სექტემბრის დასაწყისში სოციალურ ქსელში ფართოდ გავრცელდა ( 1 2 3 4 5 6 7 8 9 10 11) ფრანგული სატირული ჟურნალის, “შარლი ებდოს” გარეკანის ფოტოები. კარიკატურაზე საფრანგეთის პრეზიდენტი, ემანუელ მაკრონი წყლის ჭავლით მომიტინგე თანამოქალაქეების დაშლას ცდილობს და მათ სახლში წასვლისკენ მოუწოდებს. თავის მხრივ, ფრანგი მომიტინგეები პრეზიდენტს პასუხობენ, რომ წყალი, რომლითაც სველდებიან უფრო თბილია, ვიდრე ის წყალი რომელიც სახლში მოსდით. იქვე გამოსახულია ძაღლის ტანის მქონე უკრაინის პრეზიდენტის კარიკატურაც, რომელიც თეფშიდან ჭამს.
იდენტური ინფორმაცია რუსულენოვან მედიებშიც(1, 2, 3, 4, 5) გავრცელდა.
19 და 20 სექტემბერს რუსულ და ქართულენოვანმა ფეისბუკ ანგარიშებმა (1,2,3,4) და ონლაინ მედიებმა (1, 2) “შარლი ებდოს” გარეკანის მეორე ფოტოც გაავრცელეს. სოციალური ქსელის მომხმარებლები აღნიშნავენ, რომ ჟურნალის გარეკანი ზელენსკის მიმართ დასავლეთის დამოკიდებულებას ასახავს და ისინი პრეზიდენტს დედოფალ ელიზაბეტ II-სთან გამოთხოვების დროს ბრიტანეთში უკრაინის საელჩოს დაშვებული შეცდომის გამო (Queer Elizabeth), დასცინიან.
“შარლი ებდოს”სპეციალური ნომრების გარეკანის ფოტოები, რომლებიც სოციალურ ქსელში ვრცელდება, გაყალბებულია. ფრანგული სატირული ჟურნალის მიერ აგვისტოსა და სექტემბერში გამოშვებული ნომრების გარეკანები ფეისბუკზე გავრცელებულ ვერსიებს არ ემთხვევა და მსგავსი კარიკატურები არც “შარლი ებდოს” სპეციალური ნომრების ყდებზე არ გვხვდება.
სოციალურ ქსელში გავრცელებული ორი გარეკანიდან პირველის, რომელზედაც მაკრონი და ზელენსკი არიან ასახულნი, გამოშვების თარიღად 29 აგვისტო, მეორე სპეციალური ნომრის გამოშვების თარიღად კი 19 სექტემბერია მითითებული. ფრანგული ჟურნალის ოფიციალური ვებგვერდის კატალოგში, ასევე “შარლი ებდოს” ტვიტერისა და ფეისბუკის ოფიციალურ გვერდებზე სოციალურ ქსელში გავრცელებული არც ერთი ყდა არ გვხვდება.
ჟურნალის აგვისტოსა და სექტემბერში გამოშვებული ნომრების გარკანები ასე გამოიყურება:
რაც შეეხება სპეციალურ ნომრებს, “შარლი ებდოს” ბოლო სპეციალური ნომერი ივნისში გამოვიდა და მის გარეკანზე ელექტრო მანქანებია აღბეჭდილი. აღწერის თანახმად, რომელიც ჟურნალის ოფიციალურ ფეისბუკის გვერდზე გამოქვეყნდა, მკითხველები ელექტრო მანქანების შესახებ გაიგებენ ყველაფერს მანამ, სანამ მოტყუვდებიან.
უკრაინის კონტექსტში “შარლი ებდოს” გაყალბებული გარეკანის ფოტოს რუსულენოვანი ფეისბუკ მომხმარებლები ივლისშიც ავრცელებდნენ. ვრცლად იხილეთ “მითების დეტექტორის” მასალა:
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
