5 მაისს “თავისუფალი არხის” ფეისბუქ გვერდზე საქართველოში ნატო-ს სამოკავშირეო ოფისის ახალი ხელმძღვანელის ალექსანდრე ვინიკოვის კომენტარი გამოაქვეყნა. ციტატის მიხედვით, ვინიკოვმა თქვა, რომ “საქართველოს ნატოში ვერ მიიღებენ,” თუმცა ქვეყნის მისწრაფებები საბოლოო დოკუმენტში აუცილებლად აისახება. “თავისუფალი არხის” მიერ გამოქვეყნებული ვიდეო კავკასიასა და ცენტრალურ აზიაში ნატოს გენერალური მდივნის სპეციალური წარმომადგენლის ხავიერ კოლომინას, ალექსანდრე ვინიკოვისა და ირაკლი ღარიბაშვილის შეხვედრის ამსახველი კადრებია გამოყენებული, ხოლო თავად ნატოს ოფისის ხელმძღვანელის აუდიო კომენტარი საერთოდ არ არის წარმოდგენილი. შეხვედრის კადრები ჟურნალისტის ხმით არის გადაფარული, რომელშიც ის ვინიკოვოს სახელით იგივე განცხადებას იმეორებს.
ინფორმაცია იმის შესახებ, რომ საქართველოში ნატო-ს სამოკავშირეო ოფისის ხელმძღვანელმა განაცხადა, თითქოს საქართველოს ნატო-ში ვერ მიიღებენ, ყალბია. რეალურად, დიპლომატის მიერ ასეთი განცხადების გაკეთების შესახებ ინფორმაცია “მითების დეტექტორთან” კომენტარში ნატოს სამოკავშირეო ოფისმა უარყო. ვინიკოვის იდენტური ან მსგავსი შინაარსის განცხადება არც ღია წყაროებში არ იძებნება.
“მითების დეტექტორი” ინფორმაციის დაზუსტების მიზნით ნატოს სამოკავშირეო ოფისს დაუკავშირდა. “მითების დეტექტორთან” კომენტარში ოფისის წარმომადგენლმა აღნიშნა, რომ ვინიკოვს მსგავსი შინაარსის განცხადება არ გაუკეთებია. მართალია, მან თქვა, რომ საქართველოს მისწრაფებები აისახება, თუმცა არ უთქვამს, რომ საქართველო ნატოში ვერ გაწევრიანდება. ნატო-ს სამოკავშირეო ოფისის მიხედვით, მათ ინფორმაციის ჩასასწორებლად “თავისუფალ არხსაც” მიმართეს.
“თავისუფალი არხის” მიერ გამოყენებული ვიდეო ირაკლი ღარიბაშვილსა და სამხრეთ კავკასიასა და ცენტრალურ აზიაში ნატო-ს გენერალური მდივნის სპეციალური წარმომადგენლის ხავიერ კოლომინას შეხვედრას ასახავს, შეხვედრის შესახებ ინფორმაცია საქართველოს მთავრობის იუთუბ არხზე 27 აპრილს გამოქვეყნდა.
შეხვედრას ალექსანდრე ვინიკოვიც ესწრებოდა. რაც შეეხება პირადად ვინიკოვთან შეხვედრას, ღარიბაშვილი ნატო-ს სამოკავშირეო ოფისის ახალ ხელმძღვანელს 22 მარტს შეხვდა, პრემიერის პრეს-სამსახურის მიხედვით, შეხვედრა გაცნობით ხასიათს ატარებდა.
ღარიბაშვილმა ვინიკოვს თანამდებობაზე დანიშვნა მიულოცა და მათ ნატო-საქართველოს თანამშრომლობის საკითხები განიხილეს. ინფორმაცია იმის შესახებ, რომ ვინიკოვმა რომელიმე ამ შეხვედრაზე განაცხადა, რომ საქართველოს ნატოში ვერ მიიღებენ, ღია წყაროებში არ იძებნება.
“მითების დეტექტორმა” “თავისუფალი არხის” მიერ გავრცელებული დეზინფორმაციები წარსულშიც არაერთხელ გადაამოწმა, ვრცლად იხილეთ:
- “თავისუფალ არხზე” COVID19-ის ტესტების შესახებ დეზინფორმაცია ვრცელდება
- ახლად გარდაქმნილი GMTV.GE და თავისუფალ საქართველოსთან დაკავშირებული “ილიონი” ანტივაქსერების დეზინფორმაციებს ავრცელებენ
- უფოლოგის მტკიცებით, “ვაქცინაციის ექსპერიმენტებს” სათავე პრეზიდენტ მარგველაშვილის ხელშეკრულებამ დაუდო
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.