23 ნოემბერს ონლაინ გამოცემამ “თვალსაზრისი” უკრაინაში მიმდინარე მოვლენების შესახებ მასალა შემდეგი სათაურით გამოაქვეყნა: “უკრაინიდან პირველები ამერიკელი დიპლომატები გარბიან”. ინფორმაცია ამერიკული მედიასაშუალების Fox News-ის ჟურნალისტის ლუკას ტომლინსონის ტვიტერის პოსტს ეყრდნობა. ტომლინსონის მიხედვით, აშშ-ს სახელმწიფო დეპარტამენტის ბრძანებით, უკრაინაში ამერიკელი დიპლომატების ოჯახების ევაკუაცია იწყება.
“თვალსაზრისის” მასალის სათაური შეცდომაში შემყვანია და ქმნის შთაბეჭდილებას, რომ აშშ-მ უკრაინიდან დიპლომატების სავალდებულო ევაკუაცია დაიწყო. რეალურად, აშშ-ს სახელმწიფო დეპარტამენტის გადაწყვეტილებით, საელჩოს თანამშრომლებს უკრაინის დატოვება ნებაყოფლობით შეუძლიათ, ხოლო დიპლომატების ოჯახის წევრებისთვის სავალდებულო ევაკუაცია იწყება.
აშშ-ს სახელმწიფო დეპარტამენტის განცხადებაში ვკითხულობთ, რომ სახელმწიფო დეპარტამენტმა კიევში აშშ-ს საელჩოში დასაქმებულებს სურვილის შემთხვევაში (voluntary departure) ქვეყნის დატოვების ნებართვა მისცა, ხოლო დასაქმებულების ოჯახის წევრების ევაკუაციის შესახებ ბრძანება (ordered departure) გასცა. სახელმწიფო დეპარტამენტი აშშ-ს მოქალაქეებს მოუწოდებს, უკრაინაში გამგზავრებისგან თავი შეიკავონ. მათივე განცხადებით, ამის მიზეზი ისაა, რომ რუსეთი უკრაინის წინააღმდეგ სერიოზულ სამხედრო მოქმედებებს გეგმავს.
23 დეკემბერს კიევში აშშ-ს საელჩოში მიმდინარე პროცესების შესახებ სახელმწიფო დეპარტამენტის მაღალი თანამდებობის პირების განმარტებებიც გამოქვეყნდა.
ერთ-ერთი მათგანის მიხედვით, სახელმწფიო დეპარტამენტმა სურვილის შემთხვევაში უკრაინის ტერიტორიის დატოვების ნებართვა, კონკრეტულად, აშშ-ს მთავრობის არა-გადაუდებელი მოვალეობის მქონე თანამშრომლებისთვის გასცა. მისივე თქმით, თანამშრომლებს უკრაინის დატოვება, მათი ოჯახის წევრებისგან განსხვავებით, არ მოეთხოვებათ და ეს გადაწყვეტილება მათ სურვილზეა დამოკიდებული.
“თვალსაზრისი” წყაროდ Fox News-ის ჟურნალსიტის ლუკას ტომლინსონის ტვიტერზე გამოქვეყნებულ პოსტს უთითებს. ტომლინსონმა უკრაინიდან ამერიკელი დიპლომატების ევაკუაციის შესახებ პოსტი 22 იანვარს მართლაც გამოაქვეყნა.
ჟურნალისტის პოსტი მხოლოდ საელჩოში დასაქმებული პერსონალის ოჯახის წევრების ევაკუაციას ეხებოდა.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.