23-24 ივნისს რუსულენოვანმა ფეისბუქ ანგარიშებმა (1,2) გაავრცელეს ინფორმაცია, რომ 2023 წელს შექმნილი “უკრაინის განვითარების ფონდის” ფარგლებში 17 მილიონი ჰექტარი უკრაინული სასოფლო-სამეურნეო დანიშნულების მიწა საერთაშორისო კორპორაციებს უკვე გადაეცა. პოსტებში ასევე ვკითხულობთ, რომ ამ ფონდის შემქმნელმა ლარი ფინკმა, რომელიც ამერიკული კორპორაცია BlackRock-ის ხელმძღვანელია, ამ მიწაზე გარდაცვლილი უკრაინელი სამხედროების დაკრძალვა აკრძალა, რადგან “ძვირფასი სახნავ-სათესი მიწის არამდგრადად გაფლანგვა” შეუფერებელია.
იდენტური პოსტები 12 მაისს სხვა რუსულენოვანმა ანგარიშებმაც (1,2) გაავრცელეს. ისინი წყაროდ რუს რეჟისორსა და პროპაგანდისტს ნიკიტა მიხალკოვს ასახელებენ. ერთ-ერთი პოსტი მიხალკოვის გადაცემის ნაწყვეტსაც შეიცავს.
ინფორმაცია, რომ BlackRock-ის ხელმძღვანელმა უკრაინულ მიწაზე უკრაინელი სამხედროების დაკრძალვა აკრძალა, მცდარია და სათავეს სატირული ტელეგრამ არხიდან იღებს. ასევე, მცდარია მტკიცება, რომ 2023 წლისთვის საერთაშორისო კორპორაციებს 17 მილიონი ჰექტარი უკრაინული სასოფლო-სამეურნეო დანიშნულების მიწა ჰქონდათ ნაყიდი. უკრაინის კანონმდებლობა უცხოურ კომპანიებს სასოფლო-სამეურნეო მიწის შესყიდვას უკრძალავს.
მტკიცება, რომ ამერიკული კომპანია BlackRock-ის თანადამფუძნებელმა და აღმასრულებელმა ხელმძღვანელმა ლარი ფინკმა უკრაინის მიწაზე რუსეთ-უკრაინის ომში დაღუპული უკრაინელი სამხედროების დაკრძალვა აკრძალა, რუსმა რეჟისორმა, მსახიობმა და პროპაგანდისტმა ნიკიტა მიხალკოვმაც გააჟღერა. აღნიშნულ ინფორმაციას ვხვდებით 2023 წლის 21 ოქტომბრის გადაცემაში Бесогон ТВ. ვიდეო, რომელსაც ერთ-ერთი ფეისბუქ პოსტი შეიცავს, სწორედ ამ გადაცემიდანაა ამოჭრილი. მიხალკოვი ინფორმაციას ბელარუსულ სამთავრობო გამოცემა Мінская праўда-ზე დაყრდნობით ავრცელებს. გამოცემის 2023 წლის 5 ოქტომბრით დათარიღებულ სტატიაში ლარი ფინკის ვრცელი ციტატაა მოყვანილი, რომლის მიხედვითაც, ფინკი წუხს, რომ უკრაინელები შავ, სახნავ-სათესად ვარგის ნიადაგს ირაციონალურად, სასაფლაოებისთვის იყენებენ და უკრაინელებს ახსენებს, რომ ეს მხოლოდ მათი მიწა არაა. სტატიაში ინფორმაციის წყარო მითითებული არ არის.
ბელარუსული გამოცემის მიერ მოყვანილი ციტატა ყალბია და ის რუსულენოვან სატირულ ტელეგრამ არხს “Империя очень зла” (იმპერია ძალიან ბოროტია) ეკუთვნის. ინფორმაცია არხზე 2023 წლის 20 სექტემბერს გავრცელდა.
ტელეგრამ არხის საინფორმაციო ველი შეიცავს გაფრთხილებას, რომ არხზე გავრცელებული ინფორმაცია შესაძლოა მცდარი და სატირული შინაარსის იყოს.
BlackRock-ის თანადამფუძნებელმა და აღმასრულებელმა დირექტორმა ლარი ფინკმა უკრაინის აღდგენის ფონდის შექმნის შესახებ 2023 წლის იანვარში, “მსოფლიო ეკონომიკური ფორუმის” ფარგლებში განაცხადა. ფონდის მიზანი ინვესტორების მოძიებაა, რომლებიც უკრაინის სხვადასხვა სექტორის, მათ შორის, ინფრასტრუქტურის, წარმოებისა და ენერგეტიკის განვითარებას დააფინანსებენ. მტკიცება, რომ უკრაინა აღნიშნულ კომპანიას მიეყიდა, რუსული პროპაგანდისტული ნარატივია, რომელსაც რუსი მაღალჩინოსნებიც აჟღერებენ.
ასევე, მცდარია მტკიცება, რომ საერთაშორისო კორპორაციებმა 17 მილიონი ჰექტარი უკრაინული მიწა შეისყიდეს. სინამდვილეში, უკრაინული კანონმდებლობით, უცხოელებს, მოქალაქეობის არმქონე ფიზიკურ პირებსა და იურიდიულ პირებს საწესდებო კაპიტალში წილებისა და აქციების შეძენა, ასევე სასოფლო-სამეურნეო დანიშნულების მიწის მესაკუთრე იურიდიული პირების წევრობა ეკრძალებათ.
იდენტური დეზინფორმაცია 2022 წლის აგვისტოშიც ვრცელდებოდა. უფრო ვრცლად იხილეთ მასალაში:
წყაროების შესახებ:
რუსულენოვანი ანგარიშები Olga Petkevich, Anastasiya Nogovicyna, Архангел Михаил
და Robindranat Tagor ანტიდასავლური და ანტიუკრაინული შინაარსის მცდარ ინფორმაციას ხშირად ავრცელებენ.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
