაუდოდ, ვაკანსია მას შემდეგ წაიშალა, რაც ცნობილი გახდა, რომ ის სიმართლეს არ შეესაბამებოდა.
წყაროს შესახებ:
“მართლმადიდებელ ჟურნალისტთა კავშირის” “ჩვენს შესახებ” განყოფილების თანახმად, გაერთიანება 2015 წელს “კანონიკური” მართლმადიდებელი ეკლესიის (მოსკოვის საპატრიარქოს უკრაინის მართლმადიდებელი ეკლესიის) ინტერესების დაცვის მიზნით შეიქმნა. ვებ-საიტი უკრაინულ, რუსულ, ინგლისურ, ბერძნულ, რუმინულ, ქართულ და რუსულ ენებზე ფუნქციონირებს. მჟკ-ის მიერ გავრცელებული ყალბი ცნობები “მითების დეტექტორს” წარსულშიც გადაუმოწმებია.
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.