24 მაისს ანონიმურმა ფეისბუქ-ანგარიშმა საინფორმაციო-ანალიტიკური გაერთიანება გამოაქვეყნა ვიდეო, რომელშიც ვხედავთ, რომ შავებში ჩაცმულ ადამიანს მოქალაქეები ფერად საღებავებს ასხამენ. ვიდეოს თან აქვს დართული წარწერა: “აგონიაში მყოფმა ლიბერალურმა სექტამ წარმართული რიტუალი შეასრულა”.
ბათუმში მოწყობილ პერფორმანსთან დაკავშირებით ვიდეომანიპულაცია ვრცელდება. კადრები “წარმართულ რიტუალს” არ ასახავს, აქციის მონაწილეებმა ფერადი საღებავები “შავბნელ წარსულს” შეასხეს, მათი თქმით, “მომავლის გასაფერადებლად”.
ვიდეო, რომელსაც ფეისბუქ-ანგარიში ავრცელებს, ონლაინ მედია NEWS.on.ge-ს ფეისბუქ-გვერდზე 23 მაისს გამოქვეყნდა. მედიის ინფორმაციით, ბათუმში გამართული პერფორმანსის ფარგლებში, შავებში ჩაცმულ მსახიობს, რომელიც “შავბნელ წარსულს” განასახიერებდა, ფერადი საღებავები “მომავლის გასაფერადებლად” შეასხეს.
“არა რუსულ კანონს” – ამ სახელწოდებით საპროტესტო მარში ბათუმში 23 მაისს, 19:00 საათზე დაიწყო. მანამდე, 18:00 საათზე მოძრაობა Art Gen Z-მ მოაწყო პერფორმანსი სახელწოდებით “გააფერადე მომავალი”, რომლის შესახებაც ინფორმაცია მათ ფეისბუქ-გვერდზეა გამოქვეყნებული.
“შავებში შემოსილი მსახიობი დღევანდელი საქართველოს ბნელ მდგომარეობას წარმოადგენდა, რომელსაც მხატვრები და დამსწრე საზოგადოება სხვადასხვა სიმბოლურ ფერში აფერადებდნენ: წითელი და თეთრი – საქართველოს დროშა; ლურჯი და ყვითელი – ევროკავშირის დროშა; მწვანე – სიცოცხლე და განვითარება”. – წერია მათ განცხადებაში.
Art Gen Z-ის ცნობით, პერფორმანსის მიზანი იყო მოკლე წარმოდგენით საქართველოს დღევანდელი მდგომარეობის ჩვენება და იმის ხაზგასმა, რომ მხოლოდ ქართველ ხალხს შეუძლია ის გააფერადოს.
წყაროს შესახებ
ანონიმური ფეისბუქ ანგარიში “საინფორმაციო-ანალიტიკური გაერთიანება” 2022 წლის აპრილიდან გამოჩნდა და პირველი პოსტი 2022 წლის 12 აპრილს იძებნება. ანგარიში, ძირითადად, ანტიუკრაინული, ანტიდასავლური და ანტიისრაელური შინაარსის ინფორმაციას აქვეყნებს. მის მიერ გავრცელებული ყალბი ინფორმაცია “მითების დეტექტორს” წარსულშიც აქვს გადამოწმებული.
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
