„ასავალ-დასავალი“ და „უფლებადამცველთა გაერთიანება“ პუტინის “ანიმაციურ” რაკეტას განადიდებენ

გაზეთ “ასავალ დასავალის” 5-11 მარტის გამოშვებაში, არასამთავრობო ორგანიზაცია „უფლებადამცველთა გაერთიანების“ თავმჯდომარე ნიკოლოზ მჟავანაძე და ჟურნალისტი გიორგი გიგაური ვლადიმირ პუტინის ყოველწლიურ გამოსვლას განიხილავენ, სადაც ვლადიმირ პუტინმა შეიარაღების მხრივ რუსეთის უახლეს მიღწევებზე ისაუბრა და განაცხადა, რომ რუსეთს ახალი ფრთოსანი რაკეტა აქვს, რომელიც ბირთვული ქობინებითაა აღჭურვილი და მოქმედების შეუზღუდავი რადიუსი აქვს.

ნიკოლოზ მჟავანაძის თქმით „ნატოს ჰეგემონია დაემხო“ და მსოფლიოში პროცესები რუსეთის კარნახით წარიმართება. „ასავალ-დასავალი“-ს ჟურნალისტი კი მიიჩნევს, რომ რუსეთი იმაზე გაცილებით ძლიერი აღმოჩნდა, ვიდრე ეს საქართველოში ან „თვით ძლევამოსილ ამერიკაში ეგონათ“.

1 მარტს, რუსეთის ფედერალური კრების წინაშე სიტყვით გამოსვლის დროს ვლადიმერ პუტინმა რუსული შეიარაღების უახლესი მიღწევების სადემონსტრაციო ანიმაციური ვიდეორგოლებიც წარადგინა. რუსულენოვანი Republic.ru-ს ცნობით, ანიმაციის კადრიები 2007 წელს რუსეთის სახელმწიფო ტელევიზიის პირველ არხზე გასული დოკუმენტური ფილმიდანაა სახელწოდებით „სატანა“. Newsru.com-ის თანახმად, კონტინენტთაშორისი ბალისტიკური რაკეტა „Сармат “-ის ამსახველი იგივე ანიმაცია რუსეთის პირველ არხზე 2011 წელს გაშვებულ მასალაშიც გამოიყენეს.

ვლადიმირ პუტინის გამოსვლას და სადემონსტრაციო ვიდეორგოლებს სოციალური ქსელების რუსი მომხმარებლების გამოხმაურება და ირონიული კომენტარები მოჰყვა, რომლებმაც ქართულენოვანი კრემლისტური წყაროებისგან განსხვავებული განწყობები გამოხატეს. მომხმარებლების ნაწილი ვიდეოანიმაციებს აშარჟებდა, ნაწილი კი ვლადიმირ პუტინის გამოსვლას არგენტინაში რუსეთის საელჩოში აღმოჩენილ კოკაინს და სოციალურ პრობლემებს უკავშირებდა.