26 მაისს ფეისბუკ-ანგარიშმა Лара Литвинчук ჯგუფში Russian Canada-Русская Канада, საქართველოს პრეზიდენტის სალომე ზურაბიშვილის სახელით შემდეგი ციტატა გაავრცელა: “თუკი ქართველები უცხოური აგენტების კანონს არ მიიღებენ, მაშინ ისინი შეძლებენ მაქმანიანი საცვლებით სიარულს და ვენის ოპერაში საცივის ჭამას”.
იგივე ციტატა X-ის რუსულენოვან ანგარიშზეც გავრცელდა. აღსანიშნავია, რომ კომენტარებში სხვადასხვა მომხმარებელი ციტატას როგორც ნამდვილს, ისე აღიქვამს.
სოციალურ ქსელებში სალომე ზურაბიშვილის სახელით გავრცელებული ციტატა გამოგონილია. არც ერთ საჯარო გამოსვლაში საქართველოს პრეზიდენტს მსგავსი რამ არ უთქვამს. ყალბ ციტატას თავდაპირველად რუსული პოლიტიკურ-სატირული ტელეგრამ-არხები ავრცელებდნენ.
საიდან იღებს სათავეს სალომე ზურაბიშვილის ციტატა?
საქართველოს პრეზიდენტის სალომე ზურაბიშვილის სახელით ეს ციტატა თავდაპირველად ანგარიშმა follyflly ტელეგრამსა და X-ის ანგარიშზე 26 მაისს გაავრცელა. მოგვიანებით კი სატირულმა ტელეგრამ-არხმა Политический Юмор გადააზიარა.
აღსანიშნავია, რომ მანამდე მსგავსი შინაარსის ციტატა, თუმცა ზურაბიშვილის ავტორობის გარეშე, 19 და 25 მაისს ტელეგრამ-არხზე масловский филипп გავრცელდა.
წყაროების შესახებ
follyflly-ის ტელეგრამსა და ტვიტერზე ხშირია ანტიდასავლური და პრო-კრემლისტური პოსტები. ტელეგრამ-არხს აღწერაში შემდეგი წინადადება უწერია: “აქ არ არის ახალი ამბები, არამედ ავტორის რეაქცია მათზე”. არხი ხშირად დებს სხვადასხვა პოლიტიკოსის სახელით გამოგონილ ციტატებსაც, მაგალითად:
- “ბაიდენ, კაი ტიპი ხარ თუ პუტინის “მურზილკა”, მოდი სამიტზე – ზელენსკი”
- “რომ არა რუსეთის ჩართულობა, ამერიკა მეორე მსოფლიო ომს ჯერ კიდევ ორმოცდაერთ წელში მოიგებდა – ბაიდენი”
- “საფრანგეთის საგამოძიებო კომიტეტი განიხილავს სალომე ზურაბიშვილს ღალატის ბრალდებას – მაკრონი”
ფეისბუკ-ანგარიშის Лара Литвинчук-ის მიერ გავრცელებული დეზინფორმაცია “მითების დეტექტორს” წარსულშიც გამოუვლენია.
კონსტანტინე კობერიძე
მითების დეტექტორის ლაბორატორია
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.