21 ივლისს ფეისბუკ მომხმარებელმა თამაზი ოძელაშვილი დავოსის მსოფლიო ეკონომიკური ფორუმის დამფუძნებლის, კლაუს შვაბის გენეოლოგიური ხის ფოტო გამოაქვეყნა. ფოტოს თანახმად, კლაუს შვაბის მშობლები ფრედ შვაბი და მარიან შვაბი (როტშილდი) იყვნენ, რაც შვაბებისა და როტშილდების ნათესაურ კავშირზე მეტყველებს. აღწერაში ოძელაშვილი წერს, რომ მომავალში მსოფლიო “იუდეველ ხასიდებზე” ნადირობას მოაწყობს და მათი “საუკუნოვანი გაიძვერობისა და ამპარტავნობის გამო” მათ “ერთიანად გაჟუჟავენ,” რასაც უდანაშაულო ებრაელებიც შეეწირებიან.
კლაუს შვაბის როტშილდების ოჯახთან კავშირის შესახებ ინფორმაცია ყალბია. რეალურად, კლაუს შვაბს და როტშილდების ოჯახთან ნათესაური კავშირი არ აქვს და შვაბის დედა არა მარიან როტშილდი, არამედ ერიკა ეპხერტი იყო.
“მსოფლიო ეკონომიკური ფორუმის” ვებ-გვერდზე გამოქვეყნებულ კლაუს შვაბის ბიოგრაფიაში ნათქვამია, რომ იგი 1938 წელს, გერმანიაში, რავენსბერგში დაიბადა. Აღსანიშნავია ისიც, რომ მსოფლიო ეკონომიკური ფორუმის დამფუძნებელმა შვაბმა წიგნი “Stakeholder Capitalism”, რომელიც 2021 წელს გამოქვეყნდა, თავის მშობლებს – ევგენ ვილჰელმ შვაბსა და ერიკა ეპრეხტს მიუძღვნა.
კლაუს შვაბის როტშილდებთან ნათესაური კავშირები გერმანულმა გმაოცემა dpa-მ გადაამოწმა. გამოცემის მიხედვით, კლაუს შვაბის მამა 1899 წლის აპრილში გერმანელი მამისა და შვეიცარიელი დედის ოჯახში დაიბადა და ორჯერ იყო დაქორწინებული. ევგენ ვილჰელმ შვაბის პირველი ცოლი ემა კილიანი იყო, რომელთანაც შვილი – ჰანს ერნსტ შვაბი ჰყავდა. 11 წლის შემდეგ,1938 წლის 30 მარტს მეორე ცოლთან – ერიკა ეპრეხტთან მეორე შვილი – კლაუს შვაბი შეეძინა. 1930-იან წლებში კლაუს შვაბის მამა შვეიცარიული მანქანებისა და ტურბინების მშენებელი კომპანიის Escher Wyss-ის რავენსბურგის ქარხნის დირექტორი იყო.
რაც შეეხება მარიან შვაბს, რომელიც პოსტის ავტორის მიხედვით, კლაუს შვაბის დედა იყო, მის შესახებ ინფორმაცია იმ სტატიაში გვხვდება, რომელშიც ფრანკფურტიდან ებრაელების დევნა არის აღწერილი. მარიან შვაბი, რომელიც 1919 წელს ფრანკფურტში ლუი როტშილდის ოჯახში დაიბადა, გერმანიიდან 1939 წელს გაიქცა. ჰოლოკოსტის მემორიალური ცენტრის თანახმად, მარიან შვაბის მამა მართლაც ბანკირი იყო, თუმცა როტშილდების ოჯახთან დაკავშირებული არც მარიან შვაბი არ ყოფილა.
მარიან შვაბი ამერიკის შეერთებულ შტატებში 1940 წელს ჩავიდა, სადაც თავის მომავალ მეუღლეს, ფრედ შვაბს შეხვდა, რომელთანაც ორი შვილი – ლესლი და მადლენი შეეძინა.
აღსანიშნავია, რომ ცნობა მარიან შვაბისა კლაუს შვაბის ნათესაური კავშირის შესახებ 2021 წელსაც ვრცელდებოდა. კლაუს შვაბმა dpa-factchecking.com-ის ფაქტების ანალიტიკოსებს განუცხადა, რომ იგი მარიან შვაბს არ იცნობდა და მასთან არანაირი კავშირი არ ჰქონდა.
როტშილდებისა და შვაბის შესახებ კონსპირაციები “მითების დეტექტორმა” წარსულშიც გადაამოწმა. ვრცლად იხილეთ:
- “როკფელერებისა და როტშილდების კონსპირაციების ანატომია “
- რა (არ) აღიარა კლაუს შვაბმა?
- სოციალურ ქსელში 300-თა კომიტეტის ტექსტის ფრაგმენტს კლაუს შვაბს მიაწერენ
- რა არის “ჩიპების აქტი” და იგეგმება თუ არა ევროპის მოსახლეობის ჩიპიზაცია 2022 წელს?
- დააკავეს თუ არა მსოფლიო ეკონომიკური ფორუმის ხელმძღვანელი შვეიცარიაში?
- ვინ ურევს კლაუს შვაბს “მსოფლიო ეკონომიკური ფორუმიდან” მაქს შვაბში ფლორიდიდან?
- წერს თუ არა შვაბი რელიგიისა და კერძო საკუთრების აკრძალვაზე და საიდან იღებს სათავეს 21/30-ის კონსპირაცია?
ანტისემიტური შეთქმულების თეორიები “ხასიდი” და “ხაზარი” ებრალების შესახებ საქართველოში წარსულშიც ვრცელდებოდა, ვრცლად იხილეთ:
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
