24 იანვარს სოციალურ ქსელში პროექტის TeslaX შესახებ გავრცელდა ინფორმაცია. ფეისბუკ გვერდის Alina Benderuk-ის მიერ გამოქვეყნებულ პოსტში ნათქვამია, რომ საქართველოს თითოეულ მოქალაქეს სტაბილური შემოსავლის მიღება შეუძლია და ილონ მასკი პლატფორმაზე რეგისტრირებულ თითოეულ მსურველს ყოველთვიურ ხელფასს გადაუხდის. პოსტს ციტატა ახლავს თან, რომელიც ილონ მასკს მიეწერება:
“ახლა საქართველოს ყველა მცხოვრებს შეუძლია მიიიღოს სტაბილური დივიდენდები პროექტისგან TeslaX”.
ვებ-საიტი, რომელიც ილონ მასკის სახელით მსურველებს TeslaX-ის პროექტში ჩართვისკენ მოუწოდებს, თაღლითობის ნიშნებს შეიცავს. ილონ მასკის ციტატა გაყალბებულია, პროექტის შესახებ ინფორმაცია კი ტესლას ოფიციალურ ვებ-საიტზე არ გვხვდება. გარდა ამისა, TeslaX-ში ინვესტირებით კმაყოფილი ადამიანის იდენტობა გაყალბებულია და ის სხვა ადამიანის ფოტოებს იყენებს.
ილონ მასკის სახელით გავრცელებული ციტატა ყალბია და ღია წყაროებში იდენტური ან მსგავსი შინაარსის შემოთავაზება არც რუსულ და არც ინგლისურ ენაზე არ იძებნება. Google-ში “tesla x project”-ის ძებნისას საძიებო სისტემა ტესლას ელექტრომობილს Tesla model X-ს გვთავაზობს, რომლის პრეზენტაციაც 2015 წლის სექტემბერში შედგა. აღსანიშნავია, რომ პროექტის TeslaX შესახებ ინფორმაცია, რომელიც მომხმარებელს ინვესტირებას სთავაზობს, ტესლას ოფიციალურ ვებ-საიტზე არ გვხვდება.
Alina Benderuk-ის მიერ გამოქვეყნებულ პოსტში გაზიარებულ ვებ-გვერდზე ინფორმაცია პროექტის TeslaX შესახებ რუსულ ენაზეა მითითებული. mesezuy.tech-ზე ნათქვამია, რომ პროექტში ინვესტირებისას პირველი მოგების მიღება პირველივე კვირიდან არის შესაძლებელი და გამოცდილების ქონა საერთოდ არაა საჭირო, რამდენადაც პროცესის სრული ავტომატიზაციაა უზრუნველყოფილი.
MeseZuY.tech ნათქვამია, რომ ილონ მასკის პროექტში მონაწილეობის მსურველები თვეში 4000 ევროს ოდენობის შემოსავალს მიიღებენ, რისთვისაც იქვე არსებულ ველში სახელი, ელექტრონული ფოსტის მისამართი და ტელეფონის ნომერი უნდა მიუთითონ.
ვებ-საიტზე ასევე გვხვდება ვიდეო, რომელიც 2022 წლის პირველ ივნისს Youtube-ზეც არის ატვირთული. ვიდეოში ნათქვამია, რომ პროექტის ალგორითმი ტესლას ავტოპილოტის ალგორითმის მსგავსად მუშაობს და ერთადერთი, რისი გაკეთებაც დაინტერესებულ პირს მოუწევს, ეს პროექტში ინვესტიციის ჩადებაა, რაც მას დიდ ფინანსურ სარგებელს მოუტანს. ვიდეოში ასევე აღნიშნულია, რომ პროექტში ინვესტიციები უკვე ჩადეს გრეგორი ლეპსიმ, მარია შარაპოვამ და ლეონარდო დიკაპრიომ.
აღსანიშნავია, რომ ცნობილი ადამიანების სახელების გამოყენება თაღლითური შინაარსის მქონე ვებ-საიტებზე/პოსტებში გავრცელებული მეთოდია, რათა პლატფორმაზე მეტი ადამიანი მიიზიდონ. ამ თემაზე იხილეთ “მითების დეტექტორის” მიერ წარსულში მომზადებული პუბლიკაციები:
- სალომე ზურაბიშვილის სახელით კრიპტოვალუტით ვაჭრობის პლატფორმაზე მოწოდებას თაღლითური ვებ-საიტი ავრცელებს
- თაღლითური ვებ-საიტი ვალერი მელაძის სახელით საქართველოს მოქალაქეებს გამდიდრებას ჰპირდება
- ილონ მასკის სახელით ყალბი ვიდეო ვრცელდება, რომელიც კიბერთაღლითობის ნიშნებს შეიცავს
- В ФЕЙСБУКЕ РАСПРОСТРАНЯЕТСЯ ВИДЕО МАРКА ЦУКЕРБЕРГА С ФАЛЬШИВЫМ РУССКОЯЗЫЧНЫМ ОЗВУЧИВАНИЕМ
ვებ-გვერდის –MeseZuY.tech შესახებ
Who is Lookup-ის მონაცემების მიხედვით, ვებსაიტი MeseZuY.tech 2022 წლის 23 დეკემბერს შეიქმნა და მისი Ip მისამართი გერმანიაში, ბაიერნში მდებარეობს.
ვებ-საიტზე ასევე გვხვდება განყოფილება “გამოხმაურებები პროგრამის მონაწილეებისგან”, სადაც ერთ-ერთი მონაწილე Иван Кац წერს, რომ პროექტი კარანტინის დროს ფინანსური კრიზისისგან თავის დაღწევაში დაეხმარა, მით უმეტეს მაშინ, როცა გამოცდილება საერთოდ არ ჰქონია.
ფოტოს გადამოწმების შემდეგ აღმოჩნდა, რომ Иван Кац-ის ფოტო იუთუბის არხიდან наши американские истории არის აღებული, რომლის საშუალებითაც ბელარუსელი წყვილი Оля და Андрей ამერიკაში ცხოვრების შესახებ ინფორმაციას აზიარებს.
ინვესტირებისა და თანხის გამომუშავების შესახებ იდენტური ინფორმაცია, იდენტურ ვიზუალთან ერთად გვხვდება ასევე სხვა საიტებზეც: teslax22ru.web.app, invst.coin-up და true-cap.grand-de.store. აღსანიშნავია, რომ teslax22ru.web.app-ის Ip მისამართი კალიფორნიაში მდებარეობს, იგივე მონაცემები დანარჩენი ორი საიტის შემთხვევაში მონაცემები IP მისამართის შესახებ Who is Lookup-ზე მითითებული არ არის.
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
