8 მარტს ფეისბუქ-მომხმარებელმა კობა ავთანდილის ძე კუპრაშვილმა CNN-ის ვიზუალით ფოტო გამოაქვეყნა, რომელზეც წერია, რომ რუსეთის მიერ უკრაინაში შეჭრა მიოკარდიტს (გულის კუნთის ანთება) იწვევს, ფოტოზე CNN-ის წამყვანი ანდერსონ კუპერია გამოსახული. კუპრაშვილი პოსტში აღნიშნავს, რომ ამერიკელები გახშირებულ მიოკარდიტს უკრაინის ოკუპაციას აბრალებენ, სინამდვილეში კი ვაქცინაციის დაწყებიდან 1 წელი შესრულდა.
ინფორმაცია, თითქოს CNN-ის წამყვანმა ანდერსონ კუპერმა თქვა, რომ რუსეთის მიერ უკრაინაში შეჭრა მიოკარდიტს იწვევს, სატირული გამოცემა The Babylon Bee-ის მიერაა გამოგონილი და სიმართლეს არ შეესაბამება.
სატირული სტატია იმის შესახებ, რომ CNN-ის ეთერში წამყვანმა ანდერსონ კუპერმა მიოკარდიტის შემთხვევები რუსეთ-უკრაინის ომს დაუკავშირა, babylonbee.com-ზე 7 მარტს გამოქვეყნდა. მასალაში ასევე წერია, რომ CNN-ის წამყვანმა დონ ლემონმა აღნიშნა, რომ მიოკარდიტსა და გაზის მაღალ ფასებს შორისაც საგანგაშო კორელაციაა.
Babylon Bee ცნობილი სატირული გამოცემაა და ეს მის ვებ-გვერდზეც ხაზგასმითაა აღნიშნული. მისიის განაცხადში წერია, რომ Babylon Bee გამოგონილ სატირულ ინფორმაციებს ქრისტიანობის, პოლიტიკისა და ყოველდღიური ცხოვრების შესახებ აქვეყნებს.
ქართულ სოციალურ ქსელში Babylon Bee-ს გამოგონილი ამბები რეალური ინფორმაციის სახით აქამდეც არაერთხელ გავრცელდა, ამ თემაზე იხილეთ “მითების დეტექტორის” მასალები:
- გაუუქმა თუ არა ჯო ბაიდენმა ვლადიმირ პუტინს TWITTER-ზე გამოწერა?
- გერმანიაში არავაქცინირებულების საკონცენტრაციო ბანაკებში გადაყვანაზე დეზინფორმაცია სატირულ ვებ-გვერდზე დაყრდნობით ვრცელდება
- საჭიროა თუ არა ვაქცინაცია ახალი IPHONE 13-ის ეკრანის განსაბლოკად?
- ითხოვს თუ არა რომის პაპი სამოთხეში მოსახვედრად ვაქცინაციას?
გულის ანთება (მიოკარდიტი და პერიკარდიტი) CDC-მ რნმ ვაქცინების შესაძლო იშვიათ გვერდით ეფექტად დაასახელა. CDC-ის შეფასებით, კორონავირუსის საწინააღმდეგო ვაქცინაციის შემდეგ მიოკარდიტის შემთხვევები 100 000 ადამიანიდან 0.48-ში გამოვლინდა, ხოლო 18-29 წლის ასაკის 100 000 ადამიანში სიხშირე 1.2 იყო. აღსანიშნავია, რომ შემთხვევების უმეტესობა მსუბუქია და მინიმალური მკურნალობა ესაჭიროება. CDC-ს განმარტებით, ამ შემთვევების იშვიათობის გათვალისწინებით, ვაქცინის სარგებელი რისკებს აჭარბებს.
“მითების დეტექტორის” მიერ მიოკარდიტის შესახებ გადამოწმებული დეზინფორმაცია ვრცლად იხილეთ მასალებში:
- რატომ არ გასცა FDA-მ 16-65 წლის მოსახლეობაზე “ბუსტერ” დოზის რეკომენდაცია?
- იწვევს თუ არა ვაქცინაცია გულის ანთებას?
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
