2017 წლის 27 ივლისს რუსულმა ფეისბუკ გვერდმა Роисся 24 საკუთარ ფეისბუკ გვერდზე გაზეთ Аргументы и Факты-ს ფოტო “Друзья и враги Росии, кого мы ценим и кого терпеть не можем” (რუსეთის მეგობრები და მტრები, ვის ვაფასებ და ვისი ატანა არ გვაქვს) გააზიარა, რომელზეც რუსეთის მტრებისა და მეგობრების სიაა მოცემული.
მტრების სიაში პირველ ადგილს ამერიკის შეერთებული შტატები იკავებს, რომელსაც უკრაინა და ბალტიის ქვეყნები მოსდევენ. სიაში მეოთხე ადგილზე საქართველოა, რომლის შემდეგ დიდი ბრიტანეთი და გერმანია მოდის.
“აშშ: რუსეთს NATO-ს ბაზებითა და ანტი-სარაკეტო სისტემებით ალყაში აქცევს და ყოფილი საბჭოთა რესპუბლიკების ჩვენი სივრციდან მოგლეჯას ცდილობს. ერთადერთი სახელმწიფო, რომელსაც საკუთარი ბირთვული არსენალით რუსეთის განადგურება შეუძლია.
უკრაინა: ქვეყანაში ძალაუფლება რუსოფობებმა და ბანდეროვცებმა მიიტაცეს, რომლებიც საკუთარ მოსახლეობას ებრძვიან.
ლიტვა, ლატვია, ესტონეთი: ამ ქვეყნებში რუსულენოვან მოსახლეობას ავიწროებენ და საერთოდაც, ისინი საბჭოთა კავშირიდან NATO-ში გაიქცნენ.
საქართველო: სააკაშვილის მემკვიდრეები, რომელმაც 2008 წელს სამხრეთ ოსეთთან ომი გააჩაღა.
დიდი ბრიტანეთი: რუსეთს ბერეზოვსკი არ გადასცეს, ჩვენი სხვა ოლიგარქებიც შეიფარეს. მეტისმეტად თავდაჭერილები და ამპარტავნები არიან. და კიდევ ჩერჩილი მეორე ფრონტის გახსნას აჭიანურებდა!
გერმანია: გერმანელებს აქვთ ყველაფერი, რაც არ გვაქვს ჩვენ. მაგალითად, წესრიგი, კარგი გზები და მანქანები. მათთან ჩვენ სერიოზული პრობლემები გვქონდა 1941-1945 წლებში.”
რუსეთის მეგობრების სიაში კი შედიან: ბელარუსი, ჩინეთი, ყაზახეთი, სომხეთი, ინდოეთი, კუბა, აზერბაიჯანი და ბულგარეთი.